ريو-2016: وليمپيادانىڭ ون ءۇشىنشى كۇنى قازاقستان قورجىنى 2 كۇمىس 1 قولا مەدالمەن تولىقتى

دەپ حابارلايدى ريوداعى قازاقپارات ءتىلشىسى بۇگىنگى كۇنگە جاساعان قورىتىندىسىندا.
بۇگىن قازاق سپورتشىلارى ءبىر ەمەس ەكى التىن الۋعا مۇمكىندىكتەرى بولدى. ونىڭ ءبىرىنشىسىن بوكستان 81 كەلى سالماقتا ەل نامىسىن قورعاعان ادىلبەك نيازىمبەتوۆ الۋى كەرەك ەدى. بۇيىرمايىن دەگەن دۇنيە قانشا جەردەن تالپىنساڭ دا بۇيىرمايدى ەكەن.
ادىلبەك نيازىمبەتوۆ فينالدا كۋبالىق بوكسشى حۋليو سەسار لا كرۋسپەن جۇدىرىقتاستى. بۇگىن دە قازاق بوكسشىسىنىڭ اقتىق ايقاسىنا كورەرمەن وتە كوپ جينالدى. زالداعى جۇرتشىلىقتىڭ كوبى ادىلبەككە جانكۇيەرلىك ەتتى. سەبەبى، ونىڭ سوققىسى قارسىلاسىنا قاراعاندا الدەقايدا پارمەندى، جۇدىرىعى كوزدەگەن جەرىنە ءدوپ ءتيىپ جاتتى. وكىنىشكە قاراي تورەشىلەر ءبىرىنشى راۋندتىڭ ۇپايىن كۋبالىق بوكسشىنىڭ ەنشىسىنە جازدى. ەكىنشى راۋندتا دا جانىبەك بەلسەندىلىگىمەن كوزگە ءتۇستى. بۇنى دا تورەشىلەر قارسىلاسىنىڭ ەنشىسىنە جازدى. ال ءۇشىنشى راۋندتا نيازىمبەتوۆ قارسىلاسىن قۋىپ ءجۇرىپ سابادى دەسەك ارتىق ايتقانىمىز بولماس.
بۇل جولى تورەشىلەر ۇپايدى قازاق بوكسشىسىنا سىيلادى. الايدا، بۇل ۇپاي كەرەك ەمەس ەدى... سەبەبى، ءبارى دە العاشقى ەكى راۋندتا شەشىلىپ قويدى. ءبىراق، ادىلبەك جەكپە- جەك اياقتالعان سوڭ ءوزىنىڭ جەڭىسىنە سەنىمدى بولدى. تورەشىلەر ۇپاي سانىن ەسەپتەپ، جەڭىمپاز دەپ قارسىلاسىنىڭ قولىن كوتەرگەندە قازاق بوكسشىسى كوز جاسىنا ەرىك بەرىپ، جىلاپ جىبەردى.
تورەشىلەردىڭ ادىلەتسىزدىگىنە اشىنعان ول رينگتى ارى بەرى اينالىپ، كوز جاسىن تيا المادى. ادەتتە ەتىنەن ەت كەسىپ الساڭ دا «قىڭق» ەتپەيتىن قازاق باتىرىنىڭ كوز جاسى زالدا وتىرعان كوپ ادامدى تولقىتتى. ءتىپتى، قازاق جانكۇيەرلەرىنەن بولەك، شەتەلدىك كورەرمەندەر دە كوڭىلدەرىن بوساتىپ، بىرگە ەگىلدى... تورەشىلەردىڭ قىلىعىنا شىداماعان جۇرت تورەشىلەرگە توبە جاقتان ايعايلاپ جاتتى. ول كەزدە قۇلاعى كەرەڭ، جۇرەگى تاس تورەشىلەر رينگتەن باستارى سالبىراپ الىستاپ بارا جاتقان ەدى. وسىلايشا ءبىر التىنىمىزدى كۋبالىق بوكسشىعا سىيعا تارتتىق.
ءبىراق، ادىلبەكتىڭ كۇمىسى ءبىز ءۇشىن التىننان دا قىمبات ەكەنى داۋسىز. ول وسىمەن ەكى دۇركىن وليمپيادانىڭ كۇمىس جۇلدەگەرى اتاندى. بۇل وليمپيادا تاريحىنداعى قاتارىنان ەكى رەت فينالعا شىققان ەكىنشى بوكسشىمىز. وسىعان دەيىن بولات ءجۇمادىلوۆ ەكى بىردەي وليمپيادانىڭ فينالىنا شىعىپ، ەكى مارتە كۇمىس جۇلدەگەر اتانعان بولاتىن. مىنە، بۇگىن ادىلبەك سول اعاسىنىڭ ەرلىگىن قايتالادى.
ەكىنشى التىندى ايەلدەر اراسىندا 75 كەلى سالماقتا ەل نامىسىن قورعاعان لوندون وليمپياداسىنىڭ قولا جۇلدەگەرى گۇزەل مانيۋروۆادان كۇتتىك. وكىنىشكە قاراي بۇل بالۋان قىزىمىز بار مۇمكىندىكتى پايدالانا الماي، التىندى ۋىسىنان ءوزى شىعارىپ الدى. بۇل جەردە ەشقانداي تورەشىلەرگە ايتار ءۋاجىمىز جوق.
مانيۋروۆا فينالدا كانادالىق بالۋان ەريك ۋيبەدەن ۇتىلىپ قالدى. ءسال توزىمدىلىك تانىتىپ، كىشكەنە جەڭىس ءۇشىن تالپىنعاندا التىندى ۋىسىندا ۇستاپ قالار ما ەدى، كىم ءبىلسىن؟!
