ريو-2016: جانىبەك ءالىمحان ۇلى جارتىلاي فينالعا وتە الماي قالدى

دەپ حابارلايدى ريوداعى قازاقپارات ءتىلشىسى.
جانىبەك وسىعان دەيىن الجيرلىق يلياس ابباديدى جەڭىپ، شيرەك فينالعا شىققان بولاتىن. الايدا بۇگىن ازەربايجاندىق بوكسشىدان ۇپاي سانىمەن ۇتىلىپ قالدى. جانىبەك ءبىرىنشى جانە ەكىنشى راۋندتا قارسىلاسىمەن تەڭ دارەجەدە جۇدىرىقتاستى. الايدا، تورەشىلەردىڭ بارلىعى ۇپايدى شاحسۋۆارلىعا جازدى. ءۇشىنشى راۋندىدا قازاق بوكسشىسى قانشا سوققى جاساعانىمەن جەڭىستى ۋىسىنان شىعارىپ الدى.
كامران شاحسۋۆارلى 1990 - جىلى قازاقستاندا دۇنيەگە كەلگەن، بوكسپەن اقتوبەدە جاستايىنان اينالىستى. 2011 -جىلى ك س ر و ەڭبەك سىڭىرگەن سپورت شەبەرى سەرىك قوناقبايەۆتىڭ جۇلدەسى ءۇشىن حالىقارالىق تۋرنيردە جەڭىمپاز بولدى. بوكستان اقتوبە قۇراماسىنىڭ ساپىندا ۇرىس سالدى (75 كەلىگە دەيىنگى سالماقتا). قازاقستان اتىنان كاسىبي رينگتە شاحسۋۆارلى بەس ۇرىس وتكىزىپ، بەسەۋىندە دە جەڭىسكە جەتتى.
2013 -جىلى ازەربايجان ازاماتتىعىن الدى. 2014 -جىلى كامران شاحسۋۆارلى ازەربايجان چەمپيونى بولدى جانە يۋگراداعى (رەسەي) مۇنايلى ەلدەر كۋبوگىندا ەكىنشى ورىنعا يە بولدى. باكۋدە وتكەن «ۇلى جىبەك جولى» جارىستارىندا شاحسۋۆارلى قازاقستان بوكسشىسى ساپارباي ايدانوۆتى جەڭدى جانە تۋرنيردىڭ جەڭىمپازى اتاندى. قازىرگى كەزدە شاحسۋۆارلى ازەربايجان قۇراماسىنىڭ قۇرامىندا جاتتىعۋدا.
2015 -جىلى ازەربايجان چەمپيوناتىندا ەكىنشى ورىن الدى.
ال جانىبەك ءالىمحان ۇلى 1993 -جىلى ءساۋىر ايىنىڭ 1 - كۇنى الماتى وبلىسى الاكول اۋدانىنىڭ جىلاندى اۋىلىندا دۇنيەگە كەلگەن. 8 جاسىنان باستاپ بوكسپەن شۇعىلدانادى. حالىقارالىق دارەجەدەگى سپورت شەبەرى، الماتىدا وتكەن اۋەسقوي بوكستان الەم چەمپيوناتىنىڭ جەڭىمپازى، ينچحونداعى ازيا ويىندارىنىڭ جەڭىمپازى، امماندا وتكەن بوكستان ازيا چەمپيوناتىنىڭ جەڭىمپازى.
برازيليانىڭ ريو- دە- جانەيرو قالاسىندا ءوتىپ جاتقان وليمپيادا ويىندارىندا بۇگىن بوكستان 52 كەلى سالماقتا ونەر كورسەتكەن ولجاس ساتتىبايەۆتە شيرەك فينالعا وتە الماعان بولاتىن. ول 1/8 فينالدا ءازىربايجاندىق بوكسشى ەلۆين ماميشزادەدان 3:0 ەسەبىمەن ۇتىلىپ قالدى.
ەندى جارىس جولىندا ءتورت بوكسشىمىز قالدى.
اۆتور: كۇنسۇلتان وتارباي