جىل قورىتىندىسى. 2015 -جىلى قازاقستاندىقتار ءۇشىن ۆيزاسىز رەجيم ەنگىزگەن ەلدەر

«قازاقپارات» حالىقارالىق اقپارات اگەنتتىگى بيىل قازاقستاندىقتار ءۇشىن ۆيزاسىز رەجيم ەنگىزگەن مەملەكەتتەر جايىندا، سونىمەن قاتار ەلىمىزدە اشىلعان جاڭا اۋە رەيستەر تۋراسىندا ءسوز قوزعاماق.
جالپى ەلىمىزدىڭ سىرتقى ىستەر مينيسترلىگى وسى باعىتتا بەلسەندى جۇمىستار اتقارىپ كەلەدى. قازاقستاندىقتار ءۇشىن شەكاراسىن اشقان مەملەكەتتەر سانى جىل ساناپ ارتۋدا. بۇگىنگى ۋاقىتتا ۇلتتىق پاسپورتى بار ازاماتتار ءۇشىن 19 مەملەكەت ۆيزاسىز رەجيم ەنگىزۋ تۋرالى كەلىسىمدەرگە قول قويدى. جاقىندا كۋبا مەن قازاقستان ۆيزاسىز قارىم- قاتىناس تۋرالى كەلىسىمدى بەكىتتى. قازاقستان مەن كۋبانىڭ پارلامەنتتەرى اتالمىش كەلىسىمدى راتيفيكاتسيالاعاننان كەيىن قازاقستاندىقتار «بوستاندىق ارالىندا» 30 كۇن ۆيزاسىز ەركىن جۇرە الاتىن بولادى.
وسى جىلدىڭ باسىندا بولگاريا ەلى دە قازاقستان ازاماتتارى ءۇشىن ۆيزا راسىمدەۋدى جەڭىلدەتتى. وزگەرىستەردە بۇرىن بولگار ۆيزاسىن العان ازاماتتارعا 1 جىلعا دەيىنگى مەرزىمدە كۇشىندە بولاتىن «ۇيىمداسقان تۋريزم» ماقساتىمەن قىسقا مەرزىمدى ەكى رەتتىك نەمەسە كوپ رەتتىك ۆيزا بەرۋ كوزدەلگەن.
سونىمەن قاتار گرۋزيا ۇكىمەتىنىڭ 2015 -جىلعى 5 -ماۋسىمداعى № 255 -قاۋلىسىنا سايكەس، قازاقستان رەسپۋبليكاسىنىڭ ازاماتتارى 8 -ماۋسىمنان باستاپ گرۋزيا اۋماعىندا ءبىر جىل ۆيزاسىز بولۋ قۇقىعىنا يە بولدى.
چەرنوگوريا ۇكىمەتىنىڭ 2015 -جىلعى 23 -ساۋىردە كۇشىنە ەنگەن شەشىمىنە سايكەس، قازاقستان رەسپۋبليكاسىنىڭ ازاماتتارى 2015 -جىلدىڭ 15 -ءساۋىر - 31 -قازان ارالىعىندا چەرنوگوريا اۋماعىنا 30 تاۋلىككە دەيىن ۆيزاسىز كىرىپ- شىعا الادى.
بيىل تۋنيس بيلىگى شەتەلدىك- رەزيدەنت ەمەستەردىڭ جول جۇرۋىنە سالىقتى توقتاتتى. وتكەن جىلدىڭ كۇزىندە ەنگىزىلىپ، "قوش ايتىسۋ" سالىعى دەپ اتالىپ كەتكەن تولەم كولەمى 30 تۋنيس دينارىن (شامامەن $15,78) قۇراعان. تۋنيس بيلىگى تۋريستىك ماۋسىمدى ساقتاپ قالۋ ءۇشىن ءبىرقاتار قوسىمشا شارالار قابىلدادى. اتاپ ايتقاندا، بەلارۋس، قازاقستان، كيپر، ءبىرقاتار افريكالىق ەلدەر ءۇشىن ۆيزا بەرىلمەيتىن بولدى. ق ح ر، ءۇندىستان، يران جانە يوردانيا ازاماتتارى تۋنيسكە بارۋ ءۇشىن ۆيزانى تىكەلەي اۋەجايلاردا الا الادى. بۇدان باسقا، تۋنيستە ق ق س كولەمى 12 پايىزدان 8 پايىزعا تومەندەۋدە.
