زەرتتەۋشىلەر 2015 - جىلى كيىكتەردىڭ نەدەن قىرىلعانىن انىقتادى
دەپ جازادى The Guardian گازەتى.
وتكەن جىلى مامىر ايىندا كيىكتەردىڭ بەتپاقدالا پوپۋلياتسياسىنىڭ جاپپاي قىرىلۋىنا قاتىستى ءتۇرلى پىكىرىلەر، بولجامدار ايتىلدى. ءتىپتى كەيبىرەۋلەر قىزىل كىتاپقا ەنگەن جانۋارلار زىمىراندا پايدالانىلاتىن ۋلى وتىنىنان ۋلاندى دەدى.
كيىكتەردى ساقتاۋ اليانسى (SСA)ءوز قورىتىندىسىن جانۋارلار ۇرپاق وربىتەتىن، ءارى بارىنشا السىرەيتىن ماۋسىمدا ياعني كوكتەمدە جاريالاپ وتىر. ولەكسە تىندەردىڭ بيوۇلگىلەرىن زەرتتەگەن ءبىرقاتار زەرتتەۋ 2015 -جىلى كيىكتەردىڭ جاپپاي قىرىلۋىنا سەبەپ پاستەرەلليز - Pasteurella multocida ەكەنىن انىقتادى.
بۇل قوزدىرعىش ادەتتە اقبوكەننىڭ تىنىس جولدارىندا زيانىن تيگىزبەي ءومىر سۇرە بەرەدى. الايدا وسى جولى باكتەريا باقىلاۋدان شىعىپ كەتكەن. بۇل ءشوپقورەكتى جانۋارلار اراسىندا ۋاقىت وتە كەلە بولاتىنى بەلگىلى، ءبىراق ءولىم- ءجىتىم 100 پايىزعا ەش ۋاقىتتا جەتپەگەن. ءقازىر عالىمدار پاستەرەلليزدىڭ وسىنشالىقتى قىرىلۋعا قالايشا الىپ كەلگەنىن انىقتاۋعا تىرىسۋدا.
وتكەن جىلى كيىكتەر جاپپاي قىرىلعانعا دەيىن ولاردىڭ جاھاندىق پوپۋلياتسياسى 262000 شاماسىندا بولدى. قازىرگى ۋاقىتتا ولاردىڭ سانى 100 مىڭعا جەتپەيدى.
«كيىكتەر مامىر ايىندا تولدەيدى، قازىر جوعالىپ كەتۋ قاۋپى تونگەن وسى جانۋاردى زەرتتەۋشىلەر ونىڭ تاعدىرىنا الاڭداۋلى»، دەدى SCA اكىمشىسى كاريلن سەميۋەل.
