قازاقستان 2016-جىلى 6,27 ميلليارد تەڭگەگە عارىش سۋرەتتەرىن تۇسىرگەن
بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگتە ق ر ينۆەستيتسيالار جانە دامۋ مينيسترلىگى اۋەعارىش كوميتەتىنىڭ ءتوراعاسى ەركىن شايماعامبەتوۆ ءمالىم ەتتى.
«2016-جىلدان باستاپ، رەسپۋبليكالىق بيۋدجەت اياسىندا مەملەكەتتىك ورگاندارمەن جانە ۇيىمدارمەن جەردى قاشىقتىقتان زوندتاۋ جۇيەسى ارقىلى عارىشتان تۇسىرىلگەن سۋرەتتەر تەگىن بەرىلۋدە. 1- قىركۇيەكتەگى جاعداي بويىنشا، اعىمداعى جىلى عارىشتان 10 ميلليون شارشى شاقىرىم جەر تۇسىرىلگەن. ولاردىڭ كوممەرتسيالىق قۇنى 6,27 ميلليارد تەڭگە»، - دەدى شايماعامبەتوۆ.
ونىڭ ءسوزى بويىنشا، 2015-جىلى قۇرىلعان ق ر جەردى قاشىقتىقتان زوندتاۋ عارىش جۇيەسى اۋىل شارۋاشىلىعى، گەودەزيا، ەكولوگيالىق زەرتتەۋلەر ماقساتتارىنا جانە توتەنشە جاعدايلار كەزىندە جەدەل ءارى ساپالى سۋرەتتەردى الۋعا مۇمكىندىك بەردى.
«جالپى جۇيە ىسكە قوسىلعالى بەرى 280 ميلليون شارشى شاقىرىم جەر سۋرەتكە ءتۇسىرىلدى. سونىمەن قاتار مەملەكەتتىك ورگاندارعا 7,4 ميلليون شارشى شاقىرىم جەردىڭ سۋرەتتەرى تەگىن تاپسىرىلدى. ولاردىڭ نارىقتىق قۇنى شامامەن 5,4 ميلليارد تەڭگەنى قۇرايدى»، - دەپ اتاپ ءوتتى كوميتەت باسشىسى.
سونىمەن قاتار ە. شايماعامبەتوۆتىڭ اقپاراتى بويىنشا، Kazsat عارىشتىق بايلانىس جۇيەسى 2011 جانە 2016-جىلدارى ارالىعىندا 15 بايلانىس وپەراتورى مەن قازاقستان ۇيىمىنا قىزمەت كورسەتكەن.
«5 جىل ىشىندە Kazsat جۇيەسى شەتەل وپەراتورلارىنىڭ قىزمەتىن الماستىرا الدى، ونىڭ يمپورت الماستىرۋ كولەمى شامامەن 18 ميلليارد تەڭگەنى قۇرايدى»، - دەپ ءتۇيدى ءسوزىن كوميتەت باسشىسى.
