قازاقستاندا يادرولىق بانك قۇرۋ تۋرالى حالىقارالىق شارت 2015 - جىلى تامىز ايىندا قابىلدانادى
بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگتە ق ر س ءى م ەرەكشە تاپسىرمالار جونىندەگى ەلشىسى بارلىباي سادىقوۆ ءمالىم ەتتى.
قازاقستان حالىقارالىق اگەنتتىگىنىڭ تومەن بايىتىلعان ۋراننىڭ حالىقارالىق بانكىن قۇرۋ تۋرالى ۇسىنىس تاستاعان بولاتىن.
«بۇل ۇسىنىس حالىقارالىق قاۋىمداستىقتىڭ كەڭ قولداۋىنا يە بولدى. ۇستىمىزدەگى جىلى 11 - ماۋسىمدا حالىقارالىق اتوم ەنەرگەتيكاسى اگەنتتىگىنىڭ باسقارۋشىلار كەڭەسى قازاقستاندا تومەن بايىتىلعان ۋران بانكىن قۇرۋ تۋرالى كەلىسىمدى جانە رەسەي فەدەراتسياسىمەن ترانزيتتىك كەلىسىمدى بەكىتتى. اتالعان كەلىسىمگە قول قويۋ بيىل قازاقستاندا تامىز ايىنىڭ اياعىندا يادرولىق سىناقتارعا ءىس- قيمىلدىق حالىقارالىق كۇنى قارساڭىندا اگەنتتىكتىڭ باس ديرەكتورى يۋكيو امانونىڭ قاتىسۋىمەن جوسپارلانۋدا. بانككە قاتىستى حالىقارالىق اتوم ەنەرگياسى اگەنتتىگىمەن كەلىسسوزدەر قازاقستاننىڭ بارلىق مۇددەلى مەملەكەتتىك ورگاندارىمەن بىرلەسە 4 جىل بويى جۇرگىزىلدى»، - دەدى ول.
ونىڭ سوزىنە قاراعاندا، بانك وسكەمەندە ءۇلبى مەتاللۋرگيالىق زاۋىتى اۋماعىندا ورنالاسادى. بايىتىلعان ۋران ماگاتە- گە قارايتىن بولادى. بانكتىڭ قۇرىلۋى بارشا الەمدە ۋراندى بەيبىت ماقساتتا قولدانۋعا مۇمكىندىك بەرەدى.
« ماتەريالدار تولىعىمەن ماگاتە- نىڭ يەلىگى دەپ سانالاتىن بولادى. بانك وسكەمەندە ءۇلبى مەتاللۋرگيالىق زاۋىتى اۋماعىندا ورنالاسادى. ماگاتە بۇل ورىندى جايدان جاي تاڭداعان جوق. مۇندا ءتيىستى تەحنولوگيالار مەن بىلىكتى ماماندار بار. يادرولىق ماتەريالدى قولدانۋدىڭ مول تاجىريبەسى دە جوق ەمەس. قارجىلاندىرۋ 150 ميلليون دوللاردى قۇرايدى. وعان ەرىكتى تۇردە ءبىرقاتار ەلدەر قارجى قوسادى. ماگاتە- عا اتالمىش سوما تولەنىپ قويعان. ا ق ش - 49,5 ميلليون، ەۋروپالىق وداق - 25 ميلليون ەۋرو، كۋۆەيت پەن ب ا ءا - 10 ميلليون دوللاردان، نورۆەگيا ۇكىمەتى - 5 ميلليون، سونىمەن قاتار يادرولىق قاۋىپكە قارسى كۇرەس حالىقارالىق قورى 50 ميلليون دوللار ءبولدى. قازاقستان كوپ شىعىن شىعارمايدى، ونىڭ تەك ساقتالۋىنا قاجەتتى كەتەتىن ۇساق شىعىنداردى موينىنا الادى»، - دەپ اتاپ ءوتتى ول.
ونىڭ اتاپ وتكەنىندەي، يادرولىق ماتەريالداردى قولدانۋ تالابى جاڭا زامانعا ساي بولالى. ول حالىققا جانە ەكولوگياعا اسەر ەتپەيدى. سونىمەن قاتار ارنايى تەحنولوگيالار بولماعاندىقتان، تومەن بايىتىلعان ۋران قورى لاڭكەستەرگە دە ەشقانداي قىزىعۋشىلىق تۋدىرمايدى. يادرولىق وتىن قورىنىڭ قۇرىلۋى كەز كەلگەن ەلدىڭ بەيبىت ۋران ونىمىنە قول جەتكىزۋىنە مۇمكىندىك تۋدىرادى. ۋران بايىتۋدا تەحنولوگيالارى جوق ەلدەر وزدەرىنىڭ ەلدەرىندە اتوم ەلەكتر ستانساسىنا وتىن ساتىپ الادى.
اۆتور: جاسۇلان جولدىبايەۆ 
