ريو-2016: وليمپيادانىڭ سەگىزىنشى كۇنى قازاق بوكسشىلارى ەرلەگەن كۇن بولدى

وليمپيادانىڭ سەگىزىنشى كۇنى دە قازاقستان قورجىنىنا مەدال تۇسپەدى دەگەنىمىز بولماسا، اسا تارتىستى وقيعالارمەن ەستە قالدى.
ەڭ اۋەلى قازاقستاندىق جەڭىل اتلەت ولگا رىپاكوۆا ريو- دە- جانەيرودا ءوتىپ جاتقان وليمپيادا ويىندارىندا ءۇش قارعىپ سەكىرۋ سايىسىندا فينالعا ءوتتى.
ول لوندون وليمپياداسىنىڭ چەمپيونى، وتانداسىمىز ولگا رىپاكوۆا ءبىرىنشى مۇمكىندىگىندە - 14,10 كورسەتكىشىمەن ءتورتىنشى ورىنعا كوتەرىلگەن بولاتىن، كەيىن ەكىنشى مۇمكىندىگىندە - 14,39 كورسەتكىشىمەن ەكىنشى ورىنعا كوتەرىلە الدى. بۇل ونىڭ بىردەن فينالعا وتۋىنە مۇمكىندىك بەردى. ازىرگە جارىس جالعاسۋدا. فينال 15 تامىزدا استانا ۋاقىتى بويىنشا 05:55 ساعاتتا وتەدى.
بۇل جارىسقا قازاقستاندىق 3 جەڭىل اتلەتىمىز قاتىسقان بولاتىن ولاردىڭ ەكەۋى ۇزدىكتەر قاتارىنان كورىنە الماي جارىس جولدارىن ەرتە اياقتادى.
اتتارىن اتاپ وتەر بولساق، ىرىكتەۋ كەزەڭىندە ەكاتەرينا ەكتوۆا 13 م 38 س م- گە سەكىرىپ، 28- ورىنعا تۇراقتاسا، يرينا ليتۆينەنكو 13 م 17 س م ناتيجەسىمەن 33- ورىننان كورىندى. ال وسى جارىستا لوندون وليمپياداسىنىڭ جەڭىمپازى ولگا رىپاكوۆا 14 م 39 س م- گە سەكىرىپ، جالپىكوماندالىق ەسەپتە ۇزدىك ۇشتىككە كىردى. ەندى جەرلەسەمىز وليمپيادا ويىندارىنىڭ جۇلدەسى ءۇشىن باعىن سىنايدى.
ال 400 مەترگە جۇگىرۋ سايىسىندا سىنعا تۇسكەن ەلينا ميحينا مەن اناستاسيا كۋدينوۆا ىرىكتەۋ كەزەڭىنەن وتە المادى. ەلينا 400 مەتردى 53,83 سەكۋندا جۇگىرىپ وتسە، اناستاسيا وسى ارالىقتى 56,03 سەكۋند ارالىعىندا باعىندىردى. وسىلايشا، ولار جارىستى جالعاستىرۋعا مۇمكىندىك العان ۇزدىك 24 سپورتشىنىڭ قاتارىنا كىرە المادى.
سونىمەن قاتار، قازاقستان وليمپيادا ويىندارىنا باتۋتتان سەكىرۋ بويىنشا العاش رەت ءوز سپورتشىسىن قاتىستىردى. وسى سايىستا ەل نامىسىن قورعاعان پيرمامماد اليەۆ ەكى سايىستىڭ قورىتىندىسى بويىنشا 105,890 ۇپايمەن، 12- ورىننان كورىندى. بۇل كورسەتكىش ونى فينالعا شىعۋعا ازدىق ەتتى.
ەندى بۇگىنگى كۇننىڭ باستى دودالارىنا اينالعان بوكسشىلارىمىزعا توقتالساق. وليمپيادانىڭ سەگىزىنشى كۇنىن قازاق سپورتشىلارى بوكستان ءساتتى باستاپ، بوكسپەن ءساتتى اياقتادى دەسەك ارتىق ايتقانىمىز ەمەس. سەبەبى، بۇگىن جارىس جولىنا شىققان ءتورت بوكسشىمىز دا جەڭىسكە جەتىپ، ايقاستارىن ارى قاراي جالعاستىرۋ مۇمكىندىگىنە يە بولدى.
