ريو-2016: مىرزاعالي ايتجانوۆ ءتۇن ورتاسىندا بوكسشىلاردى شىعارىپ سالۋعا كەلگەن حالىققا ريزاشىلىعىن ءبىلدىردى

استانا. قازاقپارات - حالىقتىڭ بىزگە دەگەن ىقىلاسىنان قانشالىق ءۇمىت ارتىپ وتىرعانىن بايقادىم.

 بۇل تۋرالى بۇگىن بوكستان قازاقستان ۇلتتىق قۇراماسىنىڭ باس باپكەرى مىرزاعالي ايتجانوۆ بوكسشىلاردى برازيلياعا سالتاناتتى تۇردە شىعارىپ سالۋ راسىمىندە قازاقپارات تىلشىسىنە بەرگەن سۇحباتىندا ءمالىم ەتتى.

«ءبىز ەل نامىسىن قورعاۋعا وليمپياداعا بارا جاتىر دەگەندى ەستىپ، اۋەجايعا قانشاما حالىق جينالعانىن كورىپ تۇرمىن. بۇل بىرىنشىدەن بىزگە دەگەن حالىقتىڭ قۇرمەتى. ەكىنشىدەن حالىقتىڭ بىزگە دەگەن ىقىلاسى. وسىدان- اق، ەلىمىز بوكسشىلاردان قانشالىق ءۇمىت كۇتەتىنىن بايقاۋعا بولادى. بۇيىرتسا وسى سەنىمدى اقتاۋعا بار كۇشىمىزدى سالامىز»، - دەپ اتاپ ءوتتى باس باپكەر.

سونداي- اق، ءتۇن ۇيقىسىن ءتورت ءبولىپ، ءتۇن ورتاسىندا ارنايى شىعارىپ سالۋعا كەلگەن جانكۇيەرلەرگە العىسىن ءبىلدىردى.

«مەن ءوز اتىمنان جانە وسى قۇراماداعى بارلىق بوكسشىلاردىڭ اتىنان بىزگە اق جول تىلەپ، شىعارىپ سالۋعا كەلگەن بارلىق جانكۇيەرلەرگە، ب ا ق وكىلدەرىنە راحمەت ايتامىن. ال ءبىزدىڭ مىندەت ەل ءۇمىتىن اقتاپ، جوعارى جەتىستىكپەن ورالۋ»، - دەدى باس باپكەر.

ول برازيلياعا جاقسى دايىندىقپەن بارا جاتقانىن ايتتى.

«دايىندىعىمىز دا، كوڭىل كۇيىمىز دە جاقسى. بوكسشىلاردىڭ بارلىعى بابىندا. استاناداعى سوڭعى جاتتىعۋىمىز دا جاقسى ءوتتى. قانات يسلام شاقىرتقان ا ق ش بوكسشىلارى جانە ءوزىمىزدىڭ 2-3-نومەرلى بوكسشىلار جاتتىعۋلاردا جاقسى كومەكتەستى. ەندى ريوعا بارىپ، دايىندىعىمىزدى پىسىقتايمىز. بۇيىرسا، جىگىتتەرىمىز 6- تامىزدان باستاپ، شارشى الاڭعا شىعادى»، - دەدى باس باپكەر ايتجانوۆ.

بوكسشىلاردى استانا اۋە جايىنان اتتاندىرىپ سالۋعا بوكسشىلاردىڭ اعايىن- تۋىسى، دوس- جاراندارى جانە جەرگىلىكتى جانكۇيەرلەر مەن بىرگە ب ا ق وكىلەرى قاتىسىپ، ءسات- ساپار تىلەدى.

اۆتور: كۇنسۇلتان وتارباي