ريو-2016: وليمپيادانىڭ ون ءتورتىنشى كۇنى قازاقستان قورجىنى 2 قولا مەدالمەن تولىقتى

بۇگىنگى كۇن دە تالاي تارتىستى جارىستارمەن ەستە قالدى. ەڭ باستىسى ريودا بوكسشىلارىمىز جارىستى تولىعىمەن اياقتادى. ناتيجە جامان ەمەس. الايدا، مىرزاعالي ايتجانوۆ كوزدەگەن ماقساتىنا جەتە المادى. ول وسىعان دەيىن ەكى التىن الامىز دەپ ۋادە بەرگەن بولاتىن. ناتيجەسىندە 1 التىن، 2 كۇمىس، 1 قولا مەدالمەن جارىستى اياقتادى.
بۇگىن بوكسشىلارىمىزدان ءبىرىنشى بولىپ، يۆان دىچكو شارشى الاڭعا شىقتى. ول جارتىلاي فينالدا ۇلىبريتانيا بوكسشىسى دجوزەف دجويستان ۇتىلىپ، قولا جۇلدەنى مىسە تۇتتى. وسىلايشا ەكى مارتە وليمپيادانىڭ قولا جۇلدەگەرى اتاندى. بۇعان دەيىن وتانداسىمىز لوندوندا تاعى دا جارتىلاي فينالدا قارسىلاسىنا جول بەرىپ، قولانى قاناعات تۇتقان بولاتىن.
ەستەرىڭىزگە سالا كەتەيىك، يۆان دىچكو شيرەك فينالدا نيگەريالىق ەفە ادجاگبادان باسىم ءتۇسىپ، جارتىلاي فينالعا جولداما العان ەدى. ونىڭ الدىنداعى العاشقى جەكپە- جەگىندە باستى قارسىلاسى ازەربايجاندىق موگامەدراسۋل مەدجيدوۆتى ەكىنشى راۋندتا تەحنيكالىق نوكاۋندپەن ۇتىپ، شيرەك فينالعا شىققان بولاتىن.
ال بۇگىنگى ەكىنشى قولا جۇلدە بوكستان 75 كەلى سالماقتاعى قىزدار اراسىنداعى داريعا شاكىموۆاعا بۇيىردى. ول جارتىلاي فينالدا امەريكالىق كلارەسسا شيلدستان ۇتىلىپ قالدى. ءبىراق، ەلىنە 9- قولا جۇلدەنى سىيلادى. شاكىموۆا ايگىلى قارسىلاسىمەن تەڭ دارەجەدە ونەر كورسەتتى. اسا تارتىستى وتكەن جەكپە- جەكتىڭ قورىتىندىسىندا تورەشىلەر شەشىمىمەن امەريكالىق بوكسشى قىز جەڭىمپاز دەپ تانىلدى. ناتيجەسىندە داريعا قازاق قىزدارى اراسىنان تۇڭعىش بوكستان وليمپيادا ويىندارىنىڭ جۇلدەگەرى اتاندى. شاكىموۆا ەڭ العاشقى جەكپە- جەگىندە كانادالىق قارسىلاسى ا. فورتينمەنى 2:1 ەسەبىمەن ۇتىپ، شيرەك فينالعا جولداما العان ەدى. ودان كەيىن ¼ فينالدا ول قارسىلاسى رەسەيلىك ياروسلاۆا ياكۋشينانى 3.0 ەسەبىمەن جەڭدى.
ەندى وزگە سپورت تۇرلەرىنە قىسقاشا توقتالىپ وتەيىك. بۇگىن 200 مەترگە بايداركادا جەكەلەي ەسۋ سايىسىندا قازاقستاندىق ەسكەك ەسۋشى الەكسەي دەرگۋنوۆ ىرىكتەۋ كەزەڭىندە اتالعان قاشىقتىقتى 36,647 سەكۋندتا ءجۇزىپ ءوتىپ، 23-ورىنمەن جۇلدەگە قول جەتكىزە المادى.
ەرلەر اراسىندا 1000 مەترگە بايداركا جانە كانوە ەسۋ (سپرينت) جارىسىندا الەكساندر ەمەليانوۆ، سەرگەي توكارنيتسكي، يليا گولەندوۆ جانە اندرەي ەرگۋچيەۆ ىرىكتەۋ كەڭەزىنەن جاقسى ناتيجە كورسەتكەنىمەن فينالعا وتە الماي قالدى. ولار 1000 مەتردى 3:00,592 ۋاقىتتا باعىندىردى.
ەندى ولار قولا مەدال الۋ ءۇشىن ۆ فينالىندا باقتارىن سىنايدى. ال ايەلدەر اراسىندا 500 مەترگە بايداركا جانە كانوە ەسۋ (سپرينت) جارىسىندا يرينا پودوينيكوۆا، زويا انانچەنكو، ناتاليا سەرگەيەۆا جانە يننا كلينوۆا العاشقى سىندارىن ءساتتى باعىندىردى. الايدا، جارتىلاي فينالدا جولدارى بولمادى.
