ۇلەسكەرلەر ماسەلەسى 2016-جىلى تۇپكىلىكتى شەشىلەتىن بولادى
ۆيتسە-ءمينيستردىڭ دەرەكتەرىنە سۇيەنسەك، 2007-جىلعى داعدارىس بارىسىندا ەلىمىزدە 450 تۇرعىن ءۇي كەشەندەرى قۇرىلىس بارىسىندا توقتاپ قالعان. سونىڭ سالدارىنان 68117 ۇلەسكەر جاپا شەككەن. كەيىننەن مەملەكەت بۇل ىسكە ارالاسىپ، ءتيىستى شەشىمدەر قابىلدادى.
«ناتيجەسىندە بارلىق ماسەلە شەشىمىن تاۋىپ جاتىر. قازىر 2097 ۇلەسكەر قاتىساتىن 16 جوبا پروبلەمالى كۇيىندە تۇر. ءبىز بۇل ماسەلەنى ۇدايى باقىلاۋدا ۇستاپ كەلەمىز. سونىڭ ىشىندە 9 جوبانىڭ قۇرىلىسى جاقىن ارالىقتا اياقتالادى. 7 نىساننىڭ قۇرىلىسى ءجۇرىپ جاتىر، بارلىق ماسەلەلەر 2016-جىلدىڭ ءبىرىنشى توقسانىنا قاراي شەشىمىن تاپپاق»، - دەدى ۆيتسە-مينيستر.
ونىڭ ايتۋىنشا، 2007-جىلعى داعدارىستان كەيىن ۇلەستىك قۇرىلىس تۋرالى زاڭ 2010-جىلى قابىلدانىپ، وندا ۇلەسكەرلەر قاراجاتىن تارتۋعا قاتاڭ شارالار قابىلدانعان.
«سول جىلدان بەرى ۇلەستىك قۇرىلىس بويىنشا ءبىر عانا ليتسەنزيا بەرىلگەنىمەن، ول پايدالانىلماي قالدى. سوندىقتان دا، ماماندار مۇنداي مەحانيزم قۇرىلىس سالۋشىلار ءۇشىن قىزىقسىز ەكەنىن العا تارتادى. ال كەرىسىنشە، ۇلەستىك قاتىسۋعا قاراپايىم ازاماتتار تاراپىنان قىزىعۋشىلىق جوعارى بولىپ وتىر»، - دەيدى ق. وسكەنبايەۆ.
اۆتور: قانات مامەتقازى ۇلى
