ريو-2016: قازاقستاندىق بوكسشى جانىبەك ءالىمحان ۇلى شيرەك فينالعا شىقتى

ريو- دە- جانەيرو. قازاقپارات - جانىبەك ءالىمحان ۇلى برازيليادا ءوتىپ جاتقان وليمپيادا ويىندارىندا كەزەكتى جەڭىسىنە قول جەتكىزىپ، شيرەك فينالعا شىقتى، دەپ حابارلايدى ريودا جۇرگەن قازاقپارات ءتىلشىسى.
None
None

  ەل نامىسىن 75 كەلى سالماقتا قورعاپ جاتقان قازاق بوكسشىسى جانىبەك ءالىمحان ۇلى الجير بوكسشىسى يلياس ءابباديدى 3:0 ەسەبىمەن ۇتىپ، جەڭىسكە جەتتى. جانىبەك وسىعان دەيىن ۇلى بريتانيالىق ەنتوني فاۋلەرمەن جۇدىرىقتاسىپ، ايقىن باسىمدىلىقپەن جەڭگەن بولاتىن. ال الجيرلىك بوكسشى يلياس اببادي 1/16 فينالدا كونگولىق اناۋەل ملي نگاميسەنگەنى 3:0 ەسەبىمەن ۇتقان ەدى. بۇگىن ونى قازاقتىڭ تالانتتى بوكسشىلارىنىڭ ءبىرى جانىبەك ءالىمحان ۇلى جارىس جولىنان تايدىرىپ، ۇيىنە مەدالسىز قايتاردى. جەكپە-جەك ءۇش راۋند بويى قازاق بوكسشىسىنىڭ ايقىن باسىمدىلىعىمەن ءوتتى. ەندى ءبىزدىڭ بوكسشىمىزدىڭ شيرەك فينالداعۆى قارسىلاسى كامران شاحسۋۆارلي (ازەربايجان) - ارتەم چەبوتاريەۆ (رەسەي) جەكپە- جەگىندە بەلگىلى بولادى. ەستەرىڭىزگە سالا كەتەيىك، جانىبەك 2012 -جىلى قازاقستان بىرىنشىلىگىندە جارق ەتىپ كوزگە ءتۇسىپ، 2013 -جىلى الماتىدا وتكەن بوكستان الەم بىرىنشىلىگىندە الەم چەمپيونى اتاندى. سەرىك ساپيەۆ العاش رەت الەم چەمپيوناتىندا توپ جارعاندا 22 جاستا بولاتىن. ال بۇگىنگى الەمدى اۋىزىنا قاراتىپ جۇرگەن گەنناديي گولوۆكين مەن ەردوس جاڭابەرگەنوۆ 21 جاستارىندا الەم چەمپيونى اتاندى. ال جانىبەك 20 جاسىندا الەم چەمپيونى اتاعىنا قول جەتكىزدى. ال ءبىزدىڭ بەكزات ساتتارحانوۆ باتىرىمىز وسى جانىبەكتىڭ جاسىندا وليمپيادا شىڭىن باعىندىرعان بولاتىن. بيىل جانىبەك باۋىرىمىز تۋرا 23 جاستا. ناعىز وت بولىپ جاناتىن شاعى. ريودا قازاقتىڭ بايراعىن جەلبىرەتىپ قايتادى دەگەن ۇمىتتەمىز...    جانىبەك ءالىمحان ۇلى

تۋعان جەرى: الماتى وبلىسى الاكول اۋدانىنىڭ جىلاندى اۋىلىندا دۇنيەگە كەلگەن. 8 جاسىنان باستاپ بوكسپەن شۇعىلدانادى. بويى: 179 س م، سالماعى: 75 ك گ، جەتىستىكتەرى: حالىقارالىق دارەجەدەگى سپورت شەبەرى، الماتىدا وتكەن اۋەسقوي بوكستان الەم چەمپيوناتىنىڭ جەڭىمپازى، ينچحونداعى ازيا ويىندارىنىڭ جەڭىمپازى، امماندا وتكەن بوكستان ازيا چەمپيوناتىنىڭ جەڭىمپازى.
ايتا كەتەيىك، بيىل ءبىزدىڭ جىگىتتەرىمىز وليمپيادا ويىندارىنا تۇڭعىش رەت تولىق قۇراممەن قاتىسۋدا. بۇعان دەيىن ءتورتجىلدىقتىڭ باستى سىنىنا 91 كەلى سالماق دارەجەسىندە ەشبىر بوكسشىمىزعا جولداما بۇيىرماي كەلگەن بولاتىن. اۆتور: كۇنسۇلتان وتارباي

سوڭعى جاڭالىقتار