قازاقستاندىق كاسىپقوي بوكسشىلار 2016-جىلى قانداي بەلەستەردى باعىندىردى
بۇل جىلى قازاق كاسىپقوي بوكسىندا جاڭا چەمپيوندار مەن جاڭا ەسىمدەر پايدا بولدى. 13 سالماق دارەجەسىندە ونەر كورسەتەتىن قازاقستاندىق كاسىپقوي بوكسشىلار سانى 62 گە جەتتى.
سونىڭ ىشىندە گولوۆكين ونەر كورسەتەتىن ورتا سالماق دارەجەسىندە 14 بوكسشىمىز بار. 2016-جىلى بارلىق سالماق دارەجەلەرىن قوسقاندا 29 قازاقستاندىق جاڭا بوكسشى قوسىلدى.
اتاپ ايتار بولساق، ەلگە ەسىمدەرى بەلگىلى رۋسلان مىرساتايەۆ اسا اۋىر سالماقتا، ال جانىبەك ءالىمحان ۇلى ەكىنشى ورتا سالماقتا، استانا ارلاندارى ساپىندا بولعان مەيىرىم نۇرسۇلتانوۆ ورتا سالماقتا ونەر كورسەتتى.
ءبىرىنشى ورتا سالماقتا نۇرسۇلتان جاڭابايەۆ (2-0,1 ك و) وسى جىلى دەبيۋتتىك جەكپە-جەگىندە قىتايلىق قارسىلاسىن جەڭىپ، WBA قىتاي چەمپيونى اتاندى. گەننادي گولوۆكين (36-0, 33 ك و) 2016-جىلى 2 كەزدەسۋ وتكىزىپ، چەمپيوندىق بەلدىكتەرىن قورعاپ قالدى.
ونىڭ كەلەسى قارسىلاسى ورتا سالماقتاعى WBA نۇسقاسى بويىنشا الەم چەمپيونى دەنيەل دجەيكوبس بولماق.
گولوۆكين كەلەسى جىلى ساۋل الۆارەس جانە كىشى حۋليو سەزار چاۆەسپەن دە قولعاپ ءتۇيىستىرۋى مۇمكىن. قانات يسلام (22-0, 18 ك و) بيىل ەكى كەزدەسۋ وتكىزىپ، الماتى قالاسىنداعى بوكس كەشىندە قارسىلاسىن ۇپاي سانى بويىنشا جەڭدى.
وسى جەكپە-جەكتە قانات WBO Inter- Continental جانە UBC الەم چەمپيونى بەلدىگىن يەلەنىپ، WBA Fedelatin تيتۋلىن ساقتاپ قالدى. بۇل جەتىستىك قاناتتى ءوز سالماق دارەجەسى بويىنشا WBA جانە WBO رەيتينگىنىڭ 5-ورنىنا جايعاسۋىنا مۇمكىندىك بەردى.
ال ونىڭ الداعى كەزدەسۋى كەلەسى جىلى ا ق ش- تا بولادى دەپ كۇتىلۋدە. بەيبىت شۇمەنوۆ (17-2, 11 ك و) 2016-جىلى ءبىر كەزدەسۋ وتكىزدى. جارتىلاي اۋىر سالماقتاعى تيتۋلدارىنان ايىرىلعاننان كەيىن بەيبىت ءبىرىنشى ورتا سالماقتى باعىندىرا باستادى.
2015-جىلى ءبىرىنشى اۋىر سالماقتاعى العاشقى كەزدەسۋىندە WBA ۋاقىتشا چەمپيونى اتاعىن جەڭىپ الىپ، بيىلعى كەزدەسۋىندە بەلدىكتى ءساتتى قورعاپ، WBA تۇراقتى الەم چەمپيونى دارەجەسىنە كوتەرىلدى.