قازاقستان ەۋروپالىق وداق ەلدەرىمەن ۆيزاسىز رەجيمدى ىرىقتاندىرۋ بويىنشا جۇمىستاردى جۇرگىزىپ جاتىر. مينيسترلىكتىڭ اتاپ كورسەتكەنىندەي، قازاقستان تولىق ۆيزاسىز رەجيمدى ەنگىزۋگە ەمەس، ونى تەك جەڭىلدەتۋگە كۇش باعىتتاپ وتىر.
قازاقستان رەسپۋبليكاسى پرەزيدەنتى نۇرسۇلتان نازاربايەۆتىڭ بەلگياعا 2014 -جىلدىڭ قازان ايىندا جاساعان ساپارى بارىسىندا وسى باعىتتا ماڭىزدى قۇجاتتارعا قول قويىلدى.
ونىڭ ىشىندە قازاقستان رەسپۋبليكاسى مەن ەۋرووداق اراسىندا كەڭەيتىلگەن سەرىكتەستىك پەن ىنتىماقتاستىق تۋرالى جاڭا كەلىسىم تۋرالى كەلىسىمشارتتىڭ ءساتتى اياقتالعانى تۋرالى ءوتىنىش بار. ول ۆيزالىق پروتسەدۋرالاردىڭ جەڭىلدەتىلۋىن قاراستىرادى.
مەملەكەت باسشىسىنىڭ تاپسىرماسىمەن قازاقستاندىقتار ءۇشىن ۆيزالىق رەجيمدى جەڭىلدەتۋ ءۇشىن ەۋروپالىق وداق ەلدەرىمەن كەلىسسوزدەر باستالىپ كەتكەن. ءوز كەزەگىندە ەۋروپالىق وداق مەملەكەتتەرى وسى باعىتتا جۇمىس جاساپ جاتىر، ەگەر قازاقستاندىق زاڭناما ەۋروپالىق نورمالارمەن سايكەستەندىرىلەتىن بولسا، «كارى قۇرلىق» ەلدەرى قازاقستاندىقتارعا ۆيزالىق رەجيمدى جاقسارتۋعا دايىن تۇر.
سايكەستەندىرۋ جونىندەگى اڭگىمە زاڭسىز كوشى-قون، ۇيىمداسقان قىلمىسقا قارسى كۇرەس، ازاماتتاردى ەلگە قايتارۋ، ەلدەن باسساۋعالاۋعا ءماجبۇر ازاماتتارعا باسپانا بەرۋ، شەكارا قىزمەتى, ەسىرتكى تاسىمالى، پاسپورتتاردىڭ قورعاۋ قاسيەتتەرىن جەتىلدىرۋ، جەكە اقپاراتتاردىڭ قورعالۋى سالاسىنداعى زاڭنامالاردا بولىپ وتىر.
وسى ماقساتتا ق ر س ءى م- دە ق ر مەن ە و اراسىندا ۆيزالىق رەجيمدى جەڭىلدەتۋ بويىنشا شارالار جوسپارى جاساقتالۋدا. ول ەنگىزىلەتىن بولسا، ۆيزالىق رەجيمدى جەڭىلدەتۋ باعىتىندا ناقتى ىستەر جاسالادى.
قازىرگى ۋاقىتتا جوسپار جوباسى ۇكىمەتتە قارالۋدا جانە جاقىن ارادا قابىلدانۋى شارت.
ايتا كەتۋ كەرەك، قازاقستاندىقتارعا ۆيزا ءراسىمىن جەڭىلدەتۋدى ب ا ءا، ۆەتنام جانە لاتىن امەريكاسىنىڭ ءبىرقاتار مەملەكەتتەرى كوزدەپ وتىر.
سونىمەن بىرگە، ق ر سىرتقى ىستەر مينيسترلىگىنىڭ «قازاقپارات» اگەنتتىگىنە بەرگەن مالىمەتتەرى بويىنشا، ەۋروپالىق ارىپتەستەرمەن جۇرگىزىلىپ وتىرعان ديپلوماتيالىق جۇمىستار اياسىندا قازاقستان رەسپۋبليكاسىنىڭ ۇكىمەتى مەن بەنيليۋكس مەملەكەتتەرى ۇكىمەتتەرى اراسىندا ديپلوماتيالىق ءتولقۇجاتتار يەلەرىن ۆيزالىق تالاپتاردان بوساتۋ تۋرالى كەلىسىمگە قول قويىلدى. اتالعان ەكى قۇجات تاراپتار قاجەتتى ىشكى مەملەكەتتىك راسىمدەردى جۇرگىزگەننەن كەيىن كۇشىنە ەنەدى. ول قۇجات قابىلدانعاننان كەيىن قازاقستاندىق ديپلوماتتار بەلگيا، نيدەرلاندى جانە ليۋكسەمبۋرگتە 90 كۇنگە دەيىن ۆيزاسىز ەركىن جۇرە الادى.
