08:01, 11 - تامىز 2016 | GMT +5
ريو-2016: ءبىرجان جاقىپوۆ وزبەك بوكسشىسىنان جەڭىلىپ قالدى
ريو- دە- جانەيرو. قازاقپارات - بۇگىن ريو- دە- جانەيرودا ءوتىپ جاتقان 31 - وليمپيادا ويىندارىندا شيرەك فينالدا 49 كەلىدە بوكستاسقان ءبىرجان جاقىپوۆ وزبەك بوكسشىسىنان جەڭىلىپ قالدى.

بۇل تۋرالى ريوداعى قازاقپارات ءتىلشىسى حابارلادى.
ءبىرجان جاقىپوۆ وزبەك بوكسشىسى حاسانباي دۋسماتوۆتان ايلاسىن اسىرا المادى. ەسەپ 0:3.
ءبىرجان وسىعان دەيىن ناميبيالىق ماتتياس حامۋنەلمەن جۇدىرىقتاسىپ، ونى ايقىن باسىمدىلىقپەن ۇتقان بولاتىن. وكىنىشكە قاراي، بۇگىن وزبەك بوكسشىسىنا شاماسى جەتپەدى.
بۇل ءبىرجاننىڭ قاتىسىپ جاتقان ءۇشىنشى وليمپياداسى. ەر كەزەگى ۇشكە دەيىن دەپ بيىل قالايدا قازاقستان قورجىنىنا ءبىر مەدال سالادى دەپ ۇمىتتەنگەن بولاتىنبىز. الايدا ول ءۇمىتتى جەل ايداپ كەتتى.
ەستەرىڭىزگە سالا كەتەيىك، قازاق بوكسشىلارىنان وليمپيادانىڭ العاشقى كۇنى 60 كەلىدەگى بەرىك ءابدىراحمانوۆ ا ق ش بوكسشىسى كارلوس بال دەراستەن جەڭىلىپ قالعان بولاتىن. بۇگىن ەكىنشى بوكسشىمىز جارىس جولىنان شىعىپ قالدى.
اۆتور: كۇنسۇلتان وتارباي