ون التى جاستاعى ستۋدەنت «سەمەي ارۋى-2016» اتاندى - فوتو
مۇقان تولەبايەۆ اتىنداعى مۋزىكالىق كوللەدجدىڭ ءبىرىنشى كۋرسىنىڭ ستۋدەنتى بۇل كونكۋرسقا كەزدەيسوق قاتىسقان، بايقاۋعا ەكى اپتا قالعاندا عانا قاتىسۋ تۋرالى شەشىم قابىلداپتى.
«ەكى اپتا بۇرىن ءبىز وسى مۋزىكالىق كوللەدجدە ءبىر ستۋدەنت قىزدىڭ ديپلوم جۇمىسىن وتكىزدىك. سوندا ءبىر قىزدى بايقاپ قالدىق. بۇعان دەيىن ول سۇلۋلىق بايقاۋلارىنا قاتىسىپ كورمەپتى. ءبىز وعان قاتتى قىزىعىپ، قىلىعىن بايقادىق. تابيعي قالپى وتە جاقسى، بەت ءپىشىنى ايقىن، كوزقاراسى تۇنىق»، - دەيدى كونكۋرستىڭ ۇيىمداستىرۋشىسى اينا توعىسوۆا.
ۇيىمداستىرۋشىلاردىڭ تاڭداعان قاتىسۋشىسى كونكۋرستىڭ بارلىق كەزەڭىندە دە ۇزدىك شىقتى. «مەن بۇل كونكۋرسقا قاتىسامىن دەپ ويلاماعان ەدىم. ويلاماعان جەردەن بولدى. ءتىپتى كونكۋرسقا قاتىسسام دا، جەڭەمىن دەپ ويلامادىم. سەبەبى قارسىلاستارىم مىقتى بولدى - كاسىبي مودەلدەر. ءوز مۇمكىندىگىمدى تەكسەرگىم كەلدى جانە بۇل بايقاۋ ءبىرىنشى كەزەكتە ماعان ۇلكەن ساباق بولدى. حورەوگراف وقۋىن وقىپ جاتىرمىن. ءبىراق بۇل وقيعادان كەيىن مودەل بولۋ تۋرالى ارمان پايدا بولدى»، - دەدى جەڭىمپاز.
ەندى ارۋ شىعىس قازاقستان وبلىسىنىڭ اتىنان استانادا 10- جەلتوقساندا وتەتىن رەسپۋبليكالىق فينالدا شىعادى. كونكۋرسقا جالپى سەمەي مەن وبلىستىڭ جاقىن اۋداندارىنان 8 قىز قاتىستى. ايتا كەتەيىك، بيىل كونكۋرس ەل تاۋەلسىزدىگىنىڭ 25 جىلدىعى مەن كونكۋرستىڭ 20 جىلدىعىنا ارنالدى. سوندىقتان دا كونكۋرستا ۇلتتىق بوياۋ ەرەكشە بولدى. ءبىرىنشى ۆيتسە-ارۋ تيتۋلى 11- سىنىپ وقۋشىسى دينا باقتيار قىزىنا بۇيىرسا، ەكىنشى ۆيتسە-ارۋ الۋا ءادىلحانوۆادا، ءۇشىنشى ۆيتسە-ارۋ زارينا سايلامبەكوۆا.
