قازاقستاندا 2015-جىلى قانداي ماماندىقتارعا كوپ گرانت بولىنەتىنى بەلگىلى بولدى
بيىل گرانت ءبولۋ ءتارتىبى وزگەرىسسىز قالادى. گرانت وقۋشىعا بايقاۋ ناتيجەسىنە سايكەس بەرىلەدى.
پورتالدىڭ مالىمەتىنشە، وقۋشىنىڭ ۇ ب ت- دان العان بالىمەن قاتار اۋىلدىق ايماقتا تۇراتىنى جانە وتباسىنىڭ الەۋمەتتىك-تۇرمىستىق جاعدايى ەسكەرىلەدى. مىسالى، اتا-اناسى قايتىس بولعان، مۇگەدەك وقۋشىلارعا بايقاۋ بارىسىندا ارنايى جەڭىلدىكتەر تاعايىندالادى. بيىل ءبىلىم جانە عىلىم مينيسترلىگىنىڭ تاپسىرىسىنا سايكەس، ەلىمىزدىڭ الەۋمەتتىك-ەكونوميكالىق جاعدايىنا اسەر ەتەتىن ماماندىقتارعا كوپ كوڭىل ءبولىندى.
«بيىل ج و و گرانتىنا يە بولۋدى كوزدەگەن وقۋشى كەلەسىدەگىدەي ماماندىقتاردى تاڭداعانى ءجون: كولىكتەر مەن كولىك قۇراستىرۋ، ازىق-تۇلىك ءوندىرىسىنىڭ تەحنولوگياسى، مۇناي-گاز حيمياسى، تەمىرجول تەحنيكاسىن جاساۋ جانە ەلەكترمەن قامتاماسىز ەتۋ، پەداگوگيكالىق ماماندىقتار، سونىمەن قاتار، بيداي، ءسۇت، ەت ءونىمى سەكىلدى ەلىمىزدىڭ وركەندەۋىنە ۇلەسىن قوساتىن اۋىل شارۋشىلىعىنا قاتىستى ماماندىقتار، ەگىن شارۋاشىلىعى مەن سۋدى ۇنەمدەۋ تەحنولوگياسى. ال مەديتسينا مەن اقپاراتتىق تەحنولوگيالار ماماندىقتارىنا گرانت از بولىنەدى»، - دەلىنگەن جاريالانىمدا.
ايتا كەتەيىك، بيىل ق ر ءبىلىم جانە عىلىم مينيسترلىگى 32788 گرانت تاعايىندالعان جوبانى دايىنداپ جاتىر. اتالعان گرانتتىڭ 500 ورنى سىرتتاي وقۋ بولىمىنە تيەسىلى.
