ساراپشىلار 2016-جىلى پاتەر ساتىپ العىسى كەلەتىندەرگە كەڭەس ايتتى
قازاقستان ريەلتورلارىنىڭ بىرىككەن اسسوتسياتسياسىنىڭ مۇشەسى، АН Arbat Real Estate ديرەكتورى مارينا گرۋشينا قالىپتاسقان جاعدايدا تاياۋ ۋاقىتتا جىلجىمايتىن مۇلىك باعالارىنىڭ قالاي وزگەرەتىنىن بولجاۋدىڭ قيىن ەكەنىن، ءبىراق باسپانانىڭ ەشقاشان تەگىن بەرىلمەيتىنىن ءتۇسىنۋ كەرەكتىگىن ايتتى. ساراپشى جاقسى ءارى جاڭا باسپانا الۋشىلارعا تاڭداۋ باردا ساۋدالاسۋ كەرەك دەپ كەڭەس بەردى.
مۇنىمەن قاتار، گرۋشينا جىلجىمايتىن مۇلىك باعالارىنىڭ كۇرت تومەندەۋىن جانە پاتەرلەردىڭ 2001-جىلعىداي 4000-5000 دوللار بولاتىنىن كۇتپەي-اق قويۋ كەرەكتىگىن اتاپ ءوتتى. الايدا ونىڭ ايتۋىنشا، ساتۋشىلارعا تاڭداۋ مەن ساۋدالاسۋ مۇمكىندىگى تۋىپ تۇر. «قازىرگى ۋاقىتتا ءۇي سالۋشىلار كوپ جاعدايدا ساتىپ الۋشىلارعا ءتۇرلى مۇمكىندىك جاساپ جاتىر. ال قولدانىستا بولعان ۇيلەرگە كەلسەك، اسىرەسە حرۋشيەۆتىڭ كەزىندەگى ۇيلەردىڭ باعاسى تومەندەيدى. قازىرگى تاڭدا ءبىر بولمەلى پاتەرلەردىڭ قۇنى 25-30 مىڭ دوللار. ءبىراق، ارينە، مۇنىڭ جاڭا باعامدى ەسەپتەۋ بويىنشا شىعىپ وتىرعانىن ۇمىتپايىق. وسى پاتەرلەردى ساتىپ الۋدا ءار ۋاقىتتا ساۋدالاسۋعا مۇمكىندىك بار. بۇل باعالار ەكى ەسە تومەندەيدى دەپ ايتا المايمىن، سەبەبى ساتۋشىلاردىڭ ساۋدا نارىعىنان جالعا بەرۋ سەكتورىنا كەتىپ جاتقانىن بايقاپ وتىرمىز. بۇل بولسا ءوز كەزەگىندە جالعا بەرۋ نارىعىنا اسەر ەتتى - باعالار تومەندەدى»، - دەدى ول.
«ستوليچنوە» كومپانياسىنىڭ ديرەكتورى جاني تۇرىسوۆ تا كەلەسى جىل ءۇي ساتىپ الاتىندارعا بىرنەشە كەڭەس بەردى. «بانكتە تەڭگەمەن اقشا جيناپ جاتقاندارعا ايتارىم، ساۋدانىڭ ءساتى ءتۇستى. ال باسپانا الۋعا دوللارمەن جينالعان قاراجاتى بارلارعا مىناداي كەڭەس بەرەمىن: قولدانىستا بولعان ءۇي العىلارىڭىز كەلسە ىزدەۋ مەن تاڭداۋعا كوپ ۋاقىت جۇمساڭىزدار، وزدەرىڭىز دە، كاسىبي ريەلتورلار ارقىلى ىزدەۋگە بولادى. ەگەر جاڭا ءۇي العىلارىڭىز كەلسە - تەڭگەمەن ءبولىپ تولەۋ جاعىن قاراستىرىڭىزدار. العاشقى جارنا سوماسى از بولعانى جاقسى. نەگە؟ سەبەبى باسقا باعامدا ءۇي سالۋشىعا جاڭا باعاممەن تولەيسىز دە، دوللارمەن جاسالعان جيناعىڭىزدى ساقتاپ قالاسىز. ال ءۇي العىسى كەلەتىن، ءبىراق قاراجاتى جوقتارعا ايتارىم، مەنىڭشە، ولار اقشا جيناسىن»، - دەدى تۇرىسوۆ.
