16:17, 12 - جەلتوقسان 2014 | GMT +5
استانادا 2015-جىلى جارىقپەن جانە مۋزىكامەن سۇيەمەلدەنەتىن سۋبۇرقاعى بار جاڭا پارك اشىلادى
استانا. قازاقپارات - استانا قالاسىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ حابارلاۋىنشا، ەلوردادا جاڭا پارك اشۋ كوزدەلگەن. جاڭا پارك جاۋقازىن مەن م. ماقاتايەۆ كوشەلەرىنىڭ قيىلىسىندا «اراي» پاركىنىڭ جانىنداعى جاسىل ايماقتا ورنالاسادى، دەپ حابارلادى astana.kz.
پارك اۋماعىنىڭ ورتاسىندا جارىقپەن جانە مۋزىكامەن سۇيەمەلدەنەتىن سۋبۇرقاق بولادى.
سونىمەن قاتار، پارك اۋماعىندا سپورتتىق، بالالارعا ارنالعان ويىن-ساۋىق الاڭدارى اشىلادى. پارك جوسپارىن جاساۋ كەزىندە كوشەتتەر وتىرعىزۋ جۇيەسىنىڭ نەگىزگى قاعيداتتارى نەگىزگە الىندى، وعان ادامدارعا پاركتە تازا اۋادا دەمالۋعا ەڭ قولايلى جاعدايلار جاساۋ ماقساتىندا ۇيىمداستىرىلعان تابيعي (رەلەف، وسىمدىك، سۋ) جانە جاساندى (ساۋلەتتىك-ينجەنەرلىك قۇرىلىستار) كومپونەنتتەردىڭ جيىنتىعى جاتادى. پارك قۇرىلىسىندا قىلقان جاپىراقتى اعاشتار، بۇتالار، گۇلزارلار وتىرعىزۋ كوزدەلگەن.
ايتا كەتەيىك، پارك اۋماعىنىڭ قۇرىلىسى قارجىنىڭ بولىنۋىنە قاراي 2015-جىلدىڭ باسىندا جوسپارلانىپ وتىر.