سونىمەن بىرگە بۇگىن تاەكۆاندودان ەكىنشى سپورتشىمىز جارىس جولىنا شىعىپ، ەكەۋى دە باسەكەنى جۇلدەسىز اياقتادى. 67 كەلى سالماقتا سىنعا تۇسكەن دەنيز جانسەل العاشقى اينالىمدا قىتايلىق تايبەي تاەكۆاندوشىسى چجۋان تسزياتسزيادان 2:16 ەسەبىمەن ۇتىلىپ قالدى. ال ەكىنشى تاەكۆاندوشىمىز 48 كەلى سالماقتا سىنعا تۇسكەن اينۇر ەسبەرگەنوۆا دا جارىستى ءساتسىز باستادى.
سونداي- اق، زاماناۋي بەسسايىستان ەلەنا پوتاپەنكو (سەمسەرلەسۋ، سۋعا ءجۇزۋ، ات جارىسى، جۇگىرۋ، تاپانشا اتۋ) قورىتىندىسى بويىنشا 1314 ۇپاي جيناپ، ۇزدىك وندىقتىڭ قاتارىنان كورىندى. ياعني، قازاقستاندىق سپورتشى سۋعا جۇزۋدەن 5- ورىن، سەمسەرلەسۋدەن 20- ورىن، ات جارىسى بويىنشا 7- ورىن، جۇگىرۋ مەن تاپانشادان وق اتۋ بويىنشا 22- ورىنعا يە بولدى.
ال كوركەم گيمناستيكادان سىنعا تۇسكەن 17 جاستاعى سابينا اشىربايەۆا 69,232 ۇپايمەن جارىستى 12-ورىنمەن اياقتادى.
ەندى مەدالدان باستى ءۇمىت كۇتكەن ەركىن كۇرەستەن ەكى بالۋانىمىز جارىس جولىنا شىقتى. الايدا، ەكەۋى دە قولدا بار مۇمكىندىكتەرىنەن ايىرىلىپ، جۇلدەسىز قالدى.
ايتالىق بۇگىن ەركىن كۇرەستەن 74 كەلىگە دەيىنگى سالماقتا ونەر كورسەتكەن بالۋانىمىز عالىمجان وسەربايەۆ قولا مەدال ءۇشىن وتكەن بەلدەسۋدە تۇرىك بالۋانى سونەر دەميرتاشقا 6:0 ەسەبىمەن جول بەردى. وسىلايشا قولا تۇرعان قولا مەدالدان ايىرىلىپ، ەلگە جۇلدەسىز ورالاتىن بولدى.
وسەربايەۆ وسىعان دەيىنگى بەلدەسۋلەرىندە الدىمەن مولداۆيالىق ەۆگەنيا نەديالكونى قاپى قالدىردى. ودان كەيىن، 2014 -جىلى تاشكەنتتە وتكەن ءا چ- دا كۇمىس جۇلدە ەنشىلەگەن سوسۋكە تاكاتانيدى جەڭدى - 4:3 ەسەبىمەن ۇتىپ، جارتىلاي فينالعا دەيىن جەتكەن بولاتىن. الايدا، ول جارتىلاي فينالدا يراندىق حاسان يازدانيگە ەسە جىبەرگەن. مىنە، ەندى ەڭ ماڭىزدى بەلدەسۋىندە ول تاعى دا ۇتىلىپ قالدى.
ال نۇريسلام سانايەۆ تا قولا مەدال ءۇشىن وتكەن بەلدەسۋىندە قارسىلاسىنا جول بەرىپ، جارىستى جۇلدەسىز اياقتاعان ەدى.
سونىمەن بۇگىن قازاقستان قورجىنىنا تەك بوكسشىلارىمىز قوس قولا مەدال سىيلادى.
ەسكە سالا كەتەيىك، اۋىر اتلەت نيجات راحيموۆ پەن ءجۇزۋشى دميتري بالاندين جانە 69 كەلى سالماقتاعى بوكسشىمىز دانيار ەلەۋسىنوۆ ريو وليمپياداسىنىڭ چەمپيونى اتانعان ەدى. ال ريو وليمپياداسىنىڭ كۇمىس جۇلدەسىن وسىعان دەيىن، بالۋان ەلدوس سمەتوۆ، اۋىر اتلەت جازيرا جاپپارقۇل، بوكسشى ۆاسيلي ليەۆيت جەڭىپ السا، بۇگىن بوكستان 81 كەلى سالماقتا ادىلبەك نيازىمبەتوۆ جانە ايەلدەر كۇرەسىنەن گيۋزەل مانيۋروۆا كۇمىس جۇلدەگەر اتاندى.
ال وسىعان دەيىن قولا مەدالداردى دزيۋدوشى وتگونتسەتسەگ گالبادراح، ءۇش قارعىپ سەكىرۋشى ولگا رىپاكوۆا، اۋىر اتلەتتەر كارينا گوريچيەۆا، فارحاد حاركي، الەكساندر زايچيكوۆ جانە ايەلدەر كۇرەسىنەن كەشە ەلميرا سىزدىقوۆا يەلەنسە، بۇگىن ايەلدەر كۇرەسىنەن 63 كەلىگە دەيىنگى سالماقتا ونەر كورسەتكەن ەكاتەرينا لاريونوۆا ريو وليمپياداسىنىڭ قولا جۇلدەگەرى اتاندى. بۇگىن بوكستان دىچكو مەن شاكىموۆا قازاقستان قورجىنىنا ەكى قولا سالدى.
اۆتور: كۇنسۇلتان وتارباي