قازاقپارات 2015 - جىلعى ءىرى سپورتتىق دودالار كەستەسىن ۇسىنادى

استانا. قازاقپارات - جىلقى جىلى قازاق سپورتى ءۇشىن اسا تابىستى بولعانىن وسىعان دەيىن جازدىق.

ال، قوي جىلىندا سپورتشىلارىمىزدى قانداي ءىرى دودالار كۇتىپ تۇر؟

بۇگىن وقىرمان نازارىنا 2015 -جىلى وتەتىن ەڭ باستى سپورت باسەكەلەرىن ۇسىنعاندى ءجون كوردىك. ولاي بولسا، بيىلعى وتەتىن الەمدىك ءىرى دودالار قاي ەلدە، قاشان وتەدى؟

قاڭتار مەن اقپان ارالىعىندا وتەتىن جارىستار:

قاڭتاردىڭ 15 ى  مەن 25 ى ارالىعىندا اۆستريادا فريستايلدان جاسوسپىرىمدەر مەن ەرەسەكتەر اراسىنداعى الەم چەمپيوناتى جالاۋىن جەلبىرەتەدى.

قاڭتاردىڭ 24 ى مەن اقپاننىڭ 4 ى ارالىعىندا گرانادا (يسپانيا) مەن وسربلەدە (سلوۆاكيادا) XXVII قىسقى ۋنيۆەرسيادا وتەدى.

اقپان مەن ناۋرىز ارالىعىندا وتەتىن جارىستار:

اقپاننىڭ 18 ى مەن ناۋرىزدىڭ 1 ى ارالىعىندا شۆەتسيادا شاڭعى سپورتىنان الەم چەمپيوناتى وتەدى.

ال بيىل اقپاننىڭ 28 ى مەن ناۋرىزدىڭ 1 ى كۇندەرى ارالىعىندا ەلوردا تورىندە «الاۋ» مۇز سارايىندا تۇڭعىش رەت كونكيمەن جۇگىرۋ بويىنشا سپرينتتىك كوپسايىستان الەم چەمپيوناتى وتەدى. بۇل دودا وسى جىلى ەلىمىزدە وتەتىن ءىرى باسەكەلەردىڭ ءبىرى بولىپ سانالماق.

ال ناۋرىزدىڭ 2-8 - كۇندەرى تالليندە (ەستونيا) مانەرلەپ سىرعاناۋدان جاسوسپىرىمدەر اراسىنداعى الەم چەمپيوناتى وتەدى.

سونداي- اق، وسى ناۋرىز ايىنىڭ 3-15 ارالىعىندا فينليانديادا بياتلوننان الەم چەمپيوناتى جانە ناۋرىزدىڭ 13-15 كۇندەرى ماسكەۋدە شورت- ترەكشىلەر الەمدىك سىندا باق سىنايدى.

بيىلعى مۇز ايدىندا وتەتىن باستى دودالاردىڭ تاعى ءبىرى - 23-29 ناۋرىز ارالىعىندا قىتايدىڭ شاڭحاي قالاسىندا مانەرلەپ سىرعاناۋدان وتەتىن الەم بىرىنشىلىگى.

ءساۋىر ايىندا وتەتىن جارىستار:

پولشانىڭ كراكوۆ

ءساۋىردىڭ 18-24 ارالىعىندا پولشانىڭ كراكوۆ قالاسىندا شايبالى حوككەيدەن الەم بىرىنشىلىگى وتەدى. وندا ەلىمىزدىڭ قۇراماسىيتاليا، جاپونيا، ۋكراينا، ۆەنگريا، پولشا قۇرامالارىمەن ءبىر توپتا ونەر كورسەتەدى. قايسىسى جەڭىسكە جەتسە، جوعارى توپقا جولداما الادى.

مامىر ايىندا وتەتىن جارىستار:

مامىر ايىنىڭ 12-18 - كۇندەرى ارالىعىندا رەسەيدىڭ چەليابينسك قالاسىندا تاەكۆوندودان الەمدىك باسەكە وتەدى. سونىمەن قاتار مامىردىڭ 6-10 - كۇندەرى ارالىعىندا دوحادا (كاتار) كۇرەس تۇرلەرىنەن ازيا چەمپيوناتى وتەدى. سونىمەن قاتار 20-28 - مامىر ارالىعىندا بەيجىڭدە ۆولەيبولدان ازيا چەمپيوناتى وتەدى. بۇل دوداعا قازاقستان ايەلدەر قۇراماسى قاتىسادى.

ماۋسىم ايىندا وتەتىن جارىستار:

ماۋسىم ايىنىڭ 2-11 ارالىعىندا بانگكوكتا (تايلاند) بوكستان ازيا چەمپيوناتى وتەدى. بۇل باسەكەگە قازاقستاننىڭ بىلعارى قولعاپ شەبەرلەرى دە قاتىسادى. سونىمەن قاتار ماۋسىمنىڭ 1-5 ارالىعىندا كوبەدە جەڭىل اتلەتيكادان ازيا چەمپيوناتى وتەدى.

شىلدە ايىندا وتەتىن جارىستار:

شىلدە ايىنىڭ 3-14 ارالىعىندا وڭتۇستىك كورەيانىڭ كۆاندجۋ قالاسىندا جازعى ۋنيۆەرسيادا ويىندارى وتەدى.

ال وسى شىلدە ايىنىڭ 31 - كۇنى كۋالا- لۋمپۋردا (مالايزيا) 2022 - جىلعى قىسقى وليمپيادانى وتكىزەتىن قالا بەلگىلى بولاتىنىن ايتا كەتۋ كەرەك. سەبەبى، قىسقى ويىنداردى قابىلداۋعا ەلىمىزدىڭ باستى قالالارىنىڭ ءبىرى - الماتى قالاسى دا ۇمىتكەر ەكەنىن ەستەن شىعارماۋىمىز كەرەك. ال الماتىنىڭ باستى قارسىلاسى - قىتاي استاناسى بەيجىڭ قالاسى.

شىلدە مەن تامىز ايىندا وتەتىن جارىستار:

شىلدە ايىنىڭ 13-19 - كۇندەرى ماسكەۋدە سەمسەرلەسۋدەن الەم بىرىنشىلىگى وتەدى. ال شىلدەنىڭ 24 ى مەن تامىزدىڭ 8 ى كۇندەرى ارالىعىنداتاتارستان استاناسى قازان قالاسىنداعى سۋ سپورت تۇرلەرىنەن الەم چەمپيوناتى وتەتىن بولادى.

ال تامىز ايىنىڭ 22-30 ارالىعىندا قىتاي استاناسى بەيجىڭ قالاسىندا جەڭىل اتلەتيكادان الەم چەمپيوناتى وتەدى.

ال وسى ايدا، ناقتىراق ايتساق، تامىزدىڭ 25-30 - كۇندەرى ارالىعىندا استانادا تۇڭعىش رەت تاعى ءبىر بايراقتى باسەكەنىڭ كۋاسى بولامىز. وسى كۇندەر ارالىعىندا الەمنىڭ ەڭ ۇزدىك دزيۋدوشىلارى ەلوردا تورىندە الەم بىرىنشىلىگىنىڭ جۇلدەلەرىن ساراپقا سالاتىن بولادى. بۇل بىرىنشىلىكتىڭ باستى ەرەكشەلىگى - جارىس جولىندا جاقسى ناتيجە كورسەتكەن سپورتشىلارعا رەيتينگتىك ۇپايلار بەرىلەدى. سوندىقتان ءوز ەلىمىزدە وتەتىن باستى دودادا جەرلەستەرىمىز ايانىپ قالماسى انىق. بۇل ءباسى بيىك باسەكەگە ەلىمىزدىڭ ەرلەر جانە ايەلدەر قۇراماسى تولىق قۇرامدا ونەر كورسەتەدى.

قىركۇيەك ايىندا وتەتىن جارىستار:

قىركۇيەكتىڭ 7-15 كۇندەرى ارالىعىندا ا ق ش- تىڭ لاس- ۆەگاس قالاسىندا كۇرەس تۇرلەرىنەن الەم چەمپيوناتى وتەدى. كۇرەستىڭ ءۇش تۇرىنەن وتەتىن بۇل بايراقتى باسەكەنىڭ باستى ەرەكشەلىگى - ريو- دە جانەيرو وليمپياداسىنىڭ ليتسەنزياسى ساراپقا سالىنادى.

سونىمەن قاتار وسى ايدىڭ سوڭعى 10 - كۇنىندە قازاقستان ۆەلوسپورتشىلارى ريچموندتاعى (ا ق ش) الەم چەمپيوناتىنا قاتىسادى.

قازان ايىندا وتەتىن جارىستار:

قازان ايىنىڭ 5-18 - كۇندەرى ارالىعىندا كاتار استاناسى دوحادا بوكستان الەم چەمپيوناتى وتەدى.

قاراشا ايىندا وتەتىن جارىستار:

قاراشا ايىنىڭ 20-29 ارالىعىندا حيۋستوندا (ا ق ش) اۋىر اتلەتيكادان الەم چەمپيوناتى وتەدى. وندا قازاقستان زىلتەمىرشىلەرى ريو- دە- جانەيرو جولداماسىنا تالاسادى.

ال، 2015 - جىلى الادوپ باسەكەلەرىنەن ازيا، امەريكا، افريكا چەمپيوناتتارى ۇيىمداستىرىلادى. ازيا كۋبوگى اۆستراليادا (قاڭتاردىڭ 9-31 اراسىندا)، افريكا كۋبوگى ەكۆاتورلىق گۆينەيادا (قاڭتاردىڭ 17 سى مەن اقپاننىڭ 8 ى ارالىعىندا) ، وڭتۇستىك امەريكا كۋبوگى چيليدە (ماۋسىمنىڭ 11 ى مەن شىلدەنىڭ 4 ى ارالىعىندا)، سولتۇستىك امەريكا چەمپيوناتى ا ق ش پەن كانادادا (شىلدەنىڭ 7 سى مەن 26 سى اراسىندا) وتەتىن بولادى.

ماۋسىمنىڭ 12-28 ى ارالىعىندا العاش رەت ەۋروپا ويىندارى وتەدى. باكۋدە وتەتىن بۇل ويىندارعا تەك ەۋروپا ەلدەرى عانا قاتىستىرىلادى.

مىنە، 2015 - جىلى وتەتىن ەڭ باستى دودالار! 2016 - جىلى ريو- دە جانەيرو وليمپياداسى وتەتىنىن جاقسى بىلەمىز. بيىل نەگىزىنەن وليمپياداعا جولدامالار تاراتىلاتىن جىل. سوندىقتان قازاق سپورتشىلارىنا ەش بوساڭسۋعا بولمايدى.

دايىنداعان كۇنسۇلتان وتارباي