رەسپۋبليكالىق بيۋجەتتەن «ەكسپو-2017» كورمەسىن وتكىزۋگە قانشا ميلليارد تەڭگە بولىنەدى؟
«وتكەن اپتادا ماجىلىستە «2015-2017» جىلدارعا ارنالعان رەسپۋبليكالىق بيۋجەت تۋرالى» زاڭ جوباسى تانىستىرىلعان بولاتىن. سوعان سايكەس، «ەكسپو-2017» حالىقارالىق مامانداندىرىلعان كورمەسىنە دايىندىققا جانە ونى وتكىزۋگە رەسپۋبليكالىق بيۋجەتتەن الداعى ءۇش جىلدا 435 ميلليارد تەڭگە بولىنەدى. مۇنىڭ ءوزى حالىقارالىق شارانى ءتيىستى دەڭگەيدە وتكىزۋدىڭ ماڭىزدىلىعىن ءبىلدىرىپ وتىر»، - دەدى ا. ميليۋتين.
ەلباسى ن. نازاربايەۆ اتاپ وتكەندەي، «ەكسپو-2017» حالىقارالىق كورمەسى - بۇل قازاقستان ءۇشىن جاڭا ەنەرگەتيكالىق، «جاسىل» تەحنولوگياعا يە بولۋدىڭ تاپتىرماس مۇمكىندىگى.
«الداعى كورمە ەنەرگيا ۇنەمدەۋ سالاسىندا وزىق الەمدىك تەحنولوگيالاردى تارتۋعا ءوز سەپتىگىن تيگىزىپ، بالاما جاڭارتىلاتىن قۋات كوزدەرىن پايدالانۋداعى جاڭا زەرتتەمەلەر مەن تەحنولوگيالاردىڭ ەلىمىزگە كەلۋىنە جاعداي تۋعىزادى. استانا ءدال وسى سالاداعى ەڭ وزىق دۇنيەلەردى الەمگە پاش ەتەتىن اشىق الاڭعا اينالماق»، - دەدى الەكساندر ميليۋتين.
ونىڭ ايتۋىنشا، مۇنداي شارالاردىڭ تيىمدىلىگى زور. اتاپ ايتقاندا، ۇيىمداستىرۋشى مەملەكەت ءۇشىن الەم نازارىن وزىنە اۋدارۋعا، ىسكەرلىك بايلانىستاردى ورناتۋعا، تۋريستەر اعىمىنىڭ ارتۋىن قامتاماسىز ەتۋگە كومەك بولىپ، كورمە ارقاسىندا ەلورداعا ينفراقۇرىلىم نىساندارىن سالۋعا قاتىستى ينۆەستيتسيالاردى تارتۋعا سەپتىگىن تيگىزەدى.
اۆتور: قانات مامەتقازى ۇلى