بوكسشىلارىمىزدان العاش بولىپ، رينگكە شىققان 52 كەلىگە دەيىنگى سالماق دارەجەسىندە ونەر كورسەتەتىن جەرلەسىمىز ولجاس ساتتىبايەۆ العاشقى جەكپە- جەگىن جەڭىسپەن اياقتاپ، 1/8 فينالعا جولداما الدى.
1/16 فينالدا وعان پۋەرتو- ريكو بوكسشىسى دجيەۆەر سينترون وكاسيو قارسىلاس اتانعان بولاتىن. قازاقستاندىق بوكسشى جەكپە- جەكتى وتە قارقىندى باستادى، دەگەنمەن قورعانىستا ساقتىق تانىتپاعان ول كوپ سوققىلار وتكىزىپ الدى. ناتيجەسىندە قازىلار ءبىرىنشى راۋندتا جەڭىستى پۋەرتوريكولىققا بەردى.
ەكىنشى راۋندتا جيناقى جۇدىرىقتاسقان ولجاس ساتتىبايەۆ قارسىلاسىنان ەداۋىر مىقتى بولدى. قازىلار شەشىمىمەن قازاقستاندىق بوكسشى ەكىنشى راۋندتا ۇزدىك دەپ تانىلدى. سوڭعى راۋندتا قارسىلاسىن ابدەن تانىپ العان قازاقستاندىق بوكسشى دجيەۆەرا وكاسيوعا بەت قاراتپادى.
ودان كەيىنگى بوكسشىمىز 69 كەلىدەگى دانيار ەلەۋسىنوۆ تە قارسىلاسىن ۇتىپ، جارتىلاي فينالعا قول جەتكىزدى. ول ۆەنەسۋەلالىق سپورتشى گابريەل ماەسترەنى جەڭدى. 30 جاستاعى ماەسترە - بوكستان ۆەنەسۋەلا قۇراماسىنىڭ كاپيتانى. 2015 -جىلى پانامەريكالىق ويىنداردىڭ چەمپيونى اتانعان، 2013 -جىلى اۋەسقويلار اراسىندا وتكەن الەم چەمپيوناتىندا قولا ىلگەن مىقتى بوكسشى.
ال، 25 جاستاعى بوكسشىمىز 2013 -جىلى الەم چەمپيونى اتاعىن جەڭىپ الدى. 1/8 فينالدا دانيار بريتاندىق بوكسشى دجوشۋا كەلليدەن ايلاسىن اسىرعان بولاتىن. بۇل دانياردىڭ قاتىسىپ جاتقان ەكىنشى وليمپياداسى. وسىعان دەيىن 2012 -جىلعى لوندون وليمپياداسىندا ونەر كورسەتىپ، ول جولى جەڭىس تۇعىرىنا جەتە الماعان ەدى.
ودان كەيىن شارشى الاڭعا 91 كەلىگە دەيىنگى سالماقتا ونەر كورسەتكەن ۆاسيلي لەۆيت كۋبالىق بوكسشى ەريسلاندي ساۆوندى ايقىن باسىمدىقپەن ۇتىپ، فينالعا جولداما الدى. لەۆيت قازاق بوكسشىلارى اراسىنان تۇڭعىش بولىپ فينالعا شىعىپ وتىر.
26 جاستاعى ە. ساۆون - 2015 -جىلعى الەم چەمپيوناتىنىڭ كۇمىس جۇلدە يەگەرى، 2008 -جىلعى جاستار اراسىنداعى الەم چەمپيوناتىنىڭ جەڭىمپازى، پانامەريكالىق ويىنداردىڭ چەمپيونى، ۇلتتىق بىرىنشىلىكتەردىڭ بىرنەشە دۇركىن چەمپيونى.