ءبىرىنشى اۋىر سالماقتاعى IBO Inter- Continental تيتۋلىنىڭ چەمپيونى يسا اقبەربايەۆ 2016-جىلعى ءۇشىنشى كەزدەسۋىنە دايىندىق كەزىندە جاراقات الىپ قالدى. جەلتوقسان ايىنىڭ جيىرما ءتورتىنشى جۇلدىزىنا جوسپارلانعان جەكپە-جەكتە ول حورۆات كريستيان كرستاچيچپەن WBC International Silver تيتۋلدىق جەكپە-جەكىنە دايىندالىپ جاتقان ەدى.
اقبەربايەۆ سوڭعى كەزدەسۋىندە GBC(Global Boxing Council cruiserweight title) چەمپيوندىق تيتۋلىن يەلەنگەن بولاتىن. WBA ۋاقىتشا چەمپيونى جانات جاقيانوۆ (26-1,18 ك و) 2016-جىلى جاراقاتىنا بايلانىستى جەكپە-جەك وتكىزگەن جوق.
الايدا جاقيانوۆ الداعى 2017-جىلدىڭ 10 اقپانىندا بىردەن WBA (Super) جانە IBO تيتۋلى ءۇشىن ايقاساتىن بولادى. استانا ارلاندارىنىڭ بۇرىنعى مۇشەسى ماديار اشكەيەۆ (7-0, 3 ك و) جالپى وتكىزگەن 7 كەزدەسۋىنىڭ 6 جەكپە-جەگىن 2016-جىلى وتكىزىپ، بارلىعىندا جەڭىسكە جەتتى.
جارتىلاي ورتا سالماقتا باحتيار ەيۋبوۆ (11-0,10 كو) وسى جىلى 2 كەزدەسۋ وتكىزىپ جالپى 11 جەكپە-جەكتە جەڭىلىپ كورمەگەن. باحتياردىڭ 12 كەزدەسۋى كەلەسى جىلى 22- قاڭتار ا ق ش- تا وتەدى دەپ كۇتىلۋدە. قارسىلاسى ازىرشە بەلگىسىز. جانقوش تۇراروۆ (20-0,14 ك و) بيىل ءۇش كەزدەسۋ وتكىزىپ، NBA نۇسقاسى بويىنشا جارتىلاي ورتاشا سالماقتا الەم چەمپيونى تيتۋلىن جەڭىپ الدى.
ءبىرىنشى جارتىلاي ورتا سالماقتاعى جەرلەسىمىز باتىرجان جۇكەمبايەۆ (7-0, 6 ك و) وسى جىلى كانادادا قاتارىنان 7 كەزدەسۋ وتكىزىپ بارلىعىندا جەڭىسكە جەتتى. 8 جەكپە-جەگى 28- اقپان كانادادا وتەتىنى بەلگىلى. ءبىرىنشى جەڭىل سالماقتا ونەر كورسەتىپ جۇرگەن جەرلەسىمىز، WBA NABA تيتۋلىنىڭ يەگەرى بەكمان سويلىبايەۆ (9-,4 ك و) بيىل ءبىر كەزدەسۋ وتكىزىپ WBC EPBC چەمپيوندىق بەلبەۋىن جەڭىپ الدى.
2016-جىلى جالپى قازاقستاندىق بوكسشىلار ءساتتى كەزدەسۋلەر وتكىزىپ، قازاق بوكسىن تىڭ دەڭگەيگە كوتەردى. اۋەسقوي بوكستا دا جەتىستىكتەرىمىز بار، ريو-دە-جانەيرو قالاسىندا وتكەن وليمپيادا ويىندارىنا ۇلتتىق قۇرامامىز تولىق قۇراممەن اتتانىپ، 1 التىن جانە ەكى كۇمىس ەنشىلەدى. 2017-جىلى قازاقستان كاسىپقوي بوكسشىلارىنىڭ تىڭ بيىكتەردەن كورىنۋىنە تىلەكشىمىز.
اۆتور: مۇحتار قاليموللا ۇلى
