سۋ سپورتىنان الەم چەمپيوناتى-2015: قازان قالاسىندا قانداي كورسەتكىشكە قول جەتكىزەمىز؟
تورتكۇل دۇنيەنىڭ ەڭ تاڭداۋلى سپورتشىلارى باس قوساتىن ءباسى بيىك دوداعا قازاقستان دا ءوز سپورتشىلارىن ۇكىلەپ قوسىپ وتىر.
جارىس جولىنا الەمنىڭ 190 ەلىنەن 2400 گە جۋىق سپورتشى جۇزۋدەن، اشىق سۋدا جۇزۋدەن، سينحروندى جۇزۋدەن، ۆاتەرپولدان، حاي-دايۆينگتەن جانە سۋعا سەكىرۋدەن سايىسقا ءتۇسىپ، جالپى 75 جۇلدەلەر جيىنتىعىن ساراپقا سالادى.
جاسىراتىنى جوق، ەلىمىزدە سۋ سپورتى كەنجە دامىعان سپورت تۇرلەرىنىڭ ءبىرى. ولاي دەيتىنىمىز - ءالى كۇنگە سپورتتىڭ وسى تۇرىنەن الەمدىك دودادا ورەندەرىمىز بىردە-ءبىر جۇلدەگە قول جەتكىزە الماي كەلەدى. ءبىراق، بولاشاعىنان ءۇمىت كۇتتىرەتىن جاستارىمىز ەندى-ەندى بوي كورسەتە باستادى. سولاردىڭ ءبىرى - ەندى عانا 20 جاسقا تولىپ جاتقان دميتري بالاندين. ول 2014-جىلى ينچحوندا وتكەن جازعى ازيا ويىندارىندا ءبىر ەمەس، ءۇش بىردەي التىنعا قول جەتكىزىپ، ەل مەرەيىن ءبىر كوتەرىپ تاستاعانى ءالى ەسىمىزدە. وسى جولى دا دميتريگە ۇلكەن ءۇمىت ارتىپ وتىرعانىمىز جاسىرىن ەمەس. سونداي-اق، جۇزۋدەن ازيا ويىندارىنىڭ كۇمىس جۇلدەگەرى ەكاتەرينا رۋدەنكو، سينحروندى جۇزۋدەن اپەكەلى-ءسىڭلىلى نەميچتەر، ۆاتەرپولدان ەرلەر قۇراماسىنان جۇلدە كۇتىلىپ وتىر.
جالپى، قازاقستاندىق سپورتشىلار قازانداعى الەم چەمپيوناتىندا 5 سپورت ءتۇرى بويىنشا جارىستارعا قاتىسادى. اتاپ ايتار بولساق، ۆاتەرپول، سۋعا سەكىرۋ، ءجۇزۋ، سينحروندى ءجۇزۋ جانە اشىق سۋدا ءجۇزۋ سپورت تۇرلەرى بويىنشا جۇلدەگە تالاسادى.
وسى جەردەن ءسال شەگىنىس جاساپ، سۋ سپورتى تۇرلەرىنەن وتكەن الەم چەمپيوناتتارىنىڭ تاريحىنا قىسقاشا توقتالىپ وتەيىك. سۋ سپورتى تۇرلەرى بويىنشا حالىقارالىق ءىرى جارىس، وليمپيادالىق ويىندارمەن قاتار حالىقارالىق ءجۇزۋ فەدەراتسياسى (FINA) ەگيداسىمەن، 1973-جىلدان باستاپ وتكىزىلىپ كەلەدى.
الەم بىرىنشىلىگى ءجۇزۋ (باسسەيندە جانە اشىق سۋدا ءجۇزۋ)، سۋعا سەكىرۋ، سۋ دوبى جانە سينحروندى ءجۇزۋ سياقتى سۋ سپورتى تۇرلەرىنەن وتكىزىلەدى.
1978-جىلدان 1998-جىلعا دەيىن سپورتتىڭ بۇل تۇرىنەن الەم چەمپيوناتى ءتورت جىلدا ءبىر رەت وتكىزىلىپ كەلگەن بولاتىن. كەيىن، 2001-جىلدان باستاپ، قازىرگە دەيىن ەكى جىلدا ءبىر رەت ۇيىمداستىرىلىپ كەلەدى.
سۋ سپورتىنان الەم چەمپيوناتىندا ەڭ كوپ جۇلدە جۇزۋشىلەر اراسىندا ساراپقا سالىنادى. بيىلعى الەم بىرىنشىلىگىندە 42 مەدال جيىنتىعى وسى جۇزۋشىلەر اراسىندا ساراپقا سالىنادى. ودان كەيىنگى ورىنداردا - سۋعا سەكىرۋ (13)، سينحروندى ءجۇزۋ (9)، اشىق سۋدا ءجۇزۋ (7) جانە سۋ دوبى (2) مەن حاي-دايۆينگ (2) سەكىلدى سپورت تۇرلەرى اراسىندا جۇلدەلەر ساراپقا سالىنادى.
بۇل باسەكەلەردىڭ بارلىعى «قازان ارەنا» ستاديونى (سىيىمدىلىعى - 45000 كورەرمەن)، سۋ سپورت تۇرلەرى سارايى (4166) جانە قازان وزەنىندە (1500) وتەدى. ءبىز جارىس جەڭىمپازدارى مەن جۇلدەگەرلەرىنىڭ يەلەرىن تولىقتاي جارىس اياقتالاتىن 9- تامىز كۇنى بىلەتىن بولامىز.
ءسوزدىڭ رەتى كەلگەندە ايتا كەتەيىك، استانا قالاسى 2020-جىلى سۋ سپورتى تۇرلەرىنەن الەم چەمپيوناتىن وتكىزۋگە ءوز كانديداتۋراسىن ۇسىنعان بولاتىن. الايدا، شىلدەنىڭ 22- كۇنى تاتارستان استاناسى قازاندا وتكەن داۋىس بەرۋ ناتيجەسىندە 2020-جىلعى الەم چەمپيوناتى ءابۋ-دابي (ب ا ءا) قالاسىندا وتەتىن بولىپ بەكىتىلدى.
بۇل جايىندا حالىقارالىق ءجۇزۋ فەدەراتسياسىنىڭ (FINA) ارنايى باسپا ءسوز ءماسليحاتىندا جاريالاندى.
ال 2016-جىلى قىسقا قاشىقتىقتا جۇزۋدەن الەم چەمپيوناتى كانادانىڭ ۆيندزور قالاسىندا وتسە، 2018-جىلى حانچجوۋدا (قىتاي) جالاۋىن جەلبىرەتەدى.
قازاقستان سپورتشىلارىنىڭ جارىس كەستەسىن مىنا جەردەن كورە الاسىزدار.
اۆتور: كۇنسۇلتان وتارباي
