رەسپۋبليكالىق «جاس قانات-2015» كونكۋرسىنىڭ جەڭىمپازى انىقتالدى

استانا. قازاقپارات - استانادا بەيبىتشىلىك جانە كەلىسىم سارايىندا 24- «جاس قانات» رەسپۋبليكالىق كونكۋرسىنىڭ فينالى ءوتتى.

جاس ورىنداۋشىلاردىڭ دوداسىندا كوكشەتاۋ قالاسىنىڭ اتىنان قاتىسقان رينات تەمىرجان جەڭىسكە جەتتى. ول سونداي-اق، باس جۇلدەمەن قوسا ەلوردا اكىمىنىڭ اقشالاي سىيلىعىن دا قانجىعاعا باستى.

ەكىنشى جانە ءۇشىنشى ورىندى قاراعاندىلىق لاۋرا ايتبايەۆا مەن استانالىق سۇلتان احمەت يەلەندى.

بيىل 15 قاتىسۋشىنىڭ فينالعا تەك التاۋى عانا جەتتى. ولار: استانالىق ەركەبۇلان تۇرماحامبەتوۆ پەن سۇلتان احمەت؛ قاراعاندىلىق لاۋرا ايتبايەۆا؛ ەكىباستۇز قالاسىنىڭ اتىنان قاتىسۋشى ايبار اشكەيەۆ؛ ستەپنوگور قالاسىنىڭ ونەرپازى ۆلاديمير نوۆيكوۆ؛ سونداي-اق، كوكشەتاۋلىق ءارى وسى كونكۋرستىڭ جەڭىمپازى بولعان رينات تەمىرجاندار ەدى.

ايتا كەتەيىك، كونكۋرستىڭ ۇيىمداستىرۋشىلارى - «حابار» اگەنتتىگى، استانا قالاسىنىڭ اكىمدىگى جانە «ازيا داۋىسىنىڭ» ديرەكتسياسى.