وڭتۇستىكتە 2016 -جىلى 765 ەگىز نارەستە دۇنيەگە كەلدى

استانا. قازاقپارات - وڭتۇستىك قازاقستان وبلىسىندا جىل سايىن دەموگرافيالىق پوتەنتسيال ارتىپ، انا مەن بالا ءولىمى ازايىپ كەلەدى.

ماسەلەن، 2016 -جىلى وڭىردە جالپى  79195 نارەستە دۇنيە ەسىگىن اشتى، ونىڭ 765- ءسى ەگىز بولسا، 5-ەۋى - ۇشەم، دەپ حابارلايدى قازاقپارات وبلىس اكىمدىگىنىڭ باسپا ءسوز قىزمەتىنە سىلتەمە جاساپ.

 ەلىمىزدەگى ءاربىر بەسىنشى بالا وڭتۇستىك قازاقستاندا ومىرگە كەلسە، سونىڭ ىشىندە بالا تۋۋدىڭ ەڭ جوعارى كورسەتكىشى بويىنشا شىمكەنت قالاسى الدا تۇر. وتكەن جىلى قالادا  36191 بالا دۇنيەگە كەلگەن. ال، وبلىس اۋداندارىنىڭ اراسىندا بالا تۋۋ سانى جاعىنان تۇركىستان قالاسى الدىڭعى ورىندى يەلەنىپ وتىر، وندا وتكەن جىلى 8742 ءسابي دۇنيەگە كەلدى. ودان كەيىنگى ورىندا ماقتارال اۋدانى تۇر - 7880 شاقالاق. ال، سارىاعاش اۋدانىندا 7425 نارەستە دۇنيەگە كەلگەن.

ەلىمىز تاۋەلسىزدىگىن العاننان كەيىن دەنساۋلىق ساقتاۋ سالاسىن قارجىلاندىرۋدى ارتتىرۋ ەسەبىنەن جاڭا مەديتسينالىق مەكەمەلەر سالىندى. ماتەريالدىق- تەحنيكالىق جابدىقتاۋ جاقساردى. زاماناۋي قۇرال- جابدىقتار مەن قوندىرعىلار وبلىس ورتالىعىندا عانا ەمەس، اۋداندار مەن قالالاردا ورناتىلدى. وسىنىڭ ناتيجەسىندە، وڭىردە انا مەن بالا ءولىمى ازايىپ، تۋۋ كورسەتكىشى ارتىپ كەلەدى.

2015 -جىلى وڭتۇستىك قازاقستان وبلىسىندا  79125 ءسابي دۇنيەگە كەلدى.