ريو-2016: وليمپيادانىڭ ون ەكىنشى كۇنى الاش التىن جۇلدەگە يە بولدى

وليمپيادانىڭ ون ەكىنشى كۇنى ماڭگى ەسىمىزدە قالارى انىق. بۇل كۇنى قازاقتىڭ ءبىر ۇلى وليمپيادا چەمپيونى اتانسا، تاعى ءبىر ارۋىمىز كۇرەس تۇرلەرىنەن تۇڭعىش رەت وليمپيادا جۇلدەگەرى اتاندى. ارعى- بەرگى تاريحىمىزعا كوز جۇگىرتىپ قاراساڭىز ايەلدەر كۇرەسىنەن وليمپيادادا ەلميرا سىزدىقوۆاعا دەيىن بىردە- ءبىر قازاق قىزى جۇلدەگە ىلىگە الماعان بولاتىن. مىنە، بۇگىن سول تاريحقا قازاق قىزى تۇزەتۋ جاساپ، ەسىمىن تاريحقا التىن ارىپتەرمەن جازىپ قالدىردى.
وسى قوس قۋانىشقا شاتتانباعان الاش بالاسى قالماعان شىعار بالكىم. بوكستان 69 كەلىگە دەيىنگى سالماقتا دانيار ەلەۋسىنوۆ وزبەكستاندىق شاحرام گياسوۆتى ۇتقاندا ريو اسپانى نۇرلانىپ كەتكەندەي بولدى. جانكۇيەرلەردىڭ شاتتانعانىن تىلمەن ايتىپ جەتكىزۋدىڭ ءوزى مۇمكىن ەمەس. قازاقتىڭ كوك بايراعىن جەلبىرەتىپ، بورىكتەرىن اسپانعا اتتى.
وسىعان دەيىنگى وليمپيادا ويىندارىندا 69 كەلىدە ونەر كورسەتكەن ءۇش بوكسشىمىز باقتيار ارتايەۆ، باقىت سارسەكبايەۆ، سەرىك ساپييەۆ چەمپيون اتانعان ەدى. وسى جولى دا قازاق بوكسشىلارى بۇل سالماقتى ەشكىمگە بەرگەن جوق. سونىمەن دانيار قازاقستانعا برازيليا استاناسىندا وتكەن وليمپيادا ويىندارىندا ءۇشىنشى التىن مەدالدى سىيلادى.
ال ەلميرا سىزدىقوۆا ايەلدەر كۇرەسىنەن وليمپيادا ويىندارىنىڭ قولا مەدالىنە قول جەتكىزىپ، قازاق قىزدارىنان كۇرەستەن شىققان وليمپيادانىڭ العاشقى جۇلدەگەرى دەگەن اتاققا قول جەتكىزدى.
سىزدىقوۆا قولا مەدال ءۇشىن كۇرەستە مىسىرلىق ەناس موستافانى 7:4 ەسەبىمەن ۇتتى.
ەندى وزگە سپورت تۇرلەرىنە قىسقاشا توقتالىپ وتەيىك. بۇگىن تايەكۆوندودان سايىسقا تۇسكەن اينۇر ەسبەرگەنوۆا (49 كەلى) ءۇمىتىمىزدى اقتاي المادى. ول العاشقى كەزدەسۋىندە- اق حورۆاتيالىق ليۋتسيا زانينوۆيچپەن 7:18 ەسەبىمەن ويسىراي ۇتىلىپ قالدى.
