قىسقى وليمپيادا ويىندارىن وتكىزۋگە ۇمىتكەر قالالاردى انىقتاۋ 2015 - جىلى باستالادى
بۇل تۋرالى يتار-تاس اگەنتتىگىنە حالىقارالىق وليمپيادا كوميتەتى باعالاۋ كوميسسياسىنىڭ باسشىسى (ح و ك)، رەسەيدىڭ وليمپيادا كوميتەتىنىڭ پرەزيدەنتى الەكساندر جۋكوۆ مالىمدەدى.
كوميسسيا 2022 - جىلعى قىسقى وليمپيادا ويىندارىن وتكىزۋگە ءوتىنىم بەرگەن قالالاردى باعالايدى. الداعى 7- شىلدە كۇنى شۆەيتساريانىڭ لوزاننا قالاسىندا حالىقارالىق وليمپيادا كوميتەتى اتقارۋشى كوميتەتىنىڭ وتىرىسى وتەدى. وندا قىسقى وليمپيادا ويىندارىن وتكىزۋگە ۇمىتكەر قالالاردىڭ اتتارى رەسمي تۇردە جاريالانادى.
ەستەرىڭىزگە سالا كەتەيىك، ازىرگە ءوتىنىم بەرگەن مەملەكەتتەردىڭ قاتارىندا قازاقستان (الماتى) ، نورۆەگيا (وسلو) جانە قىتاي (بەيجىڭ جانە جاڭجياكوۋ) ەلدەرى بار.
«ح و ك- تىڭ اتقارۋشى كوميتەتى ۇمىتكەر قالالاردى رەسمي تۇردە جاريالاعان سوڭ، ءبىز ىسكە كىرىسەمىز، - دەدى ءوز سوزىندە ا. جۋكوۆ. - قالالار تاڭدالماي جاتىپ، مەن بۇل جۇمىستى باستاي المايمىن. ۇمىتكەرلەر انىقتالعان سوڭ، ءبىز ارنايى كوميسسيا قۇرامىز. سوسىن، 2015 - جىلدىڭ باسىنان باستاپ، باعالاۋ ساپارىنا شىعادى» .
ال 2022 - جىلعى قىسقى وليمپيادانىڭ استاناسى 2015 - جىلى شىلدە- تامىز ايلارىندا حالىقارالىق وليمپيادا كوميتەتىنىڭ مالايزيا استاناسى كۋالا-لۋمپۋردە وتەتىن كەزەكتى سەسسياسىندا جاريالانادى.
اۆتور: جاپپاربەرگەن ايبوتا