بەنيليۋكس - بەلگيا، نيدەرلاندى جانە ليۋكسەمبۋرگ ەلدەرىن بىرىكتىرەتىن باتىس ەۋروپاداعى ساياسي، ەكونوميكالىق جانە كەدەندىك وداق رەتىندەگى ۇكىمەتارالىق ۇيىم. فرانتسيامەن جانە گەرمانيامەن قۇرعاقتاعى شەكارالارى بار. وداقتىڭ اتاۋى ءار قاتىسۋشى- ەلدىڭ باستاپقى ارىپتەرىنەن قۇرالعان.
ءدال وسىنداي كەلىسىم بيىل 17 -قاڭتاردا شۆەيتساريامەن جاسالدى. سونىمەن قاتار 23 -مامىردا چيلي مەملەكەتى دە ديپلوماتيالىق، رەسمي جانە قىزمەتتىك پاسپورتتارى بار ازاماتتارعا 90 كۇنگە ۆيزاسىز رەجيم ەنگىزدى. الداعى جىلى بۇنداي كەلىسىمدى كاتار راتيفيكاتسيالايدى. بيىل 26 -قاراشادا قازاقستان مەن كاتار ەلدەرى اتالمىش ۋاعدالاستىققا رەسمي قول قويعان بولاتىن.
قازاقستان حالقى ءۇشىن تاعى ءبىر جاعىمدى جاڭالىقتاردىڭ ءبىرى، ەلدە جاڭا اۋە رەيستەرىنىڭ كوپتەپ اشىلۋى. ەندى قازاقستاندىقتار 87 حالىقارالىق باعىت بويىنشا تىكەلەي ۇشىپ بارا الادى. ولاردىڭ ىشىندە ت م د - 52 باعىت، ە و ەلدەرى - 9 باعىت، وڭتۇستىك- شىعىس ازيا مەملەكەتتەرى - 11 باعىت جانە تاياۋ شىعىس - 15 باعىت. جالپى قازاقستاننان 458 حالىقارالىق رەيس ءار اپتا سايىن ۇشسا، كۇنىنە 65 رەيس قاتىنايدى.
بيىل جاڭادان اشىلعان رەيستەردىڭ سانى - 7.
2015 -جىلعى 2 -ماۋسىمنان باستاپ «ەير استانا» اۋە كومپانياسى كورەيا استاناسى سەۋل جانە گرۋزيا استاناسى تبيليسي قالالارىنا تىكەلەي اۋە رەيستەرىن اشتى. ەلوردا تۇرعىندارى مەن قوناقتارى سەۋل قالاسىنا جايلى، ۇزاق ماگيسترالدى «بوينگ-767» اۋە لاينەرىمەن اپتاسىنا ءبىر رەت - سەيسەنبى كۇنى جانە تبيليسي قالاسىنا ەمبراەر-190 بورتىندا اپتاسىنا ەكى رەت - سەيسەنبى جانە سەنبى كۇندەرى ۇشا الادى.
جاڭا باعىتتار جولاۋشىلار اعىنىن ارتتىرىپ، ەلدەر اراسىنداعى تۋريستىك جانە ەكونوميكالىق الەۋەتتى دامىتۋعا مۇمكىندىك بەردى.
ءوز كەزەگىندە، «Asiana Airlines» اۋە كومپانياسى 2015 -جىلدىڭ 8 -تامىزىنان باستاپ سەۋل- استانا- سەۋل باعىتى بويىنشا تۇراقتى رەيستەرىن اشقان بولاتىن. ۇشۋ كۇندەرى - اپتا سايىن ءار سەنبىدە. جولاۋشىلار 290 ورىندىق A330 جايلى ۇشاعىمەن قاتىناي الادى.
1998 -جىلدىڭ قاڭتار ايىنان باستاپ اتالعان اۋە كومپانيا سەۋل- الماتى- سەۋل رەيستەرىن ورىنداپ كەلەدى، قازىرگى كەزدە ۇشۋ جيىلىگى اپتاسىنا ەكى رەتكە دەيىن ۇلعايتىلدى.
