قازاقستان ۇكىمەتى قاشاعاننان 2017 - جىلدىڭ باسىنان باستاپ كىرىس الۋعا ۇمىتتەنۋدە
بۇل تۋرالى بۇگىن ق ر پارلامەنتى پالاتالارىنىڭ بىرلەسكەن وتىرىسىندا دەپۋتاتتاردىڭ ساۋالىنا جاۋاپ بەرگەن ق ر پرەمەر- ءمينيسترى كارىم ءماسىموۆ ءمالىم ەتتى.
«سىزدەردىڭ نازارلارىڭىزدى مىناعان اۋدارعىم كەلەدى، ءبىزدىڭ كەلىسىمگە سايكەس كونسورتسيۋمنىڭ قازىرگى ۋاقىتتا قۇبىرداعى احۋالدى تۇزەتۋگە كەتكەن شىعىستارى قايتارىلمايدى. مەملەكەت قۇبىر اۋىستىرۋمەن بايلانىستى شىعىنداردى وتەمەيدى. بۇل سول كومپانيالاردىڭ وزدەرىنە جۇك بولادى. بۇعان قوسا، ءبىزدىڭ ۋاعدالاستىعىمىزعا سايكەس، قۇبىرلاردى اۋىستىرۋ 2016 - جىلدىڭ سوڭىندا اياقتالاتىندىعىن اتاپ وتكىم كەلەدى»، - دەدى ۇكىمەت باسشىسى.
ونىڭ اتاپ وتۋىنشە، ۇكىمەت قاشاعاننىڭ ىسكە قوسىلۋىن 2016 -جىلدىڭ سوڭى مەن 2017 -جىلدىڭ باسىنا جوسپارلاپ وتىر. سول كەزدەن باستاپ بۇل كەن ورنىنان مۇناي ءوندىرۋدىڭ ناتيجەسىندە ەلدىڭ ماكرو ەكونوميكالىق جاعدايىنا جانە بيۋدجەتكە كىرىس تۇسە باستايدى.
بۇعان قوسا، ك. ءماسىموۆ قازاقستاننىڭ ە ى د ۇ- عا كىرۋىنە بايلانىستى تابيعاتتى پايدالانۋ جانە ەكولوگيالىق زاڭنامالاردى رەتكە كەلتىرۋ قاجەتتىگىن اتاپ ءوتتى.
اۆتور: مارلان جيەمباي
