ءا. جاقسىبەكوۆ پەن ا. ۆينوكۋروۆ «استانا- دۋاتلون 2015» جارىسىنا قاتىستى - فوتو
جارىسقا شامامەن 300 ادام قاتىسىپ، ولاردىڭ قاتارىنا ەلوردا اكىمى ادىلبەك جاقسىبەكوۆ پەن وليمپيادا چەمپيونى الەكساندر ۆينوكۋروۆ قوسىلدى. سپورتشىلار 15 شاقىرىمدىق ارا قاشىقتىقتى ۆەلوسيپەدپەن ءوتىپ، ودان كەيىن 5 شاقىرىمعا جۇگىردى. ءاربىر قاتىسۋشىنىڭ ۋاقىتتارى تىركەۋ بارىسىندا ارنايى بەرىلگەن جەكە سيپتىڭ كومەگىمەن ەسەپتەلىندى.
سونىمەن جارىستىڭ باس جۇلدەسى قوس سايىستىڭ ناتيجەسىندە 40 مينۋت 10 سەكۋندتى كورسەتكەن 1996 -جىلى دۇنيەگە كەلگەن يۋريي شەربينينگە بۇيىردى. وعان فيتنەس كلۋبقا 1 جىل تەگىن بارۋعا ابونەمەنت پەن ۆەلوسيپەد سىيعا تارتىلدى.
«مۇنىڭ بارلىعى دا ەڭ الدىمەن سىزدەردىڭ دەنساۋلىقتارىڭىز ءۇشىن جاسالۋدا. سپورتىمىزدى دامىتۋ ماقساتىندا ءبىزدىڭ مەملەكەتىمىز جۇزەگە اسىرىپ جاتقان شارالار مەن پرەزيدەنتىمىز اتقارىپ جاتقان ىستەرى بۇگىندە ءوز جەمىسىن بەرۋدە. استانا سپورتتىڭ، سالاۋاتتى ءومىر سالتىنىڭ ۇلگىسىنە اينالىپ وتىر. استانا ۆەلوكومانداسى مەن ونىڭ مەنەدجەرى الەكساندر ۆينوكۋروۆ وزدەرىنىڭ جەتىستىكتەرىمەن قازاقستاننىڭ جانە ەلوردانىڭ اتىن الەمگە تانىتۋدا»، - دەدى ءا. جاقسىبەكوۆ.
اۆتور: مارلان جيەمباي
