اقمولا وبلىسىندا 2016 - جىلدىڭ ءبىرىنشى توقسانىندا 96 ادام مەملەكەتتىك قىزمەتكە سىناق مەرزىمىمەن قابىلداندى- ە. جايىقبايەۆ
مەملەكەتتىك قىزمەتكە قابىلداۋ تومەنگى لاۋازىمداردان باستالۋى جانە تومەنگى لاۋازىمدارعا كانديداتتاردى رەتتەۋ جانە ودان ءارى لاۋازىمدىق ءوسۋ ىسكەرلىك قاسيەتتەر نەگىزىندە جۇزەگە اسىرىلۋى ءتيىس دەپ ايتىلعان بولاتىن.
بۇگىنگى كۇنى بۇل باعىتتا قولعا الىنعان جۇمىستار اقمولا وبلىسىندا دا ويداعىداي جۇزەگە اسىرىلىپ جاتىر. بۇل تۋرالى مەملەكەتتىك قىزمەت ىستەرى مينيسترلىگى اقمولا وبلىسى بويىنشا دەپارتامەنتى باسشىسىنىڭ ورىنباسارى ەرلاز جايىقبايەۆ ءتۇسىندىرىپ بەردى.
ونىڭ ايتۋىنشا، «ۇلت جوسپارى - 100 ناقتى قادام» ستراتەگياسىنداعى مىندەتتەردى جۇزەگە اسىرۋ ماقساتىندا ۇستىمىزدەگى جىلدىڭ 1 - قاڭتارىنان باستاپ قازاقستان رەسپۋبليكاسىنىڭ «مەملەكەتتىك قىزمەت تۋرالى» جاڭا زاڭى قولدانىسقا ەنگىزىلگەن بولاتىن. ول كادرلاردى ىرىكتەۋدىڭ جەتىلدىرىلگەن تاسىلدەرىن ەنگىزۋ ارقىلى مەملەكەتتىك قىزمەتتىڭ كادرلىق قۇرامىن ساپالى جاقسارتۋدى، مانساپتىق جوعارىلاتۋ مەن كاسىبي دايىندىقتى كوزدەيدى.
«مەملەكەتتىك باسقارۋشىلار قاتارىنا بارىنشا بىلىكتى، ءوز مىندەتتەرىن تياناقتى، ءارى ادال اتقاراتىن مامانداردى تارتۋ ماقساتىندا اتالعان زاڭنىڭ نەگىزىنە مەريتوكراتيا قاعيداتى ەنگىزىلگەن. مەملەكەتتىك قىزمەت پەن ونىڭ تۇراقتىلىعىنىڭ سەرپىندىلىگى اراسىنداعى تەڭگەرىم انىقتالىپ، زاڭدى تۇردە بەكىتىلدى. مەملەكەتتىك مەكەمەنىڭ باسشىسى اۋىسا قالعان جاعدايدا ۇجىمداعى باسقا دا قىزمەتكەرلەردىڭ توپتىق الماستىرىلۋى قاتاڭ تۇردە تەك بايقاۋ وتكىزۋ ارقىلى جۇزەگە اسادى، سونداي- اق، ءبىر قىزمەتتەن ەكىنشىسىنە اۋىسۋ تارتىبىندە تاعايىنداۋلار ۇلەسى مەيلىنشە قىسقارتىلدى.
جاڭا زاڭ اشىق باسەكەلەستىك پەن ىرىكتەۋ قاعيداتى نەگىزىندە مەملەكەتتىك قىزمەتكە جۇمىسقا ورنالاسۋ مۇمكىندىگىن بۇرىنعىدان دا كۇشەيتە ءتۇسىردى. بايقاۋدىڭ بارلىق كەزەڭى، عالامتور رەسۋرستارىندا حابارلاندىرۋلاردى جاريالاۋدان باستاپ، كوميسسيا وتىرىسىنا بايقاۋشىلاردى، ساراپشىلاردى شاقىرۋ، ىرىكتەۋ قورىتىندىلارىن ورنالاستىرۋعا دەيىن بارلىعى ءادىل وتەدى. ەندىگى كەزەكتە مەملەكەتتىك قىزمەتكە كىرۋ تەك جۇيەلى ىرىكتەۋدىڭ ناتيجەسىندە عانا مۇمكىن، ءارى ول تومەنگى لاۋازىمداردان باستالادى. اكىمشىلىك مەملەكەتتىك قىزمەتشىنىڭ مانسابىنىڭ جوعارىلاۋى ونىڭ قۇزىرەتى مەن جيناعان تاجىريبەسىنە بايلانىستى»، - دەيدى ە. جايىقبايەۆ.
سونىمەن قاتار، ول وبلىس اۋماعىندا مەملەكەتتىك قىزمەتكە قابىلداۋ بويىنشا جۇرگىزىلىپ جاتقان ناقتى شارالارعا توقتالدى.
«جىل باسىنان بەرى وبلىسىمىزدىڭ مەملەكەتتىك ورگاندارى 37 ىشكى جانە 24 جالپى كونكۋرس جاريا ەتسە، سونىڭ ىشىندە بۇگىنگى تاڭدا جوعارى لاۋازىمدارعا 12 ىشكى كونكۋرس اياقتالىپ، 20 مەملەكەتتىك قىزمەتشى جەڭىمپاز دەپ تانىلدى. بارلىق كونكۋرستار جاڭا زاڭ اياسىندا بايقاۋشىلاردىڭ قاتىسۋىمەن ءوتتى.
جوعارىدا اتاپ وتكەنىمىزدەي، مەملەكەتتىك قىزمەتكە جاڭادان ورنالاسۋشى تۇلعالار قىزمەتتەرىن تومەنگى لاۋازىمداردان جانە سىناق مەرزىمىمەن باستايدى. ماسەلەن، ۇستىمىزدەگى جىلدىڭ ءبىرىنشى توقسانىندا 96 ادام مەملەكەتتىك قىزمەتكە سىناق مەرزىمىمەن قابىلداندى. سالاعا العاش كەلگەن 71 مامان تالىمگەرلەرگە بەكىتىلدى. مەملەكەتتىك مەكەمەلەردىڭ جولداماسىمەن 56 مەملەكەتتىك قىزمەتشى كاسىبي بىلىكتىلىكتەرىن ارتتىرۋ ءۇشىن ارنايى تاعىلىمدامادان ءوتتى.
«مەملەكەتتىك قىزمەت تۋرالى» زاڭ قاعيداتتارىنىڭ ءبىرى - مەملەكەتتىك قىزمەتشىلەردى ۇزدىكسىز وقىتۋ جانە قاجەتتى قۇزىرەتتىلىكتەرىن دامىتۋ. 2016 -جىلدىڭ ءۇش ايىندا 216 مامان وقۋعا جىبەرىلىپ، سونىڭ ىشىندە 123- ى بىلىكتىلىكتەرىن ارتتىرسا، 93 قىزمەتشى قايتا دايارلاۋ كۋرستارىنا قاتىستى. وسى سەكىلدى جىل باسىنان بەرى اتقارىلعان ىستەر وتە كوپ. مۇنىڭ بارلىعى قولدانىستاعى جاڭا زاڭنىڭ ءتيىمدى تۇستارى دەپ اتاپ كورسەتۋگە بولادى»، - دەيدى ەرلاز جايىقبايەۆ.
اۆتور: اسلان وسپانوۆ