ال بۇگىنگى قورجىنىمىزعا تۇسكەن قولا مەدالدى ايەلدەر كۇرەسىنىڭ شەبەرى 63 كەلى سالماقتا سىنعا تۇسكەن ەلەنا پيروجكوۆا جەڭىپ الدى. ول جۇبانىش بەلدەسۋىنىڭ العاشقى بەلدەسۋىندە شۆەتسيالىق بالۋان حەننا يونحەنسوندى 5:0 ەسەبىمەن ۇتقان بولاتىن. ەكىنشى بەلدەسۋىندە ا ق ش بالۋانىن تازا ۇتىپ، ريو وليمپياداسىنىڭ قولا مەدالىن جەڭىپ الدى. وسىلايشا قازاقستان قورجىنىنا جەتىنشى قولا مەدالدى سىيلادى.
ەندى وزگە سپورت تۇرلەرىنە قىسقاشا توقتالىپ وتەيىك.
بۇگىن ريودا وتانداستارىمىز سپورتتىڭ جەتى تۇرىنەن باق سىنادى. سولاردىڭ العاشقىلارى بولىپ جارىس جولىنا شىققان ەسكەك ەسۋشىلەرىمىز ەۆگەنيي الەكسەيەۆ پەن الەكسەي دەرگۋنوۆ بايداركا جانە كانوەدا 1000 مەترگە جۇپتاسىپ ەسۋ سايىسىندا ب فينالىندا ونەر كورسەتىپ، جۇلدەلى ورىنداردان كورىنە المادى. ولار 1000 مەتردى 2: 20,827 ۋاقىتتا ءجۇزىپ ءوتىپ، جالپى ەسەپتە 11-ورىنعا تابان تىرەدى.
سوسىن بايداركا جانە كانوەدا 200 مەترگە جۇپتاسىپ ەسۋ سايىسىندا سەرگەي توكارنيتسكي پەن اندرەي ەرگۋچيەۆ تە ب فينالىندا 35,497 كورسەتكىشكە قول جەتكىزىپ، جالپى ەسەپتە جەرلەستەرىمىز 12-ورىندى مىسە تۇتتى. ال 200 مەترگە كانوەدە جەكەلەي ەسۋ سايىسىندا تيمۋر حايداروۆ اتالعان قاشىقتىقتى 40,549 سەكۋندتا ءجۇزىپ ءوتىپ، جالپى ەسەپتە 14-ورىندى يەلەندى.
سونىمەن بىرگە ەرلەر اراسىندا زاماناۋي بەس سايىستان (سەمسەرلەسۋ، سۋعا ءجۇزۋ، كونكۋر، جۇگىرۋ، تاپانشا اتۋ) ەل نامىسىن قورعاعان وتانداسىمىز پاۆەل يلياشەنكو جارىستىڭ العاشقى كۇنى 208 ۇپايمەن 21-ورىنعا تابان تىرەدى. ول بۇگىن سەمسەرلەسۋ بويىنشا سىنعا ءتۇستى. ەندى پاۆەل يلياشەنكو سۋعا جۇزۋدە باعىن سىناپ كورەدى. جارىس 20 - تامىز كۇنى وتەدى. ال وسى سايىستان سىنعا تۇسكەن ارۋىمىز ەلەنا پوتەپەنكو 202 ۇپايمەن ازىرگە 20-ورىندا كەلەدى. ول سەمسەرلەسۋدەن باق سىنادى. ەندى بۇگىن سۋعا ءجۇزۋ جارىسىنا قاتىسادى.
ال بۇگىن يۆان يۆانوۆ يادرو لاقتىرۋدان سىنعا ءتۇستى. يادرونى 17,38 مەترگە لاقتىرىپ، جالپى ەسەپتە ارتىنان ساناعاندا ەكىنشى بولىپ، 33-ورىنعا تابان تىرەدى.
سونىمەن قاتار بۇگىن ايەلدەر اراسىندا وتكەن 4x100 مەترگە جۇگىرۋ ەستافەتاسىندا ەل نامىسىن قورعاعان ولگا سافرونوۆا، ۆيكتوريا زيابكينا، يۋليا راحمانوۆا، سۆەتلانا گولەندوۆا، اناستاسيا تۋلاپينا، ريمما كاشافۋتدينوۆا سىندى سپورتشىلارىمىز ىرىكتەۋ سايىسىندا 100 مەتر 4-اينالىمنان تۇراتىن جۇگىرۋ ەستافەتاسىندا 43,41 سەكۋندتا جۇگىرىپ، 7-ورىندى يەلەندى. وسى سايىس بارىسىندا تورەشىلەر قازاقستاندىقتاردى جارىس ەرەجەلەرىن بۇزعانىن انىقتاپ، جارىستان شىعارىپ تاستادى. سونىمەن قاتار ا ق ش جانە برازيليا سپورتشىلارى دا وسىنداي ولقىلىقتارعا جول بەرگەنى ءۇشىن جارىستان شەتتەتىلدى.
سونىمەن بۇگىن قازاقستان 2 كۇمىس، 1 قولا مەدالمەن وليمپيادانىڭ ون ءۇشىنشى كۇنىن دە ءتامامدادى.
قازىر قازاق ەلى 3 التىن، 5 كۇمىس، 7 قولا مەدالمەن جالپى ەسەپتە 20-ورىندا كەلەدى.
اۆتور: كۇنسۇلتان وتارباي