قازاقستان ەكسپو-2017 كەزەڭىندە كوممەرتسيالىق قىزمەتتەردەن 500 مىڭ ەۋرو تابىس تۇسىرمەك
بۇل تۋرالى بۇگىن باسپا ءسوز ءماسليحاتىندا وسى باعدارلامانى ۇلتتىق كومپانيانىڭ كوممەرتسيالاۋ دەپارتامەنتىنىڭ وكىلدەرى حابارلادى.
اتالعان دەپارتامەت ديرەكتورىنىڭ ورىنباسارى يليا ورازاقوۆتىڭ ايتۋىنشا، بۇل تۇرعىدا شاعىن جانە ورتا بيزنەستى تارتۋ ارقىلى 25-30 قىزمەت كورسەتۋ باعىتتارى قامتىلماق. وسى ورايدا تولەم جۇيەلەرى، ءدارىحانالار، ەكسكۋرسيا، قازاقستان بويىنشا ساپارلار، ءسان سالوندارى، تيپوگرافيالار، ديزايندىق قىزمەتتەر، زاڭگەرلىك كەڭەستەر جانە باسقا دا قىزمەت تۇرلەرى ىسكە قوسىلادى دەپ كۇتىلۋدە.
«وسىنىڭ الدىنداعى جوبالارعا جاسالعان تالداۋعا سۇيەنسەك، كورمە الاڭىندا ءبىر ادام 4-7 ساعات ارالىعىندا ۋاقىت وتكىزەدى. بىزدەگى كورمەنىڭ اۋماعىندا 25 گەكتار الاڭداعى كورمە كەشەنىن ارالاپ شىعادى. بۇل ۋاقىتتا ءاربىر ادامعا قىزمەت كورسەتۋ جانە ونىڭ قاجەتتىلىكتەرىن قامتاماسىز ەتۋ قامتىلۋى كەرەك»، - دەدى ي. ورازاقوۆ.
ونىڭ سوزىنە قاراعاندا، بۇل باعدارلاماعا قاتىسۋعا نيەتتى شاعىن جانە ورتا بيزنەس ۇلتتىق كومپانياعا ءوتىنىشىن جولداۋى ءتيىس.
«2017 -جىلدىڭ 1 -مامىرىنان باستاپ كورمە تولىقتاي قىزمەتىن باستايدى. ءبىزدىڭ بارلىق وپەراتسيالىق جۇيەلەردى اپروباتسيالاۋ ىسكە اسىرىلادى. اعىمداعى جىلدىڭ قازان- قاراشاسىندا قاتىسۋشى ەلدەرگە كورمە پاۆيلوندارى تاپسىرىلادى. الەم ەلدەرىنىڭ وكىلدەرى مەن حالىقارالىق ۇيىمدار استاناعا ساپارلارىن باستادى. وسى رەتتە ولار قازىرگى كەزدە قىزمەتتىك جۇمىستار بويىنشا تانىسىپ جاتىر»، - دەدى ي. ورازاقوۆ.