ال بايداركا جانە كانوەدا 1000 مەترگە جۇپتاسىپ ەسۋ سايىسىندا الەكسەي دەرگۋنوۆ مەن ەۆگەني الەكسەيەۆ جارىس جولدارىن ءساتتى باستاپ، جارتىلاي فينالعا ءوتتى. سوسىن، اقتىق سايىسقا بەرىلەتىن جولدامانى ساراپقا سالىپ، ولار 1000 مەتردى 3:30,380 ۋاقىتتا باعىندىردى. ناتيجەسىندە فينالعا جولداما الدى. ەندى ولار 18 - تامىز كۇنى استانا ۋاقىتىمەن 18:00-دە جارىس جولىنا شىعادى. سونىمەن قاتار، وسى جارىس ءتۇرىن 200 مەترگە جۇپتاسىپ ەسۋ جارىسىندا سىنعا تۇسكەن سەرگەي توكارنيتسكي مەن اندرەي ەرگۋچيەۆ تە جارتىلاي فينالعا ءوتتى. مۇندا جەرلەستەرىمىز 200 مەتردى 35, 151 ۋاقىتپەن ءجۇزىپ، سوڭعى 5- ورىنعا يە بولدى. جارىس ەرەجەسىنە سايكەس ولار ب فينالىنا جولداما الدى. ەندى قازاقستاندىق ەسكەك ەسۋشىلەر بۇگىن استانا ۋاقىتىمەن 18:40-تا جارىستارىن ارى قاراي جالعاستىرادى.
سونىمەن قاتار بايداركا جانە كانوەدە 200 مەترگە جەكەلەي ەسۋدە سىنعا تۇسكەن جەرلەسىمىز تيمۋر حايداروۆ سايىستى ءساتتى باستاپ، جارتىلاي فينالعا وتكەن بولاتىن. وكىنىشكە قاراي التىن جۇلدە ءۇشىن تالاسۋ مۇمكىندىگىنەن ايىرىلىپ قالدى. ول 200 مەتردى 40, 492 سەكۋندپەن ءجۇزىپ ءوتىپ، 5-ورىنعا تابان تىرەدى. ەندى حايداروۆ قولا جۇلدە ءۇشىن ب فينالىنا قاتىسادى. جارىس بۇگىن استانا ۋاقىتىمەن 18:16-دا باستالادى.
سونىمەن قاتار بۇگىن بايداركا جانە كانوەدە 500 مەترگە جەكەلەي ەسۋ سايىسىندا زويا انانچەنكو ونەر كورسەتىپ، ىرىكتەۋ كەزەڭىنەن سۇرىنبەي ءوتتى. الايدا، ول جارتىلاي فينالدا 500 مەتردى 2:01,660 ۋاقىتتا باعىندىرىپ، مەدال ءۇشىن كۇرەسۋ مۇمكىندىگىنەن ايىرىلىپ قالدى.
ال 800 مەترگە جۇگىرۋدەن مارگاريتا مۋكاشيەۆا العاشقى كەزەڭنەن اسا المادى. بەلگىلەنگەن قاشىقتىقتى 2:00.97 ۋاقىتپەن جۇگىرىپ ءوتىپ، جالپى ەسەپتە 31-ورىنعا تابان تىرەدى.
ال بۇگىن ەركىن كۇرەستەن ونەر كورسەتكەن ەكىنشى قىزىمىز جۇلدەگە ىلىگە المادى. 48 كەلىگە دەيىنگى سالماقتا ونەر كورسەتكەن جۇلدىز ەشيموۆا العاشقى قارسىلاسى جاپوندىق ەري توساكەدەن ۇتىلىپ قالدى. الايدا، كەيىن، جاپوندىق قىز فينالعا شىعىپ، جۇلدىز جۇبانىش بەلدەسۋىنە مۇمكىندىك الدى. بۇل مەدال الۋعا ۇلكەن مۇمكىندىك ەدى. وكىنىشكە قاراي جۇبانىش بەلدەسۋىندە قازاق قىزى العاشقى بەلدەسۋىن امەريكالىق حەيلي رۋت اۋگەللونى ۇتقانىمەن، ەكىنشى بەلدەسۋىندە قىتايلىق سۋن ياناننان 0:4 ەسەبىمەن ۇتىلىپ قالدى. وسىلايشا وليمپيادا ويىندارىن جۇلدەسىز اياقتادى.
قازىر قازاقستان جالپى ەسەپتە 3 التىن، 3 كۇمىس، 6 قولا مەدالمەن 18 - ورىندا كەلە جاتىر.
اۆتور: كۇنسۇلتان وتارباي