ريو-2016: وليمپيادانىڭ توعىزىنشى كۇنى قازاق قورجىنى تاعى ءبىر مەدالمەن تولىقتى

وليمپيادانىڭ توعىزىنشى كۇنى قازاقستان قورجىنىنا ءتورتىنشى قولا مەدال ءتۇستى. ونى ءۇش قارعىپ سەكىرۋ سايىسىنان سىنعا تۇسكەن جەڭىل اتلەتىمىز ولگا رىپاكوۆا جەڭىپ الدى. ول وسىدان تۋرا ءتورت جىل بۇرىن لوندون وليمپياداسىندا باس جۇلدەنى قانجىعاسىنا بايلاعان ەدى. بۇل جەڭىس - بۇگىنگى كۇننىڭ باستى جاڭالىعى بولىپ ەستە قالدى.
ال بۇگىن گرەك- ريم كۇرەسىنەن ءبىر ەمەس، ەكى بىردەي بالۋانىمىز جارىس جولىنا شىققان بولاتىن. وكىنىشكە قاراي ەكەۋى دە ريو وليمپياداسىنىڭ مەدالىنەن قۇر قالدى.
المات كەبىسپايەۆ العاشقى ىرىكتەۋ سىندارىندا ءبىرىنشى گرۋزيا بالۋانى زۋراب داتۋناشۆيليدى 2:0 ەسەبىمەن جەڭگەن بولاتىن. الايدا، ەكىنشى كەزدەسۋىندە ياعني 1/8 فينال بويىنشا سايىستا ول جاپون بالۋانى شينوبۋ وتادان 6:0 ەسەبىمەن ۇتىلدى.
كەيىن، جاپونيالىق بالۋان شينوبۋ وتا فينالعا شىعىپ، ناتيجەسىندە ودان جەڭىلگەندەر جۇبانىش بەلدەسۋىنە مۇمكىندىك العان ەدى. كەبىسبايەۆقا بۇل ۇلكەن مۇمكىندىك ەدى.
ول جۇبانىش بەلدەسۋىندە ءبىرىنشى التى دۇركىن الەم چەمپيونىن، ءبىر دۇركىن وليمپيادا چەمپيونىن ۇتىپ، مەدالعا جاقىنداي ءتۇستى. وكىنىشكە قاراي ول قولا مەدال ءۇشىن سوڭعى شەشۋشى سىندا نورۆەگيالىق بالۋاننان ۇتىلىپ، ريو وليمپياداسىن جۇلدەسىز اياقتادى.
ال ەكىنشى بالۋانىمىز 75 كەلى سالماقتا سىنعا تۇسكەن دوسجان قارتىقوۆ شيرەك فينالدان وتە الماي، ول دا جۇلدەدەن تىس قالدى.
ال بۇگىن بوكستان ايەلدەر اراسىنداعى جەكپە- جەكتەر باسەكەسىندە 75 كەلىدەگى قازاقستاندىق ارۋىمىز داريعا شاكىموۆا العاشقى ايقاسىن وتكىزىپ، كەلەسى اينالىمعا ءوتتى. ول الەمنىڭ ەكى دۇركىن جەڭىمپازى كانادالىق ا. فورتينمەنى 2:1 ەسەبىمەن جەڭىپ كەتتى. وسىلايشا شاكىموۆا العاشقى وليمپياداسىنداعى ءبىرىنشى جەڭىسىنە جەتىپ، ارى قاراي جارىستى جالعاستىرۋعا مۇمكىندىك الدى.
ودان كەيىن كەشكە قاراي قايرات ەراليەۆتىڭ جەكپە- جەگىنىڭ كۋاسى بولدىق. ول وزبەك بوكسشىسى مۋرودجون احماداليەۆتەن ۇپاي سانى بويىنشا ۇتىلىپ قالدى. جاسىرارى جوق، جەكپە- جەك وتە تارتىستى ءوتتى. بۇكىل جانكۇيەرلەر قازاق بوكسشىسى جەڭدى دەپ ويلاعان بولاتىن. سەبەبى، تەحنيكالىق جاعىنان بولسىن، فيزيكالىق جاعىنان بولسىن ەراليەۆ قارسىلاسىنان سالدە بولسا باسىمدىعى كورىنىپ تۇردى. الايدا، ايقاس اياقتاعاننان كەيىن، تورەشى وزبەك بوكسشىسىنىڭ قولىن كوتەرىپ، سونى جەڭىمپاز دەپ تاپتى.
قايرات ەراليەۆ جەكپە- جەكتەن كەيىن قازاقپارات تىلشىسىنە بەرگەن سۇحباتىندا «مەن بۇگىن تورەشىلەردىڭ قۇربانى بولدىم» دەپ ءمالىم ەتتى.
ال بوكسشىلارىمىزدان سوڭعى بولىپ، شارشى الاڭعا شىققان ادىلبەك نيازىمبەتوۆ قارسىلاسىن ايقىن باسىمدىقپەن ۇتىپ، جارتىلاي فينالعا ءوتتى.
ول بۇگىن شيرەك فينالدا ازەربايجاندىق تەيمۋر مامەدوۆتان ايلاسىن اسىرىپ كەتتى. ەسەپ: 3:0. ەندى ادىلبەك نيازىمبەتوۆتى جارتىلاي فينالدا ۇلى بريتانيالىق دجوشۋا بۋاتسيمەن جەكپە- جەك كۇتىپ تۇر. بۇل بوكسشىلار اراسىنداعى كەزدەسۋ 17 - تامىزدا وتەدى.
ەسكە سالا كەتەيىك، جارىستىڭ العاشقى كۇنىندە دزيۋدودان ەرلەر اراسىندا 60 كەلىگە دەيىنگى سالماق دارەجەسىندە سىنعا تۇسكەن ەلدوس سمەتوۆ ەل قورجىنىنا كۇمىس جۇلدە سالسا، 48 كەلىگە دەيىنگى سالماقتا ايەلدەر اراسىندا جارىسقا قاتىسقان وتگونسەسەگ گالبادراح وليمپيادا ويىندارىنىڭ قولا جۇلدەگەرى اتاندى. ال ءۇشىنشى مەدالدى قورجىنعا اۋىر اتلەت فارحاد حاركي سالدى. ول ەرلەر اراسىنداعى 62 كەلىگە دەيىنگى سالماق دارەجەسىندە ونەر كورسەتكەن بولاتىن.
وليمپيادانىڭ ءتورتىنشى كۇنى تاعى ءبىر اۋىر اتلەت قىزىمىز كارينا گوريچيەۆا 63 كەلى سالماقتا ءتورتىنشى مەدالدى ەل قورجىنىنا سالسا، وليمپيادانىڭ بەسىنشى كۇنى ەكى سپورتشىمىز - اۋىر اتلەت نيجات راحيموۆ جانە 200 مەتر قاشىقتىققا جۇزۋدەن دميتري بالاندين ەكەۋى التىن جەڭىپ الدى.
ال وسى كۇنى ايەلدەر اراسىندا سىنعا تۇسكەن اۋىر اتلەت قازاقتىڭ قىزى جازيرا جاپپارقۇل كۇمىس جۇلدەگەر اتانعان ەدى.
مىنە، بۇگىن قازاقستان قورجىنىنداعى مەدالدار سانىن ولگا رىپاكوۆا تاعى ءبىر مەدالمەن ياعني، سەگىزىنشى جۇلدەمەن تولىقتىردى.
وسىلايشا قازاقستان ريو- دە- جانەيرو قالاسىندا ءوتىپ جاتقان وليمپيادا ويىندارىندا جالپى ەسەپتە 2 التىن، 2 كۇمىس، 4 قولا مەدالمەن 16-ورىنىن ساقتاپ قالدى.
اۆتور: كۇنسۇلتان وتارباي