ن. نازاربايەۆ: فرانسۋز تاراپى «ەكسپو-2017» كورمەسىنە بەلسەندى قاتىسۋعا نيەت ءبىلدىردى
«بۇل ءبىزدىڭ فرانسۋز پرەزيدەنتىمەن سوڭعى ەكى جىلداعى ءۇشىنشى كەزدەسۋىمىز. بۇگىنگى پرەزيدەنت فرانسۋا وللاندتىڭ مەنىڭ شاقىرۋىممەن كەلگەن العاشقى ساپارى اياسىنداعى كەلىسسوزدەردى جوعارى باعالايمىن. فرانسيا اسا سىيلى، ۇلى دەرجاۆا، الەمنىڭ ءىرى ەكونوميكالارىنىڭ ءبىرى»، - دەدى ن. نازاربايەۆ.
سونىمەن قاتار ەلباسى كەزدەسۋ اياسىنداعى كەلىسسوزدەردى جوعارى باعالاي وتىرىپ، بۇگىن ەكى ەل وكىلدەرىنىڭ قاتىسۋىمەن وتەتىن بيزنەس فورۋمعا، رەكتورلار فورۋمىنا قاتىساتىنىن، ونداي شارالار بارىسىندا ىنتىماقتاستىقتىڭ ەكونوميكالىق ۋاعدالاستىقتارعا قول جەتەتىنىن ەرەكشە اتاپ ءوتتى.
«ءبىز ينفراقۇرىلىمدىق، يندۋستريالىق-يننوۆاتسيالىق دامۋدىڭ جوسپارىن جۇزەگە اسىرىپ كەلەمىز. سوندىقتان دا بيزنەس فورۋمدا وسى باعىتتاعى ىنتىماقتاستىقتىڭ ناقتى پۋنكتتەرى تالقىلانادى دەپ وتىرمىز. قازاقستان وسى باعدارلامالارعا قاتىسۋشىلارعا ەرەكشە ارتىقشىلىقتار ۇسىنادى»، - دەدى ن. نازاربايەۆ.
بۇدان بولەك، ەلباسى فرانسۋز تاراپى «ەكسپو-2017» حالىقارالىق مامانداندىرىلعان كورمەگە بەلسەندى قاتىسۋعا نيەت بىلدىرگەنىن اتاپ ءوتتى.
اۆتور: قانات مامەتقازى ۇلى
