ەكسپو-2017 كورمەسىنە 147 ميلليون ەۋرو دەمەۋشى قارجىسى تارتىلادى
بۇل تۋرالى بۇگىن ق ر پرەزيدەنتى نۇرسۇلتان نازاربايەۆتىڭ توراعالىعىمەن وتكەن استانا قالاسىنىڭ الەۋمەتتىك-ەكونوميكالىق دامۋى مەن ەكسپو كورمەسى ماسەلەلەرىنە ارنالعان كەڭەستە «استانا ەكسپو-2017» ۇلتتىق كومپانياسىنىڭ باسشىسى احمەتجان ەسىموۆ ءمالىم ەتتى.
«بۇعان دەيىن قابىلدانعان شارالارعا قوسىمشا بيۋدجەت قاراجاتىن وڭتايلاندىرۋ بويىنشا جۇمىستار جالعاسۋدا. بۇل راديو بايلانىس، كەڭسە تەحنيكاسى، تەكسەرۋ قۇرال-جابدىقتارى، سەرۆەرلىك قۇرال-جابدىقتار جانە اۋتسورسينگ مودەلىن پايدالانۋعا قاتىستى»، دەدى ول.
سونىمەن قاتار ۇلتتىق كومپانيا باسشىسى بۇل ۇنەمدەۋلەر كورمەگە دايىندىق جانە ونى وتكىزۋ شارالارىنا ەش تەرىس ىقپال ەتپەيتىندىگىن باسا ايتتى.
«تىركەۋ قۇجاتتاماسىنا سايكەس 147 ميلليون ەۋرو دەمەۋشى قارجىسىن تارتۋ جوسپارلانعان. قوعام قازاقستاندىق جانە شەتەلدىك كومپانيالارمەن ءجۇز ميلليون ەۋرونىڭ شارتتار مەن مەموراندۋمدارىنا قول قويدى»، - دەدى ا. ەسىموۆ.
اۆتور: مارلان جيەمباي
