قازاقستاندا 2016-جىلى قانشا فيلم ءتۇسىرىلدى؟

استانا. قازاقپارات - تانىمال كينو سىنشىسى گۇلنار ابىكەيەۆا الەۋمەتتىك جەلىدە وتكەن جىلى تۇسىرىلگەن فيلمدەردىڭ سانىنا قاتىستى قىزىقتى ستاتيستيكالىق دەرەكپەن ءبولىستى، دەپ حابارلايدى قازاقپارات.

«2016-جىلى قازاقستاندا قانشا فيلم ءتۇسىرىلدى؟ قازاقستان كينو سىنشىلارى قاۋىمداستىعىنىڭ مالىمەتىنشە، 28 فيلم تۇسىرىلگەن. ال ەڭ ءىرى ءوندىرۋشى رەتىندە نەگىزىنەن تاريحي كينولار تۇسىرەتىن - «قازاق فيلم» كينوستۋدياسى قالىپ وتىر»، - دەپ جازدى ول فەيسبۋكتەگى پاراقشاسىندا.

سونىمەن، 2016-جىلى تۇسىرىلگەن فيلمدەر قاتارىندا «قازاق حاندىعى. الماس قىلىش» (رەجيسسەرى رۇستەم ابدىراشيەۆ)، «جۇلدىزدار توعىسقاندا» (سەرگەي سنەجكين)، «اناعا اپارار جول» (اقان ساتايەۆ)، «جارالى پەرىشتە» (ەمير بايعازين)، «16 قىز» (قاناعات مۇستافين) بار.

وتاندىق كينودا قالىپتاسقان جاڭا باعىتتا تۇسىرىلگەن فيلمدەر مىنالار: «قاراتاس اۋىلىنداعى وبا» (رەجيسسەرى ءادىلحان ەرجانوۆ)، «6 ءىس كۋاگەرى» (سەرىك ابىشيەۆ، «قازاق فيلم»)، «سوت ورىنداۋشىسى» (مارات ماحان، «قازاق فيلم»).

جەكە ستۋديالار تۇسىرگەن تابىستى كوممەرتسيالىق جوبالار: «تاراز» رەجيسسەرى نۇرتاس ادامباي، «سابينا كەلىن 2» (نۇرتاس ادامباي)، «اۋداندار» (اقان ساتايەۆ)، «گلامۋر دليا دۋر» (اسقار ۇزابايەۆ)، «قازاقشا بيزنەس» (جەڭىسحان مومىشيەۆ)، «30 جاستا تۇرمىسقا شىعۋ» (اسقار بيسەمبين)، «سۋپەرتوي» (عالىم اسىلوۆ).

مۇنان بولەك، بىرلەسكەن فيلمدەر دە كوپ ءتۇسىرىلدى. ولاردىڭ قاتارىندا «توقال» (رەجيسسەرلارى گاۋھار نۇرتاس پەن ەۆگەنيي چەلتسوۆ، قازاقستان-ا ق ش)، «بەيتانىسىم مەنىڭ» (ەدگور ناسىروۆ، بوبۋر يۋلداشيەۆ، قازاقستان-وزبەكستان)، «3 ليمون» (نۇرلان ماماكەيەۆ، قازاقستان-قىرعىزستان) تۋىندىلارى بار. ايتا كەتەرلىگى، «جارالى پەرىشتە» دە بىرلەسكەن جوبا (گەرمانيا-فرانسيا-قازاقستان).

جەكە ستۋديالار تۇسىرگەن كوممەرتسيالىق ەمەس فيلمدەر: «بىردە بالالار ۇيىندە» (سەرىك ابىشەۆ، رۋسلان ماگومادوۆ)، «ايگەرىم» (ەركىن راقىشيەۆ).

ال كوممەرتسيالىق تۋىندىلاردىڭ قاتارىندا مىنا فيلمدەر بار: «مەزەت نەمەسە قاراپايىم ءومىر» (اقجول ءابىلوۆ)، «72 ساعاتتا ۇيلەنۋ» (ەركەبۇلان جولداسوۆ)، «ولىلەرمەن سەلفي» (داۋلەت اۋەلبەكوۆ)، «بۋمەرانگ» (سابىرجان وماربەكوۆ)، «ب. ا. يا.» (سابىر ومار)، «04:29» (مەرەكە مۇقان)، «تاعدىر تالكەگى» (نۇرعيسا اعىبايەۆ)، «اۋىلعا كەلگەندەر» (بەكزات الىمبايەۆ).

اۆتور: مارلان جيەمباي