ريو-2016 ءۇمىتى: ۆاسيلي لەۆيت - 91 كەلى سالماقتا وليمپيادادا ونەر كورسەتەتىن قازاقستاننىڭ تۇڭعىش بوكسشىسى

استانا. قازاقپارات - ريو وليمپياداسىنىڭ باستالۋىنا 27 كۇن قالدى. بيىل بوكستان قازاقستان ۇلتتىق قۇراماسى وليمپيادا ويىندارىنا تۇڭعىش رەت تولىق قۇراممەن بارا جاتقانىن وسىعان دەيىن ايتىپ وتكەنبىز.

وسىعان دەيىن قازاق بوكسشىلارىنىڭ وليمپيادا ويىندارىنا بارۋعا ۇستاتپاي جۇرگەن 91 كەلى سالماق دارەجەسىندەگى جولدامانى بيىل وتانداسىمىز ۆاسيلي لەۆيت قانجىعاسىنا بايلاپ، تاۋەلسىز قازاق ەلى اتىنان وسى سالماقتا تۇڭعىش رەت وليمپيادا ويىندارىندا ونەر كورسەتۋ قۇقىعىنا يە بولدى.

91 كەلى سالماقتا قازاقستان بوكسشىلارى وليمپياداعا بارماعانىن ەسكەرسەك، ۆاسيلي لەۆيتتىڭ جولداماسى ءبىز ءۇشىن وتە قۇندى. قازاقستان تاۋەلسىزدىك العالى بەرى 91 كەلىدەگى بوكسشىلارىمىز وليمپ شىڭىن باعىندىرۋعا قانشا تالپىنسا دا، ءتورتجىلدىقتىڭ باستى دوداسىنا جولدارى تۇسپەپ ەدى.

ۆاسيلي لەۆيتتىڭ لوندون وليمپياداسىنا بارۋعا مۇمكىندىگى بولعان... الايدا، «قىرسىق ءبىر اينالدىرسا، شىر اينالدىرادى» دەگەندەي لەۆيت استانادا وتكەن ىرىكتەۋ تۋرنيرىندە جەڭىلىس تاۋىپ، وليمپياداعا باراتىنداردىڭ قاتارىنا كىرە المادى. ەندى، مىنە، ۆاسيا وسىدان ءتورت جىل بۇرىن جىبەرگەن قاتەلىگىن تۇزەپ، قازاقستان بوكسشىلارى اراسىنان ەكىنشى بولىپ، وليمپيادا ويىندارىنا جولداما الدى.

ۆاسيلي لەۆيت بۇكىل الەمدىك بوكس سەرياسىنىڭ «استانا ارلارندارى» قۇرامىندا ونەر كورسەتىپ، «ارگەنتينا كوندورسپەن» بولعان كەزدەسۋدە قارسىلاسىن تەحنيكالىق نوكاۋتپەن ۇتتى. سونىڭ ناتيجەسىندە ول WSB- ءدىڭ جەكە رەيتينگتىك كورسەتكىشى بويىنشا تۇراقتى ماۋسىمدا ءبىرىنشى ورىن الدى. ءسويتىپ، ريو-دە-جانەيرو وليمپياداسىنا بەرىلەر جولدامانى يەمدەندى.

ۆاسيلي لەۆيت

تۋعان كۇنى/جىلى: 24.02.1988

تۋعان جەرى: قوستاناي وبلىسى

سالماعى: 91 كەلى

جەتىستىكتەرى:

2009, 2011 -جىلدارى قازاقستان چەمپيونى؛

2009-جىلى ازيا چەمپيونى؛

بىرنەشە حالىقارالىق تۋرنيرلەردىڭ جەڭىمپازى؛

WSB جوباسى اياسىندا ءوز سالماعى بويىنشا كوش باستاپ، وليمپيادا-2016 جولداماسىنا يەلىك ەتتى.

ەندى ۆاسيلي لەۆيت ءوزى تۇڭعىش قاتىسقالى وتىرعان وليمپياداسىندا قازاقتىڭ تۋىن جەلبىرەتىپ، ءان ۇرانىن اسقاقتاتىپ قايتادى دەگەن ۇمىتتەمىز.

اۆتور: كۇنسۇلتان وتارباي