ب. ساعىنتايەۆ: ە ە ك ەكسپو-2017 عا ارنالعان ماتەريالدار مەن قۇرال-جابدىقتار تاسىمالىندا كەدەندىك باج سالىعى بولمايدى
بۇل جايىندا بۇگىن ماسكەۋدە ۇكىمەت باسشىلارىنىڭ ءبىرىنشى ورىنباسارلارى دەڭگەيىندەگى ەۋرازيالىق ەكونوميكالىق كوميسسيا وتىرىسىنىڭ قورىتىندىسىندا ق ر پرەمەر-ءمينيسترىنىڭ ءبىرىنشى ورىنباسارى باقىتجان ساعىنتايەۆ ءمالىم ەتتى.
ونىڭ اتاپ وتۋىنشە، قازاقستاندىق تاراپ ەكسپو-2017 حالىقارالىق كورمەسىنە دايىندىققا جانە ونى وتكىزۋگە ارنالعان تاۋارلاردى كەدەن وداعى اۋماعىنان تىسقارى جەردەن اكەلگەن كەزدە بەلگىلەنگەن كەدەندىك باج سالىعىن تولەۋدەن بوساتۋ تۋرالى ۇسىنىس جاساعان.
«كورمە ءبىزدىڭ ينۆەستورلارعا بارىنشا تارتىمدى بولۋى ءۇشىن قولايلى جاعداي تۋعىزۋىمىز قاجەت. بۇگىندە بۇل بارلىق قۇرال-جابدىقتار مەن باسقا دا ماتەريالداردى كەدەندىك باج سالىعىنسىز جانە كەدەندىك جەڭىلدەتىلگەن راسىمدەۋمەن اكەلۋ ارقىلى جاسالماق»، - دەدى ول.
وسى رەتتە ب. ساعىنتايەۆ بۇل ۇسىنىسقا ارىپتەستەرى قولداۋ بىلدىرگەندىگىن ءارى ولارعا ريزاشىلىق تانىتاتىندىعىن باسا ايتتى.
« ەكسپو-2017 كورمەسىن وتكىزۋ ءۇشىن قازاقستانعا جەتكىزىلەتىن بارلىق ماتەريالدارعا نولدىك ستاۆكامەن كەدەندىك باج سالىعى سالىنادى»، - دەدى ءبىرىنشى ۆيتسە-پرەمەر.
اۆتور: مارلان جيەمباي