سەۋل- استانا باعىتىنداعى OZ579 رەيسىنىڭ ۇشۋى - ساعات 18:10 دا، استاناعا كەلۋى - جەرگىلىكتى ۋاقىت بويىنشا ساعات 22:10 دا. استانا- سەۋل باعىتىنداعى OZ580 رەيسىنىڭ ۇشۋى - ساعات 23:50 دە، سەۋلگە قونۋى - جەرگىلىكتى ۋاقىت بويىنشا ساعات 09:30 دا (استانا ۋاقىتىمەن - 06.30).
وسى جىلى قاراشا ايىندا بىرىككەن اراب امىرلىكتەرىنىڭ Flydubai اۋەكومپانياسى «استانا- دۋباي» تىكەلەي رەيسىنىڭ اشىلعانىن حابارلادى.
بۇل باعىت كومپانيانىڭ قازاقستانداعى ءۇشىنشى رەيسى. بۇنىڭ الدىندا، 2014 -جىلى Flydubai دۋبايدان شىمكەنت پەن الماتىعا اۋە باعىتتارىن اشقان ەدى. ۇشاق دۋبايدان استانا مەن الماتىعا اپتاسىنا ەكى رەت، شىمكەنتكە اپتاسىنا ءبىر مارتە قاتىنايتىن بولادى.
ەندى استانا جولاۋشىلارىنىڭ Flydubai افريكاداعى، ا ق ش، ەۋروپا، تاياۋ شىعىستاعى جانە ءۇندى سۋبكونتينەنتىندەگى 200-دەن باعىتتار بويىنشا ساياحاتتاۋعا مۇمكىندىكتەرى بار.
بيزنەس- كلاسستىڭ بارىپ- كەلگەندەگى بيلەت قۇنى 325 مىڭ تەڭگەدەن باستالسا، ەكونوم- كلاسستىڭ باعاسى 84420 تەڭگەدەن باستالادى.
ايتا كەتەيىك، Flydubai - قازاقستاندىق باعىتقا اۋە رەيستەرىن اشقان العاشقى دۋبايلىق كومپانيا. بۇگىندە ول 45 ەلدە 95 تەن اسا باعىتتى قامتيتىن مارشرۋتتىق جەلىنى قۇردى، 16 مارشرۋت 2015 -جىلى جاريالاندى.
27 -قازاننان باستاپ رەسەيلىك «اەروفلوت» اۋە كومپانياسىنىڭ العاشقى رەيستەرى ماسكەۋدەن استاناعا، الماتىعا جانە كەرى باعىتتا جولاۋشىلاردى تاسىمالداۋدا.
سونداي-اق اۋە كومپانياسى قازاقستان قالالارىنا ۇشىرىلاتىن رەيستەرگە بيلەتتەرىن ساتا باستادى.
27 -قازاندا «اەروفلوت» العاش رەت استاناعا كوممەرتسيالىق رەيستى جۇزەگە اسىردى.
ال 1 -جەلتوقساندا «اەروفلوت» ماسكەۋ- الماتى باعىتىنداعى رەيستەردىڭ سانىن ەكى ەسەگە ۇلعايتتى.
«بەلاۆيا» كومپانياسى دا الماتى مەن مينسك اراسىنداعى رەيستەردىڭ جيىلىگىن ارتتىرىپ وتىر. قىسقى مارشرۋتقا تاعى ءبىر جيىلىك ەنگىزىلدى.
«BEK AIR» كومپانياسى 2015 -جىلدىڭ 20 -ناۋرىزىنان باستاپ «وسكەمەن- ءۇرىمجى» باعىتىندا چارتەرلىك رەيس اشتى. ول اپتاسىنا ءبىر رەت، جۇما كۇنى ۇشادى. سونداي-اق انتاليا مەن قىزىلوردا اراسىندا دا چارتەرلىك رەيس قاتىناي باستادى. بۇل باعىتتى «Sunday Airlines» كومپانياسىنىڭ بورتتارى ارقىلى «Kaz Union» تۋروپەراتورى ەنگىزىپ وتىر. S7 Airlines كومپانياسى نوۆو ءسىبىر- وسكەمەن اراسىن جالعايتىن جاڭا رەيستى ۇشىرا باستادى. ەندى ول اپتاسىنا ءبىر مارتە، دۇيسەنبى سايىن ۇشىپ تۇرماق.
اۆتور: جاسۇلان جولدىبايەۆ