استانادا وتەتىن «قازاقستان ارۋى-2015» بايقاۋىن ۇيىمداستىرۋشىلار ارنايى توسىن سىيلارمەن قۋانتپاق - فوتو

استانا. قازاقپارات - 10 - جەلتوقساندا استانانىڭ بەيبىتشىلىك جانە كەلىسىم سارايىندا قازىلار مەن كورەرمەندەر قازاقستاننىڭ ەڭ سۇلۋ ارۋىن تاڭدايتىن بايقاۋعا قىزۋ دايىندىق ءجۇرىپ جاتىر،

دەپ حابارلايدى misskazakhstan.kz.

2015 - جىلى بايقاۋدى ۇيىمداستىرۋشىلار كوپتەگەن توسىن سىيلار دايارلاپ قويدى. كورەرمەندەر وتاندىق ديزاينەرلەر مەن ارتىستەر قاتىساتىن تاڭعاجايىپ دۋمانعا ءتانتى بولادى. باس قويۋشى رەجيسسەر ايگىلى اكتەر، پروديۋسەر ماكسيم اكباروۆ.

 

بيىل «قازاقستان ارۋى-2015» بايقاۋى استانانىڭ بەيبىتشىلىك جانە كەلىسىم سارايىندا I LOVE ASTANA دەگەن ۇرانمەن وتەدى. قاتىسۋشىلارعا ارنالعان، جاس تا بولسا كەرەمەت استانامىزدىڭ اسەمدىگىنە ارنالعان كوستيۋمدەردىڭ ارنايى توپتاماسى جاسالدى، ول - استانانىڭ عيماراتتارى، مونۋمەنتتەرىنىڭ سۋرەتتەرى بار كويلەكتەر، بۇل استانانىڭ كورىكتىلىگىن بەينەلەيدى. ولاردى ءوزىمىزدىڭ وتاندىق ديزاينەرلەر دايىندايدى. نومىرلەردىڭ بىرەۋى قازاقستان حالىق اسسامبلەياسىمەن بايلانىستى. اسەرلى ءارى كوڭىل كوتەرەتىن دۋمان بولادى»، - دەپ ءبولىستى ماكسيم اكباروۆ.

  

 ءىس- شارانى قازاقستانداعى تەلەجۇرگىزۋشى دينارا ءساتجان جانە اكتەر تاۋەكەل ءمۇسىلىم جۇرگىزەدى.

«وسىنداي سۇلۋلىق مەرەكەسىنىڭ ءبىر بولشەگىنە اينالارىما وتە قۋانىشتىمىن. قاتىسۋشىلاردىڭ بارىنە كۇش- قۋات، توزىمدىلىك تىلەيمىن. سىزدەر ءۇشىن بۇل بايقاۋ ەستەن كەتپەيتىن وقيعالاردىڭ ءبىرى بولسىن. بارشاڭىزعا ساتتىلىك!»، - دەدى ءمۇسىلىم.

  

دۋماننىڭ مەيماندارى حالىقارالىق بايقاۋلاردىڭ لاۋرەاتى «Rin'go» جانە رەسەيلىك «باستى ساحنا» شوۋىنا قاتىسۋشىلار - «The Jigits».

  

ال «سلاۆيانسكي بازار-2015» بايقاۋىنىڭ جەڭىمپازى ديماش قۇدايبەرگەنوۆ جانە «جاڭا تولقىن-2015» بايقاۋىنىڭ لاۋرەاتى ادەمى حالىقارالىق ارەنادا جەڭىسكە جەتەلەگەن اندەرىن شىرقاماق. سونداي- اق ادەمى رەنات عايسيننىڭ وزىنە ارناپ جازعان «قۇستار» كومپوزيتسياسىن ورىنداپ بەرەدى.

  

«ارۋلاردىڭ بارىنە وزدەرىڭە سەنىمدى بولىڭدار دەگىم كەلەدى، باتىلدىق پەن كۇيزەلىسكە توتەپ بەرەر توزىمدىلىك تىلەيمىن. بۇل قاسيەتتەر بولماسا، بايقاۋلاردا باق سىناۋ وتە قيىن. ءوز باسىم ىلعي جەڭىسكە جەتەتىنىمە سەنىمدى بولامىن، مەنىڭ ارتىقشىلىعىم دا وسى. سۇلۋلارىمىزعا تەك ساتتىلىك تىلەيمىن. وسى ارۋلارىمىزدىڭ ارقاسىندا ءبىزدىڭ كەرەمەت ەلىمىزدى كۇللى الەم بىلەتىن بولادى»، - دەپ ءبولىستى ديماش قۇدايبەرگەنوۆ.

  

 تيتۋلى بار قاتىسۋشىلار 20 - قاراشادا ەلوردادا باس قوسىپ، اقتىق دۋمانعا دايىندىقتى باستايدى. ولار ءۇشىن «سۇلۋلىق پەن قايىرىمدىلىقتىڭ ۇيلەسىمى!» دەگەن ۇرانمەن وتكىزىلەتىن الەۋمەتتىك، سپورتتىق، قايىرىمدىلىق ءىس- شارالار جوسپارلانعان. 2015 - جىلى جەڭىمپازعا ارنالعان اقشالاي جۇلدە بەس ميلليون تەڭگە كولەمىندە بولادى دەپ بەكىتىلگەنىن اتاپ وتكەن ءجون.

  

جەڭىمپاز اقشالاي جۇلدەمەن قاتار «التىن وردا» اۆتورلىق ديزاين ءۇيى شەبەرلەرىنىڭ قولىمەن جاسالعان قازاقتاردىڭ ءداستۇرلى ەتنوجاساۋىنىڭ يەگەرى اتانادى. «شىعىس راپسودياسى» توپتاماسى قازاق حالقىنىڭ سالت- ءداستۇرىن قولونەر «تىلىندە» ايقىن كورسەتكەن. توپتاماعا «ماحاببات كورپەسى» جيىنتىعى، ساندىقتار، «بەدەرلى ورنەكتەر» جاستىعى، قولدان جاسالعان جاستىقتار، سونداي- اق ءداستۇرلى داستارحان كىرەدى. بۇل دۇنيەنىڭ ءبارىن ۇلتتىق سالت- ءداستۇردى جاڭعىرتۋعا بەل بۋعان ديزاينەر ىرزا تۇرسىنزادا ۇسىنىپ وتىر.