قازاقستاندىق ءانشى ديماش قۇدايبەرگەنوۆ «سلاۆيان بازارى-2015» بايقاۋىنىڭ گران-پريىن يەلەندى
قازاقستاندىق ءانشى ديماش قۇدايبەرگەن بۇگىن جازعى امفيتەاتر ساحناسىندا باس جۇلدەنى جانە ارنايى «ليرا» سىيلىعىنا يە بولدى. بۇل تۋرالى بەلتا ءتىلشىسى «ۆيتەبسكتەگى سلاۆيان بازارى» XXIV حالىقارالىق سايىسىنىڭ جابىلۋ سالتاناتى راسىمىنەن حابارلادى.
ديماش قۇدايبەرگەن ەكى كۇننىڭ قورىتىندىسى بويىنشا ەڭ جوعارى بالل - 175 بالل جينادى. سونداي- اق ونىڭ جەرلەسى قازاقستاندىق لۋيزا نۇرقۋاتوۆا دا «ۆيتەبسك-2015» بالالار بايقاۋىنىڭ گران- پري جۇلدەسىن الدى.
مەرەكەلىك شاراعا قاتىسقان بەلارۋس پرەزيدەنتى ا. لۋكاشەنكو ءوز سوزىندە بارلىق سايىسقا قاتىسۋشىلارعا ۆيتەبسك ساحناسى بولاشاقتارىنا جارقىن جول اشاتىن باسپالداق بولۋىن تىلەدى.
«بۇنداي سايىستا جەڭىسكە جەتۋ بولاشاققا دەگەن زور تالپىنىستىڭ بەلگىسى. سايىس بارىسىندا ادام تەك ءوزىنىڭ دارىنىن عانا ەمەس، مىنەزىن دە كورسەتەدى»، - دەدى ا. لۋكاشەنكو.
ءبىرىنشى جۇلدە (15 مىڭ ا ق ش دوللارى) مەن ارنايى سىيلىق بەلارۋستىك ۆالەريا گريبۋسوۆاعا تابىستالدى. ەكىنشى ورىنعا «10 مىڭ ا ق ش دوللارى) بولگاريادان كەلگەن نيكولاي مانولوۆ يە بولدى. ۋكراينالىق اننا تۆەردوستۋپ ءۇشىنشى ورىنعا (5 مىڭ ا ق ش دوللارى) لايىق دەپ تانىلدى.
ال ديماش قۇدايبەرگەنگە 20 مىڭ ا ق ش دوللارى كولەمىندە اقشالاي سىيلىققا يە بولدى. شارانىڭ سالتاناتتى جابىلۋ راسىمىندە قازاقستاندىق ءانشى تاعى ءبىر رەت ونەرىمەن ۆيتەبسكتىك تىڭدارماندارىن ءتانتى ەتتى.
