قازاقستاندىقتار 2016-جىلدىڭ قاڭتارىنان باستاپ جوعارىلاتىلعان زەينەتاقى مەن جاردەماقى الا باستايدى

استانا. قازاقپارات - 2016-جىلدىڭ 1- قاڭتارىنان باستاپ ىنتىماقتى زەينەتاقى تولەمى 9 پايىزعا، مۇگەدەكتىك، اسىراۋشىسىنان ايىرىلۋ جاعدايى بويىنشا جانە جاسىنا بايلانىستى مەملەكەتتىك الەۋمەتتىك جاردەماقىلار مولشەرى 7 پايىزعا ۇلعايتىلاتىن بولادى.

بۇل تۋرالى قازاقستان رەسپۋبليكاسى دەنساۋلىق ساقتاۋ جانە الەۋمەتتىك دامۋ مينيسترلىگىنىڭ باسپا ءسوز قىزمەتى حابارلادى.

قازاقستان رەسپۋبليكاسىنىڭ زەينەتاقى جۇيەسىن ودان ءارى جاڭعىرتۋدىڭ 2030-جىلعا دەيىنگى تۇجىرىمداماسىندا ىنتىماقتى زەينەتاقى تولەمى مولشەرىنىڭ جىل سايىن ينفلياتسيا دەڭگەيىنەن ەكى پايىزعا ىلگەرىلەپ، يندەكستەلۋى قاراستىرىلادى.

اعىمداعى جىلعى 29- تامىزداعى رەسپۋبليكالىق بيۋدجەتتىك كوميسسيانىڭ وتىرىسىندا ماقۇلدانعان الەۋمەتتىك-ەكونوميكالىق دامۋ بولجامىنا سايكەس، تۇتىنۋ باعاسىنىڭ يندەكسى 6-8 پايىزدى قۇرادى. سول سەبەپتى كەلەسى جىلدىڭ قاڭتار ايىنان باستاپ ىنتىماقتى زەينەتاقى تولەمىنىڭ مولشەرى 9 پايىزعا ارتاتىن بولادى (7 پايىز - ينفلياتسيانىڭ ورتاشا دەڭگەيى جانە 2 پايىز- ىلگەرىلەۋ).

سونىمەن قاتار، بازالىق زەينەتاقى تولەمى «2016-2018-جىلدارعا ارنالعان رەسپۋبليكالىق بيۋدجەت تۋرالى» ق ر زاڭىمەن 11965 تەڭگە كولەمىندە بەلگىلەندى، ەڭ تومەنگى زەينەتاقى مولشەرى - 25824 تەڭگە بولدى. وسىلايشا، 2016-جىلى زەينەتاقى تولەمىنىڭ تومەنگى مولشەرى (ەڭ تومەنگى زەينەتاقى مەن بازالىق زەينەتاقىنى قوسقاندا) 37789 تەڭگە بولادى.

مەملەكەتتىك الەۋمەتتىك جاردەماقى مولشەرى مۇگەدەكتىك بويىنشا ونىڭ سەبەبى مەن توبىنا بايلانىستى ەڭ تومەنگى كۇنكورىس دەڭگەيىنە (ءتيىستى قارجى جىلىنا ارنالعان «رەسپۋبليكالىق بيۋدجەت تۋرالى» ق ر زاڭىمەن بەلگىلەنەدى)؛ اسىراۋشىسىنان ايىرىلۋ جاعدايى بويىنشا - قاراۋىنداعى جانداردىڭ سانى مەن ەڭ تومەنگى كۇنكورىس دەڭگەيىنە؛ جاسىنا قاراي - تەك ەڭ تومەنگى كۇنكورىس دەڭگەيىنە تاۋەلدى بولادى.

2016-جىلدىڭ 1- قاڭتارىنان باستاپ مۇگەدەكتىك، اسىراۋشىسىنان ايىرىلۋ جاعدايى بويىنشا جانە جاسىنا بايلانىستى مەملەكەتتىك الەۋمەتتىك جاردەماقىلار مولشەرى ەڭ تومەنگى كۇنكورىس دەڭگەيىنىڭ وزگەرۋىنە بايلانىستى 7 پايىزعا ۇلعاياتىن بولادى.

سونىمەن قاتار، قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ 2014-جىلعى 17- قاڭتارداعى «قازاقستان جولى - 2050: ءبىر ماقسات، ءبىر مۇددە، ءبىر بولاشاق» اتتى قازاقستان حالقىنا جولداۋىنداعى تاپسىرمالاردى ورىنداۋ ماقساتىندا مۇگەدەكتىك پەن اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلار مولشەرى 2016-جىلدىڭ 1- قاڭتارىنان باستاپ تاعى 25 پايىزعا وسەدى.

ەڭبەككە جارامسىزدىق پەن اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك ساقتاندىرۋ قورىنان تولەنەتىن الەۋمەتتىك تولەمدەردىڭ كولەمى 7 پايىزعا ارتاتىن بولادى.

1№ جانە 2№ ءتىزىم بويىنشا ارنايى مەملەكەتتىك جاردەماقى مولشەرى ايلىق ەسەپتىك كورسەتكىشتىڭ ارتۋىنا بايلانىستى ۇلعاياتىن بولادى. 2016-جىلعى ا ە ك 2121 تەڭگەنى قۇراپ وتىر (2015-جىلى - 1982 تەڭگە).

ەستەرىڭىزگە سالا كەتەيىك، قازاقستاندا اعىمداعى جىلعى 1- جەلتوقسانداعى مالىمەتتەرگە سايكەس 1,9 ميلليونعا جۋىق زەينەتكەر بار، سونداي-اق، شامامەن 664,6 مىڭ ازامات جاردەماقى الىپ كەلەدى.