ريو-2016: قازاقستان جالپى ەسەپتە 17-ورىنعا سىرعىدى
بۇل تۋرالى ريوداعى قازاقپارات ءتىلشىسى حابارلادى.
تۋرا قازىر ەسەپ بويىنشا ا ق ش 28 التىن 28 كۇمىس، 27 قولا مەدال جەڭىپ الىپ، جالپى ەسەپتە كوش باستاپ تۇر.
ەكىنشى ورىندا 19 التىن، 19 كۇمىس، 12 قولا مەدال ەنشىلەگەن ۇلى بريتانيا سپورتشىلارى ۇزدىك ەكىلىكتە بولسا، ۇشتىكتە 17 التىن، 15 كۇمىس، 18 قولا مەدال جەڭىپ العان قىتاي سپورتشىلارى كەلە جاتىر.
ال قازاقستان قۇراماسى 2 التىن، 3 كۇمىس، 5 قولا مەدالمەن جالپى ەسەپتە كەشەگى 15-ورىننان بۇگىن 17-ورىنعا سىرعىدى.
وليمپيادانىڭ ون ءبىرىنشى كۇنى دە ارتتا قالدى. بۇل كۇن دە قازاق جانكۇيەرلەرى ءۇشىن قازاق بوكسشىلارىنىڭ جارقىن جەتىستىگىمەن ەستە قالدى. كەشە دانيار ەلەۋسىنوۆ فينالعا شىقسا، بۇگىن تاعى ءبىر قازاق بالاسى ادىلبەك نيازىمبەتوۆ فينالعا جولداما الدى. بۇل قازاق بىلعارى قولعاپ شەبەرلەرى ءۇشىن ۇلكەن ناتيجە. الايدا، بۇگىن قازاق قورجىنىنا مەدال تۇسكەن جوق.
اڭگىمەمىزدى ءبىرىنشى بوكسشىلارىمىزدان باستاساق. بۇگىن شارشى الاڭعا ءبىرىنشى بولىپ، 51 كەلى سالماقتاعى جاينا شەكەربەكوۆا كوتەرىلدى.
بۇل ارۋىمىز جارىستى بىردەن شيرەك فينالدان باستاعان بولاتىن. العاشقى قارسىلاسىن ەركىن ۇتقاندا بىردەن ريو وليمپياداسىنىڭ مەدالىنە قول جەتكىزۋگە مۇمكىندىگى بار ەدى. وكىنىشكە قاراي ۇتىلىپ قالدى.
ول العاشقى جەكپە- جەگىندە فرانسيالىق بوكسشى، الەم چەمپيوناتىنىڭ ۆيتسە- چەمپيونى سارا ۋرامۋننان ۇتىلىپ، جارىستى اياقتادى.
وسىدان كەيىن، قازاقتىڭ «كۇمىس» جىگىتى اتانىپ كەتكەن ادىلبەك نيازىمبەتوۆتىڭ جەكپە- جەگىنىڭ كۋاسى بولدىق.
ول جارتىلاي فينالدا بريتانيالىق سپورتشى دجوشۋا بۋاتسيدى ۇتىپ، فينالعا ءوتتى. بريتانيالىقتان ۇپاي سانىمەن باسىم تۇسكەن ماڭعىستاۋلىق سپورتشىمىز ەندى 3 دۇركىن الەم چەمپيونى، كۋبالىق حۋليو سەزار لا كرۋسمەن جۇدىرىقتاسادى. ايتا كەتەيىك، جانىبەك وسىدان ءتورت جىل بۇرىن لوندون وليمپياداسىندا دا فينالعا ءوتىپ، التىن ءۇشىن ايقاستا قارسىلاسىنا جول بەرىپ، كۇمىس جۇلدەگەر اتانعان ەدى. ەندى مىنە، ريو وليمپياداسىندا ەكىنشى رەت فينالعا شىقتى. بيىل سول كۇمىسىن التىنعا ايىرباستايدى دەگەن ۇمىتتەمىز.
ودان كەيىن رينگكە اسا اۋىر سالماقتاعى بوكسشىمىز يۆان دىچكو كوتەرىلىپ، نيگەريالىق ەفە ادجاگبانى جارىس جولىنان تايدىرىپ، جارتىلاي فينالعا جولداما الدى.
ەندى وزگە دە سپورت تۇرلەرىنە قىسقاشا توقتالىپ وتەيىك. بۇگىن ەرلەر اراسىندا 10 شاقىرىمعا ءجۇزۋ مارافونى ءوتتى. وندا ەل نامىسىن ارقالاپ كەلگەن جەرلەسىمىز ۆيتالي حۋدياكوۆ جارىس ەرەجەسىن بۇزىپ، ونى تورەشىلەر جارىستان شىعارىپ جىبەردى.
ال قىزدار اراسىندا بايداركا جانە كانوەدا 500 مەترگە جۇپتاسىپ ەسۋ سايىسىندا يرينا پودوينيكوۆا مەن ناتاليا سەرگەيەۆا فينالدا 1:48,361 ۋاقىتپەن مارە سىزىعىن 7- بولىپ كەستى. الايدا، بۇل كورسەتكىشپەن جۇلدەگە ىلىگە المادى.
سونداي- اق، بۇگىن بايداركادا 200 مەترگە جەكەلەي ەسۋ جارىسىنان وتكەن دودادا يننا كلينوۆا جارىستى ەڭ سوڭعى بولىپ اياقتادى. قازاقستاندىق ەسكەك ەسۋشى «ا» فينالىندا 200 مەتر قاشىقتىقتى 41, 52 ۋاقىتپەن ءجۇزىپ ءوتتى.
ال جەڭىل اتلەتتەر اراسىندا كەدەرگىمەن 100 مەترگە جۇگىرۋ سايىسىنان سىنعا تۇسكەن جەرلەستەرىمىز دە ەل ءۇمىتىن اقتاي العان جوق. وندا قازاقستاندىق اناستاسيا پيليپەنكو 100 مەتردى 13.29 سەكۋندتا جۇگىرىپ ءوتىپ، جالپى ەسەپتە 39-ورىنعا تابان تىرەدى. وسىلايشا بۇگىنگى جارىس كۇنى تەك، قازاق بوكسشىلارىنىڭ جەڭىستەرىمەن اياقتالدى.
اۆتور: كۇنسۇلتان وتارباي
