قىرعىزستان پرەزيدەنتى 2015-جىلى قانشا ميلليون سوم تابىس تاپقانى بەلگىلى بولدى

استانا. قازاقپارات - 2015-جىلدىڭ قورىتىندىسى بويىنشا، قىرعىزستان پرەزيدەنتى المازبەك اتامبايەۆ 1 ميلليون 298 مىڭ 448 سوم تابىس تاپقان. مەملەكەتتىك كادر قىزمەتى وسىنداي اقپارات تاراتتى، - دەپ حابارلايدى كيرتاگ.

ودان بولەك، ا. اتامبايەۆتىڭ سەنىمگەرلىكپەن باسقارۋعا بەرىلگەن 27 مىڭ شارشى مەتر قۇرىلىسى جانە 64 مىڭ شارشى مەتر جەردە كوپجىلدىق كوشەتتەرى بار.

«شىعىندار» بولىمىندە مەملەكەت باسشىسىنىڭ ءوز جيناعىنان 34 ميلليون سومدى جۇمساعانى كورسەتىلگەن. نە سەبەپتى جۇمسالعانى دەكلاراتسيادا ايتىلماعان.

پرەزيدەنتتىڭ جۇبايى رايسا اتامبايەۆانىڭ وتكەن جىلعى كىرىس كولەمى نەگىزگى جۇمىسىنان 182 مىڭ سوم جانە سالىم پايىزى ەسەبىندە 112 مىڭ دوللار بولعان. ر. اتامبايەۆانىڭ يەلىگىندە ەكى پاتەر بار.