07:51, 12 - قاڭتار 2017 | GMT +5
استانانىڭ 2016-جىلعى تۇزەتىلگەن بيۋدجەتى 433,5 ميلليارد تەڭگەنى قۇرادى
استانا. قازاقپارات - قازاقستان ەلورداسىنىڭ تۇزەتىلگەن بيۋدجەتى 2016-جىلى 433,5 ميلليارد تەڭگەنى قۇرادى، ونىڭ ىشىندە دامۋ بيۋدجەتى 210 ميلليارد تەڭگەنى نەمەسە %48,4 قۇرايدى.

بۇل تۋرالى اكىمدىكتە وتكەن كەڭەستە استانا قالاسىنىڭ اكىمى اسەت يسەكەشەۆ مالىمدەدى، دەپ جازادى astana.gov.kz.
ونىڭ ايتۋىنشا، ەكونوميكانىڭ ءوسىمى مەن ءتيىمدى سالىقتىق اكىمشىلەندىرۋ وتكەن جىلعى دەڭگەيدەگى 25 پايىزدىق وسىممەن جالپى سوماسى 1 تريلليون 64 ميلليارد تەڭگەنى قۇرايتىن مەملەكەتتىك بيۋدجەتتەگى ءتۇسىمنىڭ رەكوردتىق كولەمىن قامتاماسىز ەتتى. ونىڭ ىشىندە جەرگىلىكتى بيۋدجەتتىڭ ۇلەسى 216 ميلليارد تەڭگە (ءوسىم %13) بولدى.
سونىمەن قاتار، استانا قالاسىنىڭ جەكە كىرىس كولەمى 2016-جىلى بەكىتىلگەن ولشەمدەرگە سايكەس 28,4 ميلليارد تەڭگەگە ۇلعايدى، رەسپۋبليكالىق بيۋدجەتكە 17 ميلليارد تەڭگە الىم ءتۇستى.