ريو-2016: ا ق ش قىتايدان 11 التىنعا اسىپ كەتتى

ريو- دە- جانەيرو. قازاقپارات - برازيليانىڭ ريو- دە- جانەيرو قالاسىندا ءوتىپ جاتقان وليمپيادا ويىندارىندا ا ق ش قىتايدان 11 التىنعا اسىپ كەتتى، دەپ حابارلايدى ريوداعى قازاقپارات ءتىلشىسى.

بۇگىن وليمپيادانىڭ سەگىزىنشى كۇنى ا ق ش 24 التىن، 18 كۇمىس، 18 قولا، جالپى 60 مەدال ەنشىلەپ، قىتايدان كوش ىلگەرى اسىپ كەتتى.

ال قىتاي 13 التىن، 11 كۇمىس، 17 قولا، جالپى 41 مەدال ەنشىلەپ، 2-ورىندا كەلە جاتىر. ۇزدىك ۇشتىكتى 10 التىن، 13 كۇمىس، 7 قولا، جالپى 30 مەدال جەڭىپ العان  ۇلى بريتانيا سپورتشىلارى تۇيىندەپ تۇر.

بۇگىنگى ەسەپ بويىنشا 65 مەملەكەت ريو وليمپياداسىنىڭ مەدالىنە قول جەتكىزىپ ۇلگەردى.

قازاقستان قۇراماسى 2 التىن، 2 كۇمىس، 3 قولا مەدالمەن بۇگىن جالپى كوماندالىق ەسەپتە 16-ورىندا كەلە جاتىر.

جالپى قازىرگە دەيىن، 140 التىن، 140 كۇمىس، 158 قولا، جالپى 438 مەدال ءوز يەلەرىن تاپتى.

ەسكە سالا كەتەيىك، جارىستىڭ العاشقى كۇنىندە دزيۋدودان ەرلەر اراسىندا 60 كەلىگە دەيىنگى سالماق دارەجەسىندە سىنعا تۇسكەن ەلدوس سمەتوۆ ەل قورجىنىنا كۇمىس جۇلدە سالسا، 48 كەلىگە دەيىنگى سالماقتا ايەلدەر اراسىندا جارىسقا قاتىسقان وتگونسەسەگ گالبادراح وليمپيادا ويىندارىنىڭ قولا جۇلدەگەرى اتاندى. ال ءۇشىنشى مەدالدى قورجىنعا اۋىر اتلەت فارحاد حاركي سالدى. ول ەرلەر اراسىنداعى 62 كەلىگە دەيىنگى سالماق دارەجەسىندە ونەر كورسەتكەن بولاتىن. وليمپيادانىڭ ءتورتىنشى كۇنى تاعى ءبىر اۋىر اتلەت قىزىمىز كارينا گوريچيەۆا 63 كەلى سالماقتا ءتورتىنشى مەدالدى ەل قورجىنىنا سالسا، وليمپيادانىڭ بەسىنشى كۇنى ەكى سپورتشىمىز - اۋىر اتلەت نيدجات راحيموۆ پەن دميتري بالاندين 200 مەتر قاشىقتىققا جۇزۋدەن ەكى التىندى جەڭىپ الدى. ال وسى كۇنى ايەلدەر اراسىندا سىنعا تۇسكەن اۋىر اتلەت قازاقتىڭ قىزى جازيرا جاپپارقۇل كۇمىس جۇلدەگەر اتاندى.

اۆتور: كۇنسۇلتان وتارباي