قازاقستاندا 2017-جىلدان بەرى پاراشيۋتپەن سەكىرۋ كەزىندە 5 سارباز قازا تاپتى - سەناتور
سەناتور گەننادي شيپوۆسكيح ءوزىنىڭ دەپۋتاتتىق ساۋالىندا ساربازداردىڭ قاۋىپسىزدىگىن قامتاماسىز ەتۋ ماسەلەلەرىن كوتەردى، دەپ حابارلايدى قازاقپارات ءتىلشىسى.
دەپۋتات اسكەري قىزمەتشىلەر بەيبىت ۋاقىتتا قازا تاپقانىنا توقتالا كەلە، جوسپارلى وقۋ-جاتتىعۋ كەزىندە مۇگەدەك بولۋ وقياعالارى دا كەزدەسەتىنىن ايتتى.
سەناتوردىڭ پىكىرىنشە، مۇنىڭ سەبەپتەرىنىڭ ءبىرى - جاتتىعۋ كەزىندە قاۋىپسىزدىك ەرەجەلەرىن قامتاماسىز ەتۋ دەڭگەيىنىڭ تومەندىگى.
«2017-جىلدان بەرى پاراشيۋتپەن جوسپارلى سەكىرۋ وقۋ-جاتتىعۋى كەزىندە وتان قورعاۋشىمىزدىڭ بەسەۋىنەن ايىرىلىپ وتىرمىز. بۇدان وزگە، 2019-جىلى ماڭعىستاۋ وبلىسىندا اسكەريلەردىڭ وقۋ-جاتتىعۋى كەزىندە گراناتا جارىلىپ، سارباز قولىنان ايىرىلدى. وسى سەكىلدى، اسكەردە وقۋ-جاتتىعۋ كەزىندە تەحنيكالىق قاۋىپسىزدىك ەرەجەلەرىن ساقتاماۋ سەبەبىنەن گراناتا جارىلىپ، قارۋ اتىلىپ كەتۋ نەمەسە باسقا دا سالدار بويىنشا قانشاما فاكتىلەر تىركەلدى. ولاردىڭ ءبىرى دەنساۋلىقتان ايىرسا، ءبىرى جانىنان ايىرىپ جاتىر. بۇنداي وقىس وقيعالار بىرنەشە مارتە بولسا دا، ودان ءالى ساباق المادىق. اتالعان وقيعالار اسكەردەگى تەحنيكالىق قاۋىپسىزدىك شارالارىنا ءتيىستى دەڭگەيدە نازار اۋدارىلمايتىنىن بايقاتتى»، - دەدى گەننادي شيپوۆسكيح باس پروكۋراتۋراعا جولداعان ساۋالىندا.
ەسكە سالساق، بيىل 18- قاڭتار كۇنى استانا قالاسىنىڭ ماڭايىندا پاراشيۋتپەن جوسپارلى سەكىرۋ بويىنشا وقۋ-جاۋىنگەرلىك تاپسىرمالارىن ورىنداۋ بارىسىندا مەرزىمدى قىزمەتتەگى سارباز قازا تاپتى.
