قازاق كينو ەكرانىندا 2016-جىلى قانداي جاڭا تۋىندىلار كورسەتىلەدى؟
سولاردىڭ اراسىنان 2015-جىلى باستاپ تۇسىرىلگەن، تەك 2016-جىلى كورسەتىلەتىن فيلمدەر تۋرالى توقتالماقپىز.
مەملەكەتىمىزدىڭ تاريحي مارتەبەسىن كوتەرگەن، قازاق حاندىعىنىڭ 550 جىلدىق مەرەي تويىنىڭ باستى تارتۋلارىنىڭ ءبىرى «قازاق ەلى» اتتى 10 سەريالى تاريحي كوركەم فيلم 2016-جىلدىڭ ناۋرىز ايىندا كورەرمەن نازارىنا ۇسىنىلادى دەپ كۇتىلۋدە. وسى تۋىندىنىڭ پروديۋسەرى ارمان اسەنوۆتىڭ ايتۋىنشا، تاريحي سەريالدىڭ باستاپقى بيۋدجەتى 5,5 ميلليارد تەڭگە بولعان. كەيىننەن سەناريدەگى قىسقارتۋلاردان سوڭ بيۋدجەتى 2 ميلليارد 167 ميلليون تەڭگە بولىپ تۇراقتانعان. جانە قوسىمشا قارجى كوزدەرىنەن دە اقشا تارتىلعان. ونىڭ سوزىنە قاراعاندا، بۇل كوپ سەريالى فيلمدى ءبىرىنشى بولىپ كورسەتۋگە «رەسەي»، «ءال-جازيرا»، «ءبىرىنشى ارنا»، «ن ت ۆ» تەلەارنالارى قىزىعۋشىلىق تانىتقان كورىنەدى.
ال بالالار ءۇشىن دە 2015-جىلدىڭ باستى جاڭالىعى قازاق حاندىعى تۋرالى «قازاق ەلى» انيماتسيالىق فيلمىنىڭ جاسالۋى بولدى. بۇل تۋىندىنىڭ تۇساۋكەسەرى 2016-جىلدىڭ قاڭتار ايىندا «قازاقستان» تەلەارناسىندا وتەدى دەپ كۇتىلۋدە. سونداي-اق، انيماتسيالىق فيلمدى الەمدىك پروكاتقا شىعارۋ دا جوسپارلانىپ وتىر.
سونداي-اق، ەلباسى نۇرسۇلتان ءابىش ۇلى نازاربايەۆتىڭ ومىرىنەن سىر شەرتەتىن «جۇلدىزدار وسىلاي جانعان ەدى» (تاك سلوجيليس زۆەزدى) دەپ اتالاتىن كوركەم ءفيلمنىڭ دە مونتاجداۋ جۇمىستارى 2016-جىلدىڭ اقپان ايىندا اياقتالىپ، ناۋرىز ايىندا كورەرمەن نازارىنا ۇسىنىلماق.
2015-جىلى «قازاقستان» ۇلتتىق تەلەارناسىنىڭ تاپسىرىسىمەن «جامبىل» اتتى 4 سەريالى تاريحي دراما تۇسىرىلگەن بولاتىن. كوزى تىرىسىندە-اق اتى اڭىزعا اينالعان، قازاق جىرىنىڭ دارابوزى، عاسىرعا جۋىق عۇمىر كەشكەن جامبىل اقىننىڭ ءومىر جولى مەن ونەرى وسى كوركەم تۋىندىدا سۋرەتتەلگەن. تاريحي دراما 2016-جىلدىڭ اقپان ايىندا، اقىننىڭ تۋعان كۇنى قارساڭىندا «قازاقستان» تەلەارناسىندا كورسەتىلمەك. فيلمنىڭ رەجيسسەرى - ءانۋار رايبايەۆ، سەناريىن جازعان - باقىتجان شورماقوۆ.
جاڭا جىلدىڭ باسىندا تەلەكورەرمەندەر دوستىق، ساتقىندىق جانە ماحابباتقا قۇرالعان «شىرعالاڭ» اتتى دەتەكتيۆتى درامانىڭ دا كۋاگەرى بولادى.
«شىرعالاڭ» - بۇگىنگى ءومىر تالاپتارىنا سايكەس، مەملەكەتتىك ورگان قىزمەتكەرلەرىنىڭ قالىپتاسۋى جانە كاسىبي ءوسۋى تۋرالى سىر شەرتەتىن دەتەكتيۆتى كينو جانرىندا تۇسىرىلگەن قازاقستاندىق كوركەم حيكايا. ءاربىر سەرياسى ءوز ىسىنە ۇلكەن جاۋاپكەرشىلىكپەن قاراپ، وزدەرىنە سەنىپ تاپسىرىلعان مىندەتتەردى قاۋىپسىزدىك پەن كەدەرگىگە قاراماستان ادالدىقپەن ورىندايتىن مەملەكەتتىك ورگان قىزمەتكەرلەرىنىڭ بەينەسىن اشادى. حيكايا كەيىپكەرلەرى قىلمىس قۇرىلىمىنىڭ شىرعالاڭدارىن شەشۋگە نەگىزدەلگەن ءتۇرلى وقيعالاردى باستان كەشىرەدى.
«شىرعالاڭ» حيكاياسىنىڭ العاشقى سەرياسىن 14- قاڭتار كۇنى ساعات 21:05 تە «قازاقستان» تەلەارناسىنان تاماشالاڭىزدار.
سونداي-اق، 2016-جىلى كومپوزيتور ءشامشى قالداياقوۆ تۋرالى تەليەۆيزيالىق سەريال تۇسىرىلەدى. بۇل تۋرالى «حابار» اگەنتتىگى» ا ق باسقارما ءتوراعاسى ايدوس ۇكىباي ءمالىم ەتتى.
