قازاقستاندا 2017-جىلدان باستاپ فۋتبول الاڭدارى سەرتيفيكاتتاۋدان وتەتىن بولادى
قازاقستان فۋتبول فەدەراتسياسىنىڭ پرەزيدەنتى ەرلان قوجاعاپانوۆ الماتىدا فۋتبول قاۋىمداستىعىمەن كەزدەسۋ بارىسىندا وسىلاي مالىمدەدى. سونىمەن قاتار، كەزدەسۋدە فۋتبولدىڭ بۇگىنگى جاعدايى تالقىلانىپ، بالالار مەن جاسوسپىرىمدەر ويىنىن دامىتۋ ماسەلەلەرى ءسوز بولدى.
بۇل تۋرالى فەدەراتسيانىڭ باسپا ءسوز قىزمەتىنەن حابارلاندى.
«ءبىز ءۇشىن بالالار مەن جاسوسپىرىمدەر فۋتبولىن دامىتۋ ءبىرىنشى كەزەكتەگى باسىمدىق بولىپ تابىلادى. ويتكەنى، سپورتتىڭ وسى ءتۇرىنىڭ نەگىزگى وزەگى جاس ويىنشىلاردى قالىپتاستىرۋ ارقىلى، ولاردىڭ شەبەرلىكتەرىن شىڭداۋ ارقىلى جەتىلە تۇسپەك. سونىمەن قاتار، ينفراقۇرىلىمدى جاقسارتپاي فۋتبولدى دامىتۋ تۋرالى اڭگىمە ايتۋ بەكەر. سوندىقتان دا، فەدەراتسيا ساپالى فۋتبول الاڭدارىنىڭ سانىن ارتتىرۋعا كومەك بەرەتىن بولادى»، دەدى ە. قوجاعاپانوۆ.
ونىڭ ايتۋىنا قاراعاندا، الداعى ۋاقىتتا ەلىمىزدەگى فۋتبول الاڭدارى مەن ستاديوندارعا تالاپ ساتىلاپ كۇشەيتىلە تۇسپەك. بيىلعى جىلدىڭ وزىندە پرەمەر ليگا الاڭدارىنىڭ بارلىعى اۋديتتەن وتكىزىلەدى، بۇعان شەتەلدىك ماماندار دا تارتىلىپ وتىر.
«2017-جىلدان باستاپ بارلىق الاڭدار سەرتيفيكاتتاۋدان وتەتىن بولادى. ساپاسىز الاڭداردا ەندى ماتچتار وتكىزبەيتىن بولامىز»، - دەدى ەرلان قوجاعاپانوۆ.
بۇدان بولەك، فەدەراتسيا باسشىسىنىڭ ايتۋىنشا، قازاقستاندا بالالار مەن جاسوسپىرىمدەر فۋتبولىنان ءوتۋ رەگلامەنتتەرى جاسالىپ، وڭىرلىك فەدەراتسيالار قىزمەتى جەتىلدىرىلە تۇسەتىن بولادى. سوسىن بالالار جاتتىقتىرۋشىلارىنىڭ رەيتينگى ازىرلەنەدى، سوعان قاراي ىنتالاندىرۋ كەستەسى دە قابىلدانباق. سونىمەن قاتار، ەل فۋتبولىن دامىتۋ ءۇشىن حالىقارالىق ىنتىماقتاستىققا دا بارىنشا نازار اۋدارىلادى.
«فۋتبول الەمىندە قازاقستاننىڭ يميدجىن كوتەرۋ ماقساتىندا ءبىز ەلىمىزدە ماڭىزدى فۋتبول دودالارىن وتكىزۋگە كۇش سالامىز. قازىردىڭ وزىندە استانادا 2018-جىلى ەۋروپا سۋپەركوبوگىن وتكىزۋگە ءوتىنىم بەرىلدى. قازاقستاندا 2017-2018-جىلدارى قىزدار اراسىنداعى U-17 جانە U-19 ەۋروپا چەمپيوناتىن وتكىزۋگە ءوتىنىم ازىرلەنىپ جاتىر»، - دەدى ول.
اۆتور: قانات مامەتقازى ۇلى
