قازاق ونەر جۇلدىزدارى 2015 -جىلعى جەتىستىكتەرىمەن ءبولىستى
بيىل «مۇزارتتىڭ» بارلىق مۇشەلەرى جاڭا جىلدى وتباسىمەن قارسى الادى. بۇل مەرەكە كۇندەرى مۋزىكالىق توپ جىلدا ەشقانداي تاپسىرىس قابىلدامايدى ەكەن. ال، توپتىڭ ءانشىسى كەنجەبەك ءجانابىلوۆ بيىل جەكە شىعارماشىلىعىنا كوپ كوڭىل بولگەنىن ايتادى.
«مۇزارتتىڭ» وزگە مۇشەلەرىنىڭ جەكە ومىرىندە دە بيىل قۋانىشتى ساتتەر بولدى. مەيرامبەك بەسبايەۆتىڭ ەكىنشى بالاسى دۇنيەگە كەلىپ، جۇبايى مارحاببات ەكەۋى ۇلدى بولعان ەدى. قۋانىشى قوينىنا سىيماعان مەيرامبەك بۇل كۇندى ۇيىندە، اق داستارحان باسىندا، دوس- جاراندارىمەن دۇركىرەتىپ اتاپ وتكەن بولاتىن.
بيىل ءسابيلى بولعان شوۋ- بيزنەس جۇلدىزدارىنىڭ تىزىمىندە توقتار مەن بەيبىت تە بار. ولار ەگىز ۇلدى بولىپ، قازاق حالقىن قۋانتقان ەدى. جانە دە الماس كىشكەنبايەۆ، نۇرجان كەرمەنبايەۆ، ەرلان ورىنباساروۆ پەن بايان نۇرمىشيەۆا، ميراس پەن قۇرالاي دا قوي جىلى ءسابيلى بولدى. سونداي- اق 2015 -جىلى قىزدى بولعان سيۆي ماحمۋديگە جارى بەنتلي سىيلاعانى ەل ەسىندە.
2015 -جىلى روزا رىمبايەۆا مەرەيتويىن اتاپ ءوتتى. ءومىرىنىڭ 40 جىلىن ساحناعا ارناعان ءانشى بۇل قۋانىشتى كۇندى حالىق الدىندا كونسەرت بەرىپ وتكىزگەن ەدى.
حالىق ءارتىسى ماقپال ءجۇنىسوۆا دا بيىلعى جىلدىڭ تابىستى بولعانىن ايتادى. ەلدىڭ قۋانىشىنا ءاردايىم ورتاق بولىپ جۇرەتىن ءانشىنىڭ ەسىمى قاراعاندىداعى جۇلدىزدار اللەياسىندا قاشالىپ جازىلدى.
جىل سوڭىندا ءبىرقاتار ءانشى "قازاقستاننىڭ ەڭبەك سىڭىرگەن قايراتكەرى" قۇرمەتتى اتاعىن يەلەندى. ولاردىڭ قاتارىندا اكتريسا ايگۇل يمانبايەۆا، مەدەۋ ارىنبايەۆ، جانار دۇعالوۆا، تۇرسىنبەك قاباتوۆ بار.
ايتا كەتۋ كەرەك، قوي جىلىنىڭ سوڭىندا ايگۇل يمانبايەۆا ءوز مەكتەبىنىڭ تۇساۋىن كەسكەن ەدى. وسىنداي بيزنەس باستاعان ءانشىنىڭ ونەر- ءبىلىم ورتالىعىنان ءان، ءبي، اكتەرلىك شەبەرلىكتى عانا ەمەس، وقۋشىلار بىرنەشە ءتىلدى مەڭگەرىپ، قوسىمشا ساباقتارعا قاتىسا الادى.
ايگۇلدىڭ الدىندا ءانشى روزا ءالقوجا ءوز بيزنەسىن قولعا العان ەدى. « ءالقوجا برەند» دەپ اتالاتىن ورامالدارى ساتىلاتىن ءوز دۇكەنىنىڭ ەسىگىن ايقارا اشقان بولاتىن.
NUR. KZ