ءوز كەزەگىندە، ونىڭ پىكىرىنشە، باسپانا جاعدايىن جاقسارتقىسى كەلەتىندەر ءوز پاتەرىن ساتىپ، جاڭا پاتەر الۋدا پايدا كورە الادى. «سەبەبى نارىق ءبىر قالىپتى ەمەس، بۇگىندە ءاربىر ساتۋشى نارىقتاعى جاعدايدى باعامداپ وتىرا المايدى. ءبىز ءوز جۇمىسىمىزدا مۇمكىندىكتى قالت جىبەرگەندەر مەن كەلىسىمدار اراسىندا قىرۋار پايدا تاۋىپ قالاتىنداردى كۇن سايىن كورەمىز. شامامەن وسىنداي كەستەنى ءوزىنىڭ ەسكى پاتەرىن ساتىپ، جاڭادان سوعىلعان ۇيلەردەن پاتەر العىسى كەلەتىندەرگە دە ايتۋعا بولادى. ءتىپتى بولماسا ءوزىنىڭ ەسكى ءۇيىن دوللارمەن ساتىپ، جاڭا ۇيدەن تەڭگەمەن ءبولىپ تولەۋگە پاتەر الۋعا بولادى»، - دەپ ءتۇسىندىردى ساراپشى.
قازاقستان ريەلتورلار قوعامدىق اسسوتسياتسياسىنىڭ ۆيتسە-پرەزيدەنتى نينا لۋكيانەنكو جىلجىمايتىن مۇلىك نارىعىندا ءوتىپ بارا جاتقان جىلى بولعان وڭ اسەرلەردى ەسكە الدى. «بىرىنشىدەن، قۇرىلىس كومپانيالارى ساتىپ الۋشىلارعا باسپانا اقشاسىن ءبولىپ تولەۋگە ۇسىنىس جاسادى. سوڭعى بىرنەشە ايدا ءتىپتى ءتۇرلى نۇسقا دا پايدا بولدى - كەيبىر كومپانيالار ساتىپ الۋشىلارعا ءبولىپ تولەۋگە رۇقسات بەرىپ قانا قويماي، كىشىگىرىم سىياقىلار دا جاسادى. كەيبىرەۋلەرى 0 پايىز الدىن الا اقىسىز تولەمدى سوزدى»، - دەدى ساراپشى.
ونىڭ ايتۋىنشا، جاقىن ارادا ساتىپ الۋشىنى كەلىسىمگە كەلۋگە ىنتالاندىراتىن جاڭا ونىمدەر پايدا بولادى. وعان مىسال رەتىندە كەيىن ساتىپ الۋعا مۇمكىندىك بەرەتىن جالعا بەرۋ ءتۇرىن الۋعا بولادى. سونىمەن قاتار، ول جاڭا سالىنعان تۇرعىن ۇيلەردەن باسپانا ساتىپ الۋدى تۇتىنۋشىلاردىڭ اقشاسىنا قۇرىلىس جۇرگىزبەيتىن كومپانيالاردان الۋ قاۋىپسىز ەكەنىن ەسكەرتتى. قاىپسىز نۇسقالاردىڭ بىرىنە دايىن جىلجىمايتىن مۇلىكتى ساتىپ الۋ نەمەسە قۇرىلىس اياقتالىپ، ءۇي پايدالانۋعا بەرىلگەنگە دەيىن بۇعاتتا تۇراتىن ەسكروۋ-شوت اشۋ جولى جاتقىزىلدى.
جىلجىمايتىن مۇلىكتىڭ باعاسىنا كەلسەك، ونىڭ ايتۋىنشا، باعا ءوسۋى دە، تومەندەۋى دە مۇمكىن. «بيىل ينتەرنەتتە شىندىققا جاناسپايتىن حابارلامالار تولىپ كەتتى. دەگەنمەن ماماندار كەرىسىنشە دالەل ايتتى. مەن دە ءدال ۋاقىتىندا قيمىلداۋ كەرەك ەكەنىن ەسكەرتەمىن. ۇزاق ۋاقىت كۇتكەننەن، ەڭ تومەنگى باعاعا باسپانا ساتىپ الۋ مۇمكىندىگىن پايدالانۋ كەرەك»، - دەدى ساراپشى.
ونىڭ ايتۋىنشا، قازىر نارىق ءۇش بۋىنعا ءبولىندى. «ءبىرىنشى - قايتا باعالانعان قۇن، ياعني ادامدار ءوزىنىڭ جاعدايىنا بايلانىستى ەڭ قىمبات باعادا باسپانا الۋدى ارماندايدى. ەكىنشى - باعا جونىندە تۇتىنۋشىلارمەن وبەكتيۆتى تۇردە كەلىسىم جاساپ، جاعدايدى باعالاي الاتىن ساتۋشىلار پايدا بولدى. بۇل ساتۋشىلار ۇسىنعان مەزانيزمدەر - باعاعا جەڭىلدىك نەمەسە اكسيالاردى پايدالانۋ ارقىلى ءتيىمدى باعادا ساتىپ الۋ. ءۇشىنشى - ەڭ تومەنگى باعادان ءوتىپ، قىمباتتاپ جاتقان جىلجىمايتىن مۇلىكتەر. الماتىدا بيزنەس جانە ەكونوم سەگمەنتىندەگى نىساندار پايدا بولا باستادى. جىلجىمايتىن مۇلىك باعاسى ءالى دە وزگەرىپ جاتىر - دوللار ەكۆيۆالەنتىندە تومەنگە، تەڭگەدە جوعارى قاراي»، - دەدى لۋكيانەنكو.
