قازاقستاندا 2016 -جىلى تۋعان نارەستەلەرگە قويىلعان ەڭ تانىمال ەسىمدەر

استانا. قازاقپارات - ق ر ۇلتتىق ەكونوميكا مينيسترلىگىنىڭ ستاتيستيكا كوميتەتىنىڭ رەسمي سايتىندا 2016 -جىلدىڭ 10-ايىنداعى بالالارعا بەرىلگەن ەسىمدەردىڭ ەڭ تانىمالدارى جاريا ەتىلگەن.

قىزدار اراسىندا قازاقستان بويىنشا ايزەرە ەسىمى تانىمالدىلىققا يە بولعان. بۇل ەسىمدى ەلىمىزدە بيىلعى جىلى 4934 ءسابي يەلەنىپتى. ەكىنشى ورىندا 4873 سابيگە بەرىلگەن ايارۋ، ودان كەيىنگى ۇزدىك ۇشتىك قاتارىندا 4765 ءسابيدىڭ تۋۋ تۋرالى كۋالىگىنە جازىلعان رايانا بار. ولاردان كەيىن ايشا، كاۋسار، ايلين، سوفيا، ارۋجان ەسىمدەرى تۇر ەكەن.

ال ۇلدار اراسىندا ۇزدىك ۇشتىككە ءاليحان (3560 ءسابي) ، نۇريسلام (2731) ، ايسۇلتان (2730) ەسىمدەرى ەنگەن. ال رامازان ايىندا رامازان دەگەن ەسىم كوپ قويىلعان. 2016 -جىلدىڭ ماۋسىم ايىندا بۇل ەسىم ەلىمىز بويىنشا 1718 بالاعا قويىلعان. تانىمال ەسىمدەر قاتارىندا سانجار، ەراسىل، ميراس، ءامىر جانە ءالي دە بار.

كوميتەت سونىمەن قاتار، ەلىمىزدەگى ەرەكشە ەسىمدەردى دە اتاپ ءوتىپتى. ستاتيستيكا بويىنشا، قازاقستاندا رومەو، تسار، ەدەلۆەيس، تەڭىز، ساشا الەكساندر ليۋدوۆيك، قوشكەلدى، كريشنا، ۆاسيليسا- مەيريم، ۆەنەتسيا، قاسيەت- راببىم، كلەوپاترا الينا، نينا جانيا كۋلياندا، وكتاۆيا، پەرەشتە، سيۋزانناۆيكتوريا، ءابدۋسايدنۇريسلامحان، ەدىلجايىق، كايراتكەر، كەرىمزات، ءومىرجالعاس، سامميداستانا، تاراز، حازرەتسۇلتان، ادال ءبي سەكىلدى ازاماتتار مەن ازاماتشالار دا تۇرىپ جاتىر. ستاتيستيكا كوميتەتىنىڭ تاعى ءبىر دەرەگىنە سۇيەنسەك، گاگارين، ءماجىلىس، ءماسليحات، پيونەر، نۇرلىجول، نۇروتان، سەنات، پارتيا دەگەن اتاۋلاردى دا يەلەنگەن ادامدار بار ەكەن.

Stan.kz