بيىل «قازاقستان داۋىسى-2015» اتاعىن شەتتەن كوشىپ كەلگەن قانداسىمىز جەڭىپ الدى

استانا. قازاقپارات - وتكەن تۇندە جارتى جىلعا سوزىلعان ەلىمىزدەگى ايتۋلى ءان دوداسى - «قازاقستان داۋىسىنىڭ» ءۇشىنشى ماۋسىمى ءوز مارەسىنە جەتىپ، مونعوليادان كوشىپ كەلگەن قانداسىمىز مۇراتبەك حايرولدا جەڭىمپاز اتاندى.

بىرنەشە اپتادان بەرى «قازاقستان» ۇلتتىق تەلەارناسىنىڭ تىكەلەي ەفيرىندە كورەرمەننىڭ داۋىس بەرۋىمەن ۇزدىكتەر ىرىكتەلدى. سوڭعى كەزەڭدە 16 ءانشىنىڭ ىشىنەن كوپشىلىكتىڭ كوڭىلىنەن شىققان جانە كوپ داۋىس جيناعان 4 ونەرپاز عانا قالعان بولاتىن. ولار: رۇستەم نۇرجىگىتتىڭ توبىنان دارا شىققان قىتايدان كەلگەن قانداسىمىز ءجاننات ءادىلحان قىزى. ءمادينا ءسادۋاقاسوۆانىڭ شاكىرتى - ەربول تاجىبايەۆ. نۇرلان الباننىڭ شاكىرتى مۇراتبەك حايرولدا. ال الماس كىشكەنبايەۆتىڭ شاكىرتى ديانا يسمايلوۆا.

وتكەن سايىستا كورەرمەننىڭ 80 پايىز داۋىسىن جيناعان ۇمىتكەر مۇراتبەك حايرولدا بۇگىن بەلگىلى ءانشى عادىلبەك جانايمەن «حانشايىمىم» (ر. زايىتوۆ/ع. جاناي) ءانىن ورىندادى. كورەرمەننىڭ رياسىز قوشەمەتىنە بولەنىپ جۇرگەن ۇمىتكەر ديانا يسمايلوۆا ديلناز احماديەۆامەن بىرگە «كوز الدىمدا» (س. باقىتجان/س. باقىتجان) ءانىن شىرقادى. ۇزدىك اتانۋدان ۇمىتتىلەردىڭ ءبىرى - ءجاننات ءادىلحان قىزى ەركە ەسماحانمەن «اسىل ارمان» (ر. زايىتوۆ، ا. دۇيسەنوۆ) ءانىن ورىندادى. ەربول تاجىبايەۆ ءانشى ايقىنمەن بىرگە ءان ايتتى. العاشقى كەزەڭ قورىتىندىسى بويىنشا ديانا يسمايلوۆا جارىستى توقتاتتى.

ەكىنشى اينالىمدا قاتىسۋشىلار تالىمگەرلەرىمەن بىرگە ءان ايتۋى كەرەك بولاتىن. بۇل جولى تالىمگەرى ءمادينا سادۋاقاسوۆامەن «جايلاۋكول كەشتەرى» ءانىن ورىنداعان ەربول تاجىبايەۆ جارىستى اياقتادى. اقتىق سىندا ءجاننات ءادىلحان قىزى مەن مۇراتبەك حايرولدا باق تالاستىردى.

ايتا كەتەيىك، «قازاقستان داۋىسى» كونكۋرسىنىڭ باس جۇلدەسى - 5 ميلليون تەڭگە جەڭىمپازعا بۇيىردى.