ۆاسيلي لەۆيت ەكى دۇركىن قازاقستان چەمپيونى، ازيا بىرىنشىلىگىنىڭ جەڭىمپازى. ول وليمپيادانىڭ شيرەك فينالىندا ماۆريتانيالىق كەننەدي سەن- پەرردى تىزە بۇكتىرگەن بولاتىن. ال ەڭ العاشقى جەكپە-جەگىندە قىتايلىق يۋي فەنكايدى ەكىنشى راۋندتا تەحنيكالىق نوكاۋندپەن جەڭگەن بولاتىن. مىنە، ليەۆيت تۇڭعىش رەت وليمپيادا ويىندارىنا 91 كەلى سالماقتا جولدامانى جەڭىپ الىپ، فينالدا ونەر كورسەتەتىن بولدى. بۇيىرسا، ريو وليمپياداسىنىڭ التىنىنا سىنىق سۇيەم جەردە تۇر.
ال ءتورتىنشى بولىپ شارشى الاڭعا +91 كەلى سالماقتاعى بوكسشىمىز يۆان دىچكو بۇگىن باستى قارسىلاسى ازەربايجاندىق موگامەدراسۋل مەدجيدوۆتى ەكىنشى راۋندتا تەحنيكالىق نوكاۋندپەن ۇتىپ، شيرەك فينالعا شىقتى.
بۇل دىچكونىڭ ارى قاراي وليمپيادا ويىندارىن جالعاستىرۋعا ۇلكەن مۇمكىندىك. موگامەدراسۋل مەدجيدوۆ بۇعان دەيىن باسپا ءسوز بەتتەرىندە «مەن وسىعان دەيىن دىچكونى ەكى رەت ۇتقانمىن. وسى جولى دا جەڭىس مەنىكى بولادى» دەپ جار سالعان بولاتىن. الايدا، بۇگىن جەرلەسىمىز ونى جارىس جولىنان تايدىرىپ، وسىعان دەيىنگى كەتكەن بارلىق ەسەسىن قايتارىپ الدى.
ەستەرىڭىزدە بولسا ەكى دۇركىن الەم چەمپيونى مەدجيدوۆ 2013 -جىلى اقتىق سىندا يۆان دىچكونى نوكاۋتقا جىبەرىپ، التىن مەدالدى جەڭىپ العان بولاتىن. مىنە، بۇگىن دىچكو ونى وليمپيادا ويىندارىنان شىعارىپ، كورەرمەندەر قاتارىنا جىبەردى.
ەسكە سالا كەتەيىك، جارىستىڭ العاشقى كۇنىندە دزيۋدودان ەرلەر اراسىندا 60 كەلىگە دەيىنگى سالماق دارەجەسىندە سىنعا تۇسكەن ەلدوس سمەتوۆ ەل قورجىنىنا كۇمىس جۇلدە سالسا، 48 كەلىگە دەيىنگى سالماقتا ايەلدەر اراسىندا جارىسقا قاتىسقان وتگونسەسەگ گالبادراح وليمپيادا ويىندارىنىڭ قولا جۇلدەگەرى اتاندى. ال ءۇشىنشى مەدالدى قورجىنعا اۋىر اتلەت فارحاد حاركي سالدى. ول ەرلەر اراسىنداعى 62 كەلىگە دەيىنگى سالماق دارەجەسىندە ونەر كورسەتكەن بولاتىن. وليمپيادانىڭ ءتورتىنشى كۇنى تاعى ءبىر اۋىر اتلەت قىزىمىز كارينا گوريچەۆا 63 كەلى سالماقتا ءتورتىنشى مەدالدى ەل قورجىنىنا سالسا، وليمپيادانىڭ بەسىنشى كۇنى ەكى اۋىر اتلەتىمىز نيدجات راحيموۆ پەن دميتريي بالاندين 200 مەتر قاشىقتىققا جۇزۋدەن ەكى التىندى جەڭىپ الدى. ال وسى كۇنى ايەلدەر اراسىندا سىنعا تۇسكەن اۋىر اتلەت جازيرا جاپپارقۇل كۇمىس جۇلدەگەر اتاندى.
بۇگىن قازاقستان قۇراماسى 2 التىن، 2 كۇمىس، 3 قولا مەدالمەن جالپى كوماندالىق ەسەپتە 16-ورىندا تۇر.
اۆتور: كۇنسۇلتان وتارباي