ريو-2016: وليمپيادانىڭ بەسىنشى كۇنى التىن جاۋدى

ريو- دە- جانەيرو. قازاقپارات - ريو- دە- جانەيرودا ءوتىپ جاتقان 31 - وليمپيادا ويىندارىنىنىڭ بەسىنشى كۇنى قازاق سپورتشىلارىنا التىن جاۋعان كۇن رەتىندە ەستە قالدى، دەپ حابارلايدى ريوداعى قازاقپارات ءتىلشىسى.
None
None

الاشتىڭ ارمانى ورىندالعان كۇن

قانشا جىلدان بەرى ارمانداعان «قازاق قىزدارىنان وليمپيادا جۇلدەگەرى قاشان شىعادى؟»  دەگەن سۇراققا بۇگىن جازيرا جاپپارقۇل جاقسى كورسەتكىشىمەن جاۋاپ بەردى. قازاقتىڭ قاراتورى قىزى تورتكۇل دۇنيەگە ءوز ەسىمىن ايگىلەدى. تەك ءوز ەسىمىن عانا ەمەس، قازاق قىزدارىنىڭ قۇدىرەتىن سەزىندىردى. سەبەبى، جازيرانىڭ كۇمىسى التىنعا بەرگىسىز ەدى. قازاق قىزدارى اراسىنان تۇڭعىش رەت وليمپيادا جۇلدەگەرى اتانىپ، ەسىمى تاريح بەتتەرىنە التىن ارىپتەرمەن جازىلدى.

 بۇگىن بارشا قازاق ەلى كوگىلدىر ەكرانعا كوز تىگىپ، جازيرانىڭ جارىسقا شىعاتىن ۋاقىتىن اسىعا كۇتتى. ال جازيرا سول جانكۇيەردىڭ ءۇمىتىن تولىعىمەن اقتادى. ول قوسسايىستىڭ قورىتىندىسى بويىنشا 259 كەلى زىلتەمىردى باسىنان اسىرا كوتەرىپ، ريو وليمپياداسىنىڭ كۇمىس مەدالىن ەنشىلەدى.

ال ەكىنشى اۋىر اتلەتىمىز 77 كەلىگە دەيىنگى سالماقتا ونەر كورسەتكەن نيجات راحيموۆ جازيرادان كەيىن كوپ ۇزاماي جارىس جولىنا شىعىپ، قازاقستان قورجىنىنا العاشقى التىن جۇلدەنى سالدى. كەشە الەكسەي ني «ەرتەڭ 1 التىن، 1 كۇمىس الامىز» دەپ سۇحبات بەرىپ ەدى. سوزىندە تۇردى. ايتقانى كەلدى.

كۇتپەگەن ولجا

بۇگىن ءجۇزۋشى دميتري بالاندين 200 مەتردەن التىن الادى دەپ ەشكىم كۇتپەگەنى انىق. ءتىپتى، كوپ ادامدار ۇزدىك ۇشتىككە دە ىلىنەدى دەپ ويلاعان جوق. ريودا ءتۇن قاراڭعىلىعى قويۋلانا باستاعاندا، «بالاندين التىن الدى» دەگەن ءسۇيىنشى حابار اسپاندى نۇرلاندىرىپ جىبەرگەندەي بولدى. سەبەبى، ءجۇزۋ سپورتىنان بۇعان دەيىن ەشكىم وليمپيادا ويىندارىندا مەدال الىپ كورمەگەن ەدى. ال دميتري بالاندين سول ولقىلىقتىڭ ورنىن تولتىردى. سونىمەن بۇگىن كۇتپەگەن جەردەن سۋعا براسس ادىسىمەن ءجۇزۋشى دميتري بالاندين قورجىنىمىزعا ەكىنشى التىندى سالدى.

وسى جەتىستىكتەردەن كەيىن، قازاقستان قۇراماسى جالپى ەسەپتە كەشەگى 31-ورىننان بىردەن 11-ورىنعا ءبىراق كوتەرىلدى.

ليەۆيتتىڭ قارقىنى قاتتى، ءبىرجان جارىستى اياقتادى

بۇگىن ەكى بوكسشىمىز شارشى الاڭعا كوتەرىلدى. ونىڭ العاشقىسى وسى وليمپيادا ويىندارىنداعى سالماعى ەڭ جەڭىلى بولسا دا، جاسى ەڭ ۇلكەنى ءبىرجان جاقىپوۆ بولاتىن. سونداي- اق، بوكسشىلاردىڭ ىشىندەگى عانا ەمەس، جالپى سپورتشىلاردىڭ اراسىنداعى ەڭ كوپ وليمپياداعا قاتىسقان تاجىريبەلى سپورتشى دا وسى ءبىرجان ەدى. ول وسىعان دەيىن 2008 -جىلى بەيجىڭ، 2012 -جىلى لوندون وليمپياداسىنا قاتىستى. بۇل ريو ونىڭ ءۇشىنشى وليمپياداسى ەدى. سوندىقتان بولار، بوكس جانكۇيەرلەرى بيىل ءبىرجاننان كەمىندە قولا مەدال كۇتكەنى انىق. وكىنىشكە قاراي، بۇل بوكسشىمىز وسىمەن ءۇشىنشى وليمپياداسىندا شيرەك فينالدان ارى اسا المادى. بۇگىن ول وزبەك بوكسشىسى حاسانبوي دۋسماتوۆتان ۇتىلىپ قالدى. بۇل ءبىرجاننىڭ ەڭ سوڭعى وليمپياداسى بولارى ءسوزسىز. ەندى جولىن وزىنەن كەيىنگى جاستارعا تاپسىرادى دەگەن ۇمىتتەمىز...

 سونداي- اق، بۇگىن 91 كەلىدەگى ۆاسيلي ليەۆيت شارشى الاڭعا ەكىنشى مارتە كوتەرىلدى. ول شيرەك فينالدا ماۆريكيلىك كەننەدي سەن پەردى جەڭىپ، جارتىلاي فينالعا جولداما الدى. ءبىرىنشى راۋندتان باستاپ، ۆاسيلي ليەۆيت تىزگىندى ءوز قولىندا ۇستادى. ەسەپ - 3:0 (30:27, 30:27, 30:27. ناتيجەسىندە ۆاسيلي ليەۆيت ريو وليمپياداسىنىڭ جارتىلاي فينالىنا ءوتتى. مىنە، بۇل ءتورتجىلدىق دودانىڭ جەڭىس تۇعىرىنا شىعۋعا ءبىر باسپالداق قالدى دەگەن ءسوز. قازىرگە قارقىنى جامان ەمەس. ليەۆيت قورجىنعا ءبىر مەدال سالدى. ول العاشقى كەزدەسۋىندە قىتايلىق يۋي فەنكايدى اياماي ساباپ، جارىس جولىنان شىعارعان بولاتىن.

قۇرالايدى كوزگە اتقان قازاقتىڭ ۇرپاعىمىز دەپ ماقتانىپ جۇرسەك...

بۇگىن تاپانشامەن نىسانانى اتۋ سايىسىنان دا ەل نامىسى سىنعا ءتۇستى. وندا «قۇرالايدى كوزگە اتقان قازاقتىڭ ۇرپاعىمىز» دەپ ماقتاناتىن ەلدىڭ سپورتشىلارى كوڭىلگە قونىمدى ناتيجە كورسەتە المادى. ءبىزدىڭ ەلدىڭ اتىنان سىنعا تۇسكەن راشيد يۋنۋسمەتوۆ پەن ۆلاديمير يساچەنكو جارىستى تىم ەرتە اياقتادى. 50 مەتردە تاپانشادان وق اتۋ سايىسىنىڭ ىرىكتەۋ كەزەڭىندە ەكى سپورتشى دا مەجەلەگەن ۇپايدى جيناي المادى. راشيد يۋنۋسمەتوۆ 553 ۇپايمەن 13- ورىنعا تابان تىرەسە، ەكىنشى مەرگەنىمىز ۆلاديمير يساچەنكو 536 ۇپايمەن 36- ورىننان ارەڭ كورىندى.

بابالارىمىز ات ۇستىندە شاۋىپ كەلە جاتىپ، ساداق اتتى دەسە كىم سەنەدى؟ ءبىزدىڭ بابالارىمىز مەرگەن بولعان. ات ۇستىندە شاۋىپ كەلە جاتىپ، ساداق اتتى دەپ ماقتانساق، بۇدان بىلاي ەشكىم سەنبەسى انىق. وعان بۇگىن كۋا بولعاندايمىز. ساداق اتۋ جەكە سايىسىندا سىنعا تۇسكەن قازاقستاندىق سپورتشى لۋيزا سايديەۆا دا العاشقى اينالىمنان وتە المادى. ول ساداق اتۋ سايىسىنىڭ 1/32 فينالىندا ۋكراينالىق اناستاسيا پاۆلوۆادان جەڭىلىپ قالدى. ەسەپ 0:6. وسىلايشا، جەرلەمەسىز ريو وليمپياداسىن جۇلدەسىز اياقتاۋعا ءماجبۇر بولدى.

ۆەلو سپورتتان دا ءۇمىتىمىز ءۇزىلدى

بۇگىن ۆەلوشابوندوز اندرەي زەيتس الاماندا وليمپيادا ويىندارىن نەبارى 24-ورىندا اياقتادى. ۆەلوسپورتتان وتكەن سايىستا اندرەيگە 54,5 قاشىقتىقتى باعىندىرۋ قيىنعا ءتۇستى. ول وسى قاشىقتىقتى 1:18:47 ۋاقىتپەن ءجۇرىپ ءوتىپ، جالپى ەسەپتە مارە سىزىعىن 24- بولىپ كەستى.

قىلىش الىپ جاۋعا شاپقان ەلدىڭ ۇرپاعى سەمسەرلەسۋدەن دە ۇتىلىپ قالدى

بۇگىن سەمسەرلەسۋدەن سىنعا تۇسكەن وتانداسىمىز يليا موكرەتسوۆ 1/16 فينلدا امەريكالىق دەريل گومەرمەن كەزدەسىپ، قارسىلاسىنا جول بەردى. ا ق ش سپورتشىسىنا 11:15 ەسەبىمەن جەڭىلگەن ازاماتىمىز ريو وليمپياداسىنداعى جارىسىن جۇلدەسىز اياقتادى. قىلىش الىپ جاۋعا شاپقان ەلدىڭ ۇرپاعى سەمسەرلەسۋدەن العاشقى اينالىمنان وتپەي جاتقانى كوڭىلگە كىربىڭ ۇيالاتارى ءسوزسىز. وسىلايشا، بۇگىن قۋانىشقا دا، كوڭىل تولماس كورسەتكىشتەرگە دە كۋا بولدىق. ەندى ەرتەڭگى كۇنىمىز دە جەڭىستەرگە تولى بولسىن دەپ تىلەيىك.

اۆتور: كۇنسۇلتان وتارباي

سوڭعى جاڭالىقتار