قىتاي 2015 - جىلعى ەكونوميكالىق دامۋىن قورىتىندىلادى

استانا. قازاقپارات -  2015 -جىلى قىتاي ەكونوميكاسىنىڭ دامۋى تۇراقتى ءارى قالىپتى بولعان. ەلدىڭ جالپى ىشكى ءونىمى % 6,9- دى كورسەتتى، دەمەك ۇكىمەتتىڭ مەجەلەگەن % 7- ى ەڭسەرىلدى دەگەن ءسوز.

«بۇل جامان كورسەتكىش ەمەس»، - دەيدى رەسمي بەيجىڭدەگىلەر. ءبىراق الەم ەكونوميكاسىنىڭ دامۋى قىتايداعى احۋالعا بايلانىستى. قارقىنى باسەڭسىپ قالعان الىپ ەلدىڭ بيىلعى ءوسىمى قالاي بولماق؟

 الەمدەگى بەلدى ەكونوميستەر قىتاي ەكونوميكاسىنا تۇسكەن قىسىم مەن ونىڭ دامۋ كورسەتكىشىنىڭ قۇلدىراۋىنا الاڭداپ، ءتۇرلى بولجام جاساۋدا. الايدا ق ح ر- دىڭ دامۋ جانە رەفورما جونىندەگى مەملەكەتتىك كوميتەت ءتوراعاسى ارنايى باسپا ءسوز ءماسليحاتىن وتكىزىپ، قىتاي قانداي قيىندىقتى بولسىن ەڭسەرە الاتىن كۇشتى ەل ەكەنىن مالىمدەدى.

 سيۋي شاوشيدىڭ سوزىنشە، يمپورت كورسەتكىشىنىڭ تومەندەۋى جاقسى ەمەس، ءبىراق قىتايدىڭ ءالى بىرنەشە تاۋارعا دەگەن سۇرانىسى جوعارى. ماسەلەن تەمىر كەنى مەن تىڭايتقىشقا دەگەن قاجەتتىلىك مول. حالىقارالىق مۇناي نارىعى قىتاي ەنەرگيا رەسۋرستاردى از پايدالانادى دەپ بولجاعانىمەن، الىپ ەلدىڭ شيكى مۇنايعا دەگەن سۇرانىسى بىلتىر % 8,8- عا وسكەن.

سيۋي شاوشي، ق ح ر دامۋ جانە رەفورما جونىندەگى مەملەكەتتىك كوميتەتتىڭ ءتوراعاسى:

 - ەكونوميكا دامۋىنىڭ باياۋلاپ قالۋىنا باستى سەبەپ -  الەمدە شيكىزات باعاسى ءتۇسىپ كەتتى. بۇل جالپى تاپسىرىستىڭ تومەندەۋىنە الىپ كەلدى. ال قىتاي بولسا، بۇرىنعىداي كوپ مولشەردە شيكىزات ساتىپ الۋىن توقتاتقان جوق، كەرىسىنشە ارتتىرا ءتۇستى. ەكونوميكالىق وسىمگە سەرپىلىس بەرەتىن باستى جول -  ينۆەستيتسيا.

رەسمي بەيجىڭ بيزنەس- جوبالارعا قارجى سالۋ ج ءى ءو دامۋىنا اسەر ەتەدى دەپ وتىر. ءبىراق مەملەكەت بۇعان دەيىنگى ينۆەستيتسيا سالۋ باعىتى مەن باعدارىن وزگەرتەدى. ەندى ۇكىمەت يننوۆاتسيا سالاسىنا، ءبىلىم جانە مەديتسيناعا كوبىرەك قارجى سالادى. اسىرەسە قىتايدىڭ باتىس جانە ورتالىق ايماقتارىنا باسىمدىق بەرمەك.

قىتايدىڭ الەمدىك ساۋدا اينالىمعا ىقپالى زور، ۇلەسى دە ۇلكەن. دۇنيەجۇزىندەگى مۇنايدىڭ % 14,4- ى، تەمىردىڭ % 60- عا جۋىعى جانە اۆتوكولىكتەردىڭ % 6,3- ىن وسى ەل ساتىپ الادى. سوندىقتان بۇگىنگى احۋالدىڭ تۇراقتالۋى الەمنىڭ ەكىنشى ەكونوميكاسى سانالاتىن قىتايدىڭ جاعدايىنا بايلانىستى. الىپ ەل 2016 -جىلعى ەكونوميكالىق دامۋ كورسەتكىشىن كوكتەمدە وتەتىن بۇكىل قىتايلىق حالىق وكىلدەرى جيىنىنىڭ سەسسياسىندا مەجەلەيدى.

www.24.kz