سايلاۋ-2015: كانديدات ت. سىزدىقوۆ قوستانايدا «بولشيەۆيچكا» ا ق تىگىن فابريكاسىنىڭ ۇجىمىمەن كەزدەستى

 استانا. قازاقپارات - بۇگىن قازاقستان كوممۋنيستىك حالىقتىق پارتياسىنان ۇسىنىلعان قازاقستان رەسپۋبليكاسى پرەزيدەنتتىگىنە كانديدات تۇرعىن سىزدىقوۆ قوستاناي قالاسىندا «بولشيەۆيچكا» ا ق تىگىن فابريكاسى ۇجىمىنىڭ وكىلدەرىمەن كەزدەستى.

كەزدەسۋ باسىندا تۇرعىن ىسقاق ۇلى سايلاۋالدى تۇعىرناماسىنىڭ نەگىزگى اسپەكتىلەرىن ۇسىندى.

كوممۋنيستەر ءۇشىن ماركسيزم - قورشاعان ءومىردىڭ وزگەرۋىنە، قوعامدىق دامۋداعى جاڭا قۇبىلىستار مەن دەرەكتەردى جيناقتاپ، ءمانىن تۇسىنۋمەن بايلانىستى ۇدايى دامىپ كەلە جاتقان جاسامپاز عىلىم بولىپ تابىلادى.

العا قويىلعان ماقساتتارعا جەتۋ ءۇشىن ماركسيزم- لەنينيزم مەن قازاقستان كوممۋنيستىك حالىقتىق پارتياسىنىڭ باعدارلامالىق ۇستانىمدارىن جانە ونىڭ قىزمەتىن ناسيحاتتاۋ قاجەت.

بۇگىن مەن قازىرگى زاماندا ادامگەرشىلىك قۇندىلىقتارىن وزگەرتەتىن نەگىزگى ماسەلەلەر تۋرالى پارتيانىڭ اتىنان مالىمدەپ وتىرمىن.

تەك كوممۋنيستەر عانا ەمەس، باسقا دا ءىرى ساياساتكەرلەردىڭ، ەكونوميستەردىڭ، عالىمداردىڭ پايىمداۋىنشا، باتىس قوعامى ادىلەتسىز بولىپ تابىلادى. كوممۋنيستىك ويلاردى ىسكە اسىرۋ ادام مەن تابيعاتتىڭ ۇيلەسۋىنە سەپتىگىن تيگىزەدى.

بۇگىن باتىستىق تۇرمىس سالتىنىڭ كەمشىلىكتەرى مادەنيەت سالاسىندا انىق بايقالادى.

قازىرگى زامانعى باتىس قوعامى كاپيتاليستىك جولدىڭ الىسقا اپارمايتىنىن كورسەتىپ وتىر.

زاماناۋي الەمدەگى تويىمسىز تۇتىنۋشىلىق دەگەنىمىز نە؟ بۇل قولدان جاسالعان جالعان قۇبىلىس. ول «ءومىردىڭ ءمانى - جەكە باستىڭ قامى» دەگەن تەرىس تاربيە بەرەدى.

ادامگەرشىلىك قۇندىلىقتار جۇيەسىن ومىرگە دەگەن قاناعاتسىز كوزقاراس الماستىردى. بۇل وسكەلەڭ ۇرپاقتى تاربيەلەۋدە ءبىرقاتار كۇردەلى ماسەلەلەر تۋىنداتۋدا.

باتىس مادەنيەتى بيزنەسكە اينالدى. ونىڭ قۇندىلىقتارىنىڭ باستى شارتى سۇرانىس پەن ۇسىنىس قارىم- قاتىناسىنا عانا نەگىزدەلەدى.

سوڭعى جىلدارى الەمدى تولقىتقان ساياسي جانە ەكونوميكالىق داعدارىستار جيىلەپ كەتتى. ەكونوميكا مەن قارجى سالالارىن دەندەگەن ترانسۇلتتىق كورپوراتسيالاردىڭ ۇستەمدىگى قوعامنىڭ ىدىراۋىنا الىپ كەلدى.

باتىس قوعامى سۇيەنىپ كەلگەن ورتا تاپ بىرتە- بىرتە مورالدىك تۇرعىدا ازىپ- توزعان توعىشار تۇتىنۋشىعا اينالىپ بارادى.

پروگرەسستى رەگرەسس الماستىردى. ادامزات وسى كۇنگە دەيىن جيناقتاپ كەلگەن مورالدىك جانە مادەني قۇندىلىقتار كولەڭكەگە كەتىپ، ءبىر مەزەتتىك قاجەتتىلىكتى قاناعاتتاندىرۋ باستى ماقساتقا اينالدى.

ق ك ح پ قوستاناي وبلىستىق كوميتەتىنىڭ ءبىرىنشى حاتشىسى ا. الىمبايەۆ بايانداعانداي: «كانديداتىمىزدىڭ سايلاۋالدى شتابى ۇگىت- ناسيحات جۇمىستارىن جۇرگىزىپ، ءتيىستى اقپاراتتىق قىزمەت اتقارۋدا. شتابىمىزدا 5 سەنىمدى تۇلعا بار. ولار ۇگىت- ناسيحات ماتەريالدارىن ورنالاستىرىپ، حالىقپەن كەزدەسۋلەر ۇيىمداستىرۋمەن اينالىسادى» .

 سونداي- اق، ۇگىت- ناسيحات جۇمىسىندا «قازاقستان كوممۋنيسى» گازەتى، پارتيا سايتى، ينتەرنەت پەن الەۋمەتتىك جەلىلەر بەلسەندى قولدانىلۋدا